[cmsmasters_row][cmsmasters_column data_width=»1/1″][cmsmasters_text]
Ош шаарынын борбордук деген негизги үч эле көчөсү бар. Анын бири алдыда биз сөз кыла турган Абсамат Масалиев проспектиси. Бул чоң көчө 2001-жылы толук реконструкцияланган. Ошондон бери жамачылуу аладай болуп, өңгүл-дөңгүлүнөн келген бир немеге айланган да калган. Жылда жамашат, жылда бузулат. Жылда оңдомуш болот, жылда талкаланат. Ошентип 22 жыл дегенде быйыл араң ременттолуп отурат.
Шаардык мэриянын маалымат кызматынан билдиришкендей, бул проспект 5 этап менен оңдолот. Биринчиси: Шамшиев-Абдыкадыров көчөлөрү болсо, экинчиси: Абдыкадыров-Монуев, үчүнчүсү Монуев-Навои, ал эми 4-сү: Новои-Зайнабединов аралыгы болсо, 5-этабы: Зайнабединов-Каныкейдин эстелигине чейинки аралыкта жүрөт. Азыр оңдоо иштери 4-этапта жүрүп жатат. Буга чейинки бөлүктөрүндө жумуш регулярдуу жүрүп жаткандыктан, жолдор жабылып, маршруттук каттамдардын багыттары өзгөрүп, шаардыктар менен конокторго бир топ ыңгайсыздыктарды жаратты. Бул үчүн муниципалитет жарандардан кечирим сурап, жумуштарды мөөнөтүнөн эрте бүтүргөнгө аракет кылып жатышкандыктарын айтышат. Бирок тургундар куруучулар жолду бир тараптуу жаап, экинчи жагына иштесе деле болмок дешет.
Ош шаардык жолдор башкармалыгынын башчысы Арзыбек Жунусов биздин редакцияга билдиргендей, аталган көчөнүн курулушуна жумушчулар күнү-түнү, эки сменде кызмат өтөп жатышканын билдирди. Буга чейин Масалиев проспектисинде чуңкур жамоо менен гана алектенип келишкендиктен, жолу тегиздөөгө көп убакыт коротулууда.
Ошентип багы ачылбаган Масалиев проспектисинде генералдык оңдоп-түзөө иштери жүрүп жатат. Тактап айтканда, жолдун 1-катмарына 6 см., а экинчисине 5 см. асфальт басылып, жол тилкелерине бордюрлар төшөлүүдө. Жунусов кошумчалагандай, жумушту бат аткаруу үчүн кошумча жумушчу бригадалар да тартылган. Жакынкы күндөрдө бардык иштер бүткөрүлүп, жол сызыктарын чийүү иштери башталат.
Айтмакчы, бул эле эмес, Ош шаарындагы башка көчөлөрүндөгү ремонт иштери 31-август – Кыргызстандын 32 жылдык Эгемендүүлүк күнүнө чейин толук бүткөрүлөт. Анткени быйыл бул майрам Ош шаарында чоң салтанат менен белгилени атат. Бул күнгө карата бир катар инфраструктуралык объектилер реконструкцияланууда жана жаңы курулуш иштери жүргүзүлүүдө.
“Быйыл Ош шаардык Жолдор башкармалыгы фрезалуу атайын техника сатып алып, курулушка кеткен чыгымды кыскарттык”, – дейт Жунусов. Анткени аткарыла турган жумушту тендерге койгондо сумма бир аз да болсо арзан коюлган.
“Масалиев проспектисинин жалпы узундугу 3 км. Ал эми туурасы 22-26 метрге чейин. Ага сарпталуучу акча каражатынын жалпы суммасы 135 млн сом деп пландалууда. Мындан эконом да болушу мүмкүн. Эгер аны капиталдык оңдоп-түзөй турган болсо, болжол менен 450-500 млн сом керек болот. Болбосо андан да көп акча кетип калышы мүмкүндүгүн. Бул аткарылып жаткан иштер экспертизадан өткөрүлбөйт экен, ошондуктан экотехинспекцияга гана тапшырылып, жумуштардын сапатын ошолор карай турган болду”,-дейт А.Жунусов.
Былтыры Ош шаарынын ички жолдорун асфальттоого деп Кытайдан 100 млн доллар гранттык акча күтүлүп жаткан. Ал каражат келсе, калаанын 16 ички жолу толук оңдоп-түзөөдөн өтмөк. Бирок гранттык акча келбей калгандыктан, азыр каражат жергиликтүү бюджеттен коротулууда.
Буга чейин Ош шаардык кеңешинин депутаттарынан турган атайын топ калаадагы жаңыдан салынган тротуарлардын сапатын текшерип, канааттандыраарлык эмес деп бүтүм чыгарышкан. Анын натыйжасында Жолдор башкармалыгынын кызматкерлерине кылмыш иши козголгонун 21-июнда Башкы прокуратурадан билдиришкен. Учурда тергөө амалдары уланып жатат. Анткени өткөн жылы шаардагы жалпы 22 километр узундуктагы тротуар курууга мамлекеттик казынадан 148 млн 900 миң сом, ошондой эле 6 километр тротуар курууга жергиликтүү бюджеттен каражат бөлүнгөн болчу.
Ушул жылдын 27-майында журналисттер Ош мэриясына караштуу Жолдор башкармалыгы өткөргөн миллиондук тендерлерине ишкананын кызматкерлери өздөрү катышып, утуп келгенин аныкташкан. Журналисттер иликтеген материалдагы маалыматтарга караганда, кызматкерлердин алды 70 миллион сомдук тендерди утуп, салган жолдору боюнча чуу да чыккан. Ал эми муниципалдык ишкананын жетекчиси Арзыбек Жунусов медиа каражаттарына берген маегинде кызматкерлердин тендерге катышканын моюндап, бирок муну мыйзамдуу деп атаган болчу.
Ушуга окшогон шектүү маселелерден улам, коомчулукта жолдорду сапатуу салыш керек деген талап катуу коюлуп жатат. Мисалы: биз сөз кылып жаткан Масалиев проспектисиндеги Абдыкадыров-Монуев көчөлөрүнүн ортосундагы жолдун сапаты коомчулукта талкуу жаратып, курулушуна шек жарата баштады. Анткени ал аралыктагы жол тегиз болбой, “толкундуу жол” болуп калганы байкалганын айтышууда. Бирок Арзыбек Жунусов бул пикирге кошула албай турганын билдирет. “Бул жол өз нугу менен кайра өзүнүн ордуна келет. Аны айткандар келсе мен көрсөтүп берем. Монуев – ар жактан келген кошулуш жер. Алар жүрүп отуруп, өз нугуна келет. Негизи бул жолдо бир эмес, жыйырма жылга чейин жамоо иштери жүрбөйт деп убада берем”, – дейт Жунусов.
Анткен менен салынып жаткан жолдордун сапаты кийинки текшерүүлөрдө анык болот. Белгилей кетсек, быйыл Ош шаарынын жолдорун оңдоого жергиликтүү бюджеттен 350 млн сом акча каражаты бөлүнгөн.
А.Каракозуев
[/cmsmasters_text][/cmsmasters_column][/cmsmasters_row]