Бүгүнкү күндө өлкө аймагында 715 миңден ашык пенсионер бар. Ал эми Ош облусунун аймагында жалпы пенсионерлердин саны 178 142ни түзөт. Өткөн жарым жыл ичинде 178 142 пенсионерге 5 845 718 625 сом төлөнүп берилген. Бул багытта Ош шаардык Социалдык фонд башкармалыгынын башчысы Абдуллаев Арстанбек Ураимович, жарандарды социалдык жана пенсиялык жактан камсыздоо иштери «Кыргыз Республикасынын Социалдык камсыздандыруу» жана «Мамлекеттик пенсиялык социалдык камсыздандыруу» жөнүндөгү мыйзамдарынын негизинде жүргүзүлүп жаткандыгы боюнча айтып берди. Ошондой эле үстүбүздөгү жылдын өткөн алты айынын жыйынтыгы жөнүндө, ушул аралыкта канча пенсионер катталганы, канча жаран пенсиянын топтоо бөлүгүнөн акча каражатын алуу үчүн кайрылганы, ипотекалык насыялар үчүн берилген каражаттар тууралуу маалымат берди.
ПЕНСИЯ ЧЕКТӨӨ ЖАНА ЖАРАНДАРДЫ КАБЫЛ АЛУУ
Башкармалыктын Пенсия чектөө жана жарандарды кабыл алуу бөлүмүндө Ош шаары боюнча 2023-жылдын 1-июлуна карата жалпы 27 875 пенсионер катталды. Анын ичинен 22 890у жаш курагы боюнча (64 персоналдык пенсионер), 4016сы майыптыгы боюнча, 385и 1-топтогу майыптар, 2 678и 2-топтогу майыптар, 953ү 3- топтогу майыптар түздү. Багуучусунан ажырагандыгы боюнча 930 пенсионер, анын ичинен 14ү тоголок жетимдиги боюнча пенсия алышат. 167 аял күйөөсү каза болуп, анын пенсиясына өткөн. 823 бала жарым жетим, анын ичинен 20сы тоголок жетим болуп эсептелет. Аскер кызматкерлеринин мыйзамына ылайык, 39 пенсионердин иш кагазы бар (анын 22си ЧАЭС жана 17си ИСА). Жаңы пенсия чектелген пенсионерлердин саны 1136 түздү. Анын ичинен 957си жаш курагы боюнча, 148и майыптыгы боюнча, 31ине багуучусунан ажырагандыгы боюнча пенсия чектелген. Өткөн жарым жыл ичинде Ош шаарынан 20 пенсионер республиканын башка аймагына көчүп кеткен. Ош шаарына республиканын башка аймагынан 26 пенсионер көчүп келишкен. Ал эми 419 пенсионер каза болгон.
КАЛКТЫ ТЕЙЛӨӨ БОРБОРУ
Ош шаарындагы Калкты тейлөө борборунда Социалдык фонд башкармалыгынын Калкты тейлөө терезеси ачылган. Бул борбор Ош шаары жана Ош облусу боюнча жарандарды кабыл алып келүүдө. Өткөн жарым жыл аралыгында 124 жаранга тиешелүү мамлекеттик кызматтар көрсөтүлдү. Жарандар негизинен пенсиянын топтоо бөлүгү, сөөктү коюуга пособиеге арыз берүү, жаңыдан пенсияга чыгуу, пенсионерлерге пенсиянын өлчөмү боюнча тастыктама, камсыздандырылган адамдарга жеке камсыздандыруу эсептеринен көчүрмө берүү боюнча кайрылышкан. Социалдык фонд башкармалыгынын бул борборуна камсыздандырылган адам пенсия дайындоо, пенсияны кайра эсептөө, пенсиянын өлчөмү жөнүндө маалым кат алуу, жеке камсыздандыруу эсебинен көчүрмө алуу, пенсия төлөөнү узартуу, сөөк коюуга ырым-жырым жөлөк пулун алуу, пенсияны төлөө каналын алмаштыруу, пенсиянын топтомо бөлүгү тууралуу маалымат алуу, пенсиялык күбөлүк алуу боюнча арыз бере алышат.
ПЕНСИЯНЫН ТӨЛӨНҮШҮН КӨЗӨМӨЛГӨ АЛУУ
Пенсионерлердин бир айлык пенсиясын төлөө үчүн керектелүүчү акча каражатынын орточо өлчөмү 214 млн. 422 миң 660 сомду түзөт. 1-июлга карата пенсиялар өз убагында 1 млрд. 268 млн. 792 миң 964 сом суммасында төлөнүп берилди. Жалпы пенсионерлердин 68,5 пайызы (19073 пенсионер) пенсияларын банк аркылуу алышат. 1-июлга карата 981 пенсионер банкка өтүү үчүн кайрылган. Ал эми «Кыргыз почтасы» аркылуу 8857 пенсионерге 398 млн 493 миң 998 сом төлөндү. Бүгүнкү күндө пенсияны каржылоодо Ош шаардык Социалдык фонд башкармалыгы Ош шаарындагы 21 банк, 12 байланыш бөлүмдөрү менен кызматташып жатат. 2010-2011-жылдардагы пенсиянын топтоо бөлүгүнө топтолгон акча каражатын алууга укугу бар 1566 жаранга 7 млн. 572 миң 802 сом төлөнүп берилди. Анын ичинен 30 жаранга багуучусунан ажырагандан кийин 839 миң 036 сом төлөнүп берилген.
ИПОТЕКАЛЫК НАСЫЯЛАРДЫ ЖАБУУ
Ипотекалык насыя төлөп жаткан жана мурдагы ипотекалык насыяларын жабуу максатында камсыздандырылган жарандардын жеке камсыздандыруу эсебинен инвестициялык кирешелерди эске алуу менен 124 жаранга топтолгон акча каражатынан 21 млн. 011 миң 906 сом төлөнүп берилди. Расмий тартипте жумушсуз деп таанылган 4 жаранга үч айдан калктын жашоо минимум өлчөмүндө жалпы суммасы 70400 сом жөлөк пул пособие катары төлөнгөн. «Инфодокс» программасы аркылуу 1552 кат келип түшкөн жана аларга өз убагында жооптор берилди. Ошондой эле, оозеки кайрылган 25 жаранга адистер тарабынан жооптор берилүүдө.
ПЕНСИЯ ЧЕКТӨӨ ЖАНАЖАРАНДАРДЫ КАБЫЛ АЛУУ
Бүгүнкү күндө облустун аймагында 141 594 адамга карылыгы боюнча, 28 661 адамга майыптуулугу боюнча, 7 761 адамга багуучусунан ажырагандыгы боюнча, 5 адамга Улуу Ата-Мекендик согушка катышкандыгы боюнча, ал эми 131 адамга персоналдык пенсия чектелген. КР Министрлер Кабинетинин 2022-жылдын 20-майындагы №261 токтомуна ылайык, жеке камсыздандыруу эсебинен топтоо бөлүгүндө пенсиялык топтоолору бар жана жеке турак жайы жоктугуна байланыштуу бүгүнкү күндө ипотекалык насыясы бар адамдарга, ошондой эле расмий никеде турган алардын жубайларына пенсиялык топтоолорду алуу укугу ыйгарылган. Мындан сырткары, расмий тартипте жумушсуз деп таанылса 3 айдан ашык эмес мөөнөткө жумушсуздук боюнча жөлөк пул катары калктын жашоо минимуму өлчөмүндө (7800 сом) жана өмүрүнө олуттуу коркунуч туудурган оор ооруларга чалдыккан жарандар да пенсиялык топтолгон каражаттарынан арыз берип ала алышат. Бул укуктарды колдонуу менен өткөн жарым жыл аралыгында аталган башкармалыкка кайрылган пенсиянын топтоо бөлүгүнө топтолгон акча каражатын алууга укугу бар 1458 жаранга 5 млн. 167 миң 306 сом, анын ичинен багуучусунан ажыраган 19 жаранга 523 миң 962 сом төлөнүп берилген.
Ал эми ипотекалык насыя алыпжаткан жана мурдагы ипотекалык насыяларын жабуу максатында камсыздандырылган адамдардын жеке камсыздандыруу эсептеринен инвестициялык кирешелерди эске алуу мн 112 жаранга топтолгон акча каражаттарынан 18 млн. 438 миң 675 сом төлөнгөн. Ошондой эле расмий тартипте жумушсуз деп таанылган 4 жаранга 3 айдан калктын жашоо минимуму өлчөмүндө жалпы суммасы 70 400 сом жөлөк пул катары чегерилген. Мындан сырткары, КР Социалдык фондунун 2023-жылдын 27-январында чыккан №16 буйругуна ылайык, 2022-жылда иштеген 5654 пенсионерге ошол жыл үчүн төлөнгөн камсыздандыруу төлөмдөрүнө пенсиянын экинчи камсыздандыруу бөлүгүнө кайра эсептөө жүргүзүлүп, пенсияга кошулган суммалары төлөнүп берилген. Учурда Ош шаары боюнча пенсиянын орточо өлчөмү 7457 сомду түзөт. Ал эми пенсионерлердин 1 айлык пенсиясын төлөө үчүн керектелүүчү акча каражатынын орточо өлчөмү 211 млн. 622 миң 555 сом.
А.МАТИЕВА