Бүгүнкү күндө эне тилибизге мамлекеттик деңгээлде олуттуу көңүл буруу талап кылынууда. Жакында эле өлкө башчысы Садыр Жапаров Кыргыз Республикасынын мамлекеттик тили жөнүндө Конституциялык мыйзамга кол койду. Мыйзам Кыргызстандын жарандарына жана республикада жашаган чет элдиктерге тиешелүү. Анда кыргыз тилинин колдонулушунун жана тил саясатын мамлекеттик деңгээлде жүргүзүүнүн укуктук негиздери белгиленген. Ошондой эле орус тили Кыргызстанда расмий тил катары пайдаланылаары айтылган.
Кыргыз Республикасынын Президентине караштуу Мамлекеттик тил боюнча улуттук комиссиянын аймактарда мамлекеттик тилди өнүктүрүү бөлүмүнүн башчысы Телекманова Алмагүл Өмүрзаковна Конституциялык мыйзамдын кабыл алынышы, анын мааниси, өзгөчөлүгү тууралуу, коомдо кызуу талкуу жаратып жаткан Мыйзамдын 3,4, 11, 20, 32-беренелери боюнча айтып өттү. Өз сөзүндө Кыргызстанда расмий тилге карата өтө толеранттуу мамиле жасалып жаткандыгын баса белгиледи. Ошондой эле аталган мыйзамдын маанилүү экендигин айтып, тилди сактоо, өнүктүрүү маселелерине токтолду. Мындан ары иш кагаздар, документтерди жүгүртүүдө, эл аралык келишимдерди түзүүдө, укуктук-ченемдик актылар, мыйзамдарды жазууда, көрнөк-жарнактар, нотариалдык документтер жана башка маалымкат мамлекеттик тилде гана болот. Зарыл учурда расмий тилге которулуп колдонулат. Мындай ченем Президент кол койгон “Мамлекеттик тил жөнүндө” Конституциялык мыйзамда так белгиленди. Тагыраагы мамлекеттик, жергиликтүү өз алдынча башкаруу органдары, менчиктин бардык формаларындагы ишканалар, мекемелер жана уюмдар ишинде мамлекеттик тилди милдеттүү түрдө пайдаланышы керек. Мыйзамда жарнама боюнча да өзүнчө талаптар белгиленген. Ага ылайык, жазуулар мамлекеттик тилде, андан кийин расмий тилде, кийин гана чет тилде жазылат. Ар кандай жоромолго орун берилбейт. Мыйзам талаптарын сактап, иш орундарында тиешелүү тактоо иштери жүргүзүлүшү керек.
КЫРГЫЗ ТИЛИ ӨЗ ӨЛКӨСҮНДӨ ГАНА ӨНҮГӨ АЛАТ
Кыргызды өз мекенинде кыргызча сүйлөтө албай, кыргызга эне тилин үйрөтө албай убара тартып келе жаткандыгыбыз чын. Кыргыз эли байыркы элбиз. Кыргыз тили кымбат тил. Ырдаганда, сүйлөгөндө сонун угулат. Адабий тилдин нормаларына ылайык сүйлөө, таалим берип жол көрсөтүү үйдөн башталат. Андыктан, жаш муундарга эне тилди кастарлап, төкпөй- чачпай өзүндөй өткөрүп берүү маанилүү. Келечек муундарга кыргыз тарыхын, каада-салтын, үрп-адатын сиңирип, кыргыз кылып тарбиялоо керек. Башка тилдерди кошумча тандап, өз алдынча үйрөнгөнгө не жетсин. Кайсы тилди, канча тилди үйрөнөт ал ар кимдин өз эрки. Эне тилди сактоо, мекенчилдик сезимди тарбиялоо ар дайым биринчи орунда болсун. Ар бир жаран бул милдетти туура кабыл алып, кыргыз тилин, кыргыз мамлекеттүүлүгүн сактоо керек. Буга биз баарыбыз милдеттүүбүз. Кыргыз өлкөсүндө кыргыз тилдүү мектептердин азайганы эне тилге болгон мамиленин салкын экендиги менен түшүндүрүлөт. Баласын орус тилдүү бала бакчага, мектепке окуткусу келген ата-энелер четтен чыгат. Ал эми кыргыз тилдүү класстарга суроо-талап аз. Башка тилди үйрөнүүнү чектегиң келбейт. Азыр көп тил билгендердин заманы, канча тил билсең, ошончо дил билесиң. Бирок, өз эне тилибиздин унутта калып, өз жерибизде өгөйлөнүп жатышы туура эмес. Кыргыз тилдүү билим берүү мекемелерин көбөйтүү керек. Өз эне тилибизди билбей туруп, башка тилди үйрөнүп жарытпайбыз. Биринчиден кыргыз тилди баркташыбыз керек, сакташыбыз керек, сүйлөшүбүз керек. Балдарыбыз кыргыздын нукура көөнө сөздөрүн үйрөнсүн. Кыргыз тили жөнүндө канча мыйзам жазылса да муктаждык жаралбаса сүйлөтө албайбыз. Мамлекеттик тилге муктаждык жаратуунун үстүндө иштөө керек.
А.МАТИЕВА