Кыргыз маданияты кылымдарды карытып, өнөрлүү инсандарды өстүрүп келет. Албетте, сахна үчүн жаралган инсандар кыргыз элинин музыка искусствосунун өсүп, бүгүнкү деөгээлге жетишине эбегейсиз зор салым кошкондугу менен айырмаланат эмеспи. Дегенибиздей, биз Кара-Кулжа районуна караштуу Кызыл-Жар айыл өкмөтүнүн Кайыө-Талаа айылдык маданият үйүнө кайрылганбыз. Бизди күтүп турган маданият үйүнүн жетекчиси Суранбаев Мырзали Шайлооевич менен таанышып, ал жетектеген маданият үйүнүн ишмердүүлүгү жөнүндө кызыктуу маек куруп, суроо салганбыз.
Кызыл-Жар айыл өкмөтүнүн Кайың-Талаа айылында мектеп, балдар бакчасы жана маданият үйү бир жерде туташ жайгашкан. Мырзали Суранбаев жетектеген маданият үйү көп жыл аралыгында кароосуз турган. 2020-жылы айыл өкмөт тарабынан долбоор тартылып, ремонт иштери жүргүзүлүп, Мырзали Шайлооевич жетекчи болуп дайындалган.
«Мен көркөм жетекчи болуп иштеп, директор болуп дайындалганымдан кийин маданият үйүнүн ремонтторуаяктап, ичин толтурууга аракеттерди көрө баштадым. Айыл өкмөткө кайрылуу жазып, керектүү эмеректерди алганбыз. Стол, стул, сахнанын көшөгөсүн тиктирип, ички жасалгасын жасатып, Сиздер көрүп турган абалга келтирдим десем болот», — дейт Мырзали Суранбаев.
Мында азыр кадр маселеси оор. Жалгыз өзү иштегендиктен, маданият үйүн жууп-тазалоо иштерин да өзү жасап, көз карегиндей аздектеп келет.
«Бизде жалгыз өзүм иштейм. Бир көркөм жетекчи жана бир жууп-тазалоого кызматкер алуу зарылдыгы бар. Бирок, бул маселе азырынча чечиле элек. Ошондуктан клубдун тазалыгын да өзүм жасап турууга мажбур болуудамын. Ар кандай маданий иш-чаралар, элдик жыйындар дал ушул жерде өткөрүлөт. Маданият үйүбүздүн залы 100 орунга ылайыкташкан»-дейт жетекчи.
Чындыгында маданият үйүнүн ичи таза жана жарык экен. Бардык эмеректер ирети менен коюлуп, интернет желеси да тартылганын көрдүк. Ал эми тоо элин маданият тармагында тейлеген Мырзали Суранбаев эл арасындагы таланттуу жашоочулардын башын бириктирип, «Эл шайырлары» жана «Шайыр апалар» тобун түзгөн.
«Мындан он жыл алдын эл арасындагы таланттарды табуу, аларды сахнага тартуу өтө оор эле. Себеби, көбү тартынышып, топко кошулуудан баш тартышчуу. Бара-бара жашоочулардын маданиятка көз карашы калыптанып, эки топ түзүүгө жетиштим. Негизи Алайкуу өрөөнүнүн ар бир жараны таланттуу, баары жакшы ырдайт, биздеги той-мааракелер өз элибиздин арасындагы таланттар менен эле кызыктуу өткөн учурлар арбын»,-дейт Мырзали Шайлооевич.
Эл шайырлар тобу таланттуу мырзалар жана айымдардан түзүлсө, Шайыр апалар тобу ак элечектүү апалардан куралган. Алар үчүн айыл өкмөт тарабынан окшош формалар тиктирип берилүүдө. Ар бир даталуу күндөр Мырзали Суранбаевдин уюштуруусу менен өзү негиздеген таланттуу топтордун коштоосунда шаңдуу белгиленип келет. Албетте, тоо арасында жайгашкан айылдык маданият үйүндө көйгөй жараткан маселелер жок эмес. Мында музыкалык аппаратуралар жок. Аны алууга демөөрчү издеген жетекчи, банктан насыя алып болсо да, аппаратура алсамбы деген ойдо экенин билдирет.
«Маданият үйүндө эки комуз жана аккордеон аспаптары бар. Ал эми аппаратураны музыкалык мектептен сурап турабыз. Бирок, маданият үйү болгондуктан өзүнүн комплект аппаратуралары болуусу шарт. Насыяга алуунун жолун карап, документ топтоп жатамын»-дейт
Мырзали Суранбаев. Маданият үйү мектептин балансында болгондуктан, долбоор тартуу, кошумча курулуш иштерин алып баруу мүмкүн эмес. Ошондуктан, мектеп менен бирге иштешип келишүүдө. Ал эми борбор калаадан жана башка район шаарлардын таланттуу инсандары тоо элине концерт коюп келген учурлар болуп турат.
«Бизге концерт койгону келген артисттер атайын тиешелүү мекемелерден уруксат кагазын алып келишкенде маданият үйүнүн эшигин ачып беребиз. Ар түрдүү өнөр ээлери келишет. Концерттерин уюштурууга жардам берип, гастролдоп келген чыгармачыл топторду үйүмө түнөтүп, аларга сый көрсөтүп турам. Анткени биздин айыл тоолуу, райондон бир канча чакырым алыста болгондуктан мейманканалар, ашкана-кафелер жок»-дейт жетекчи.
Мырзали Суранбаев жаштайынан музыкага кызыгып, колуна комуз, аккордеон кармап, чопо чоор тартып, улуттук аспаптарда катыра кол ойнотуп, созолонто ырдап, жагымдуу добушу менен көп сынактарга да катышып турган. Жеөишбек Шамшиевдин юбилейлик мааракесинде жарыяланган сынакка катышып, алдыөкы орунду илип кеткен. Чопо чоор тартууну айылдагы Кадырали агайынан үйрөнгөнүн айтат каарманыбыз.
«Талант – табигаттан берилет деген пикирдин мааниси чоө тура. Мага да жаратылыш тарабынан талант ыроолонсо керек деп ойлойм. Ошондуктанбы өнөр дүйнөсүнө аралашып, эмгек кылып элибизге ыр сунуп, кызмат кылуу жолундамын. Чыгармачылык, анын ичинде ыр бул мен үчүн бир ажайып кооз дүйнө. Маданият тармагында иштегенге чейин айылда өткөн маданий иш-чараларга активдүү катышат элем. Ошентип, маданият тармагында иштеп, калкыма кызмат кылып келүүдөмүн»,-дейт өнөр ээси.
Н.ӨМҮРЗАКОВА, Ош–Кызыл-Жар–Ош