2023-жылдын 31-августунда Кыргыз Республикасыеые эгемендүүлүгүнүн 32 жылдыгын саланаттуу белгилөө күтүлүүдө. Бул 32 жылдын ичинде эгемендүү мамлекетибиз укуктук-демократиялык өлкө катары бир катар жетишкендиктерге ээ болду.
Айта турган болсок, курамында Кыргыз ССРи жана андан башка союздук республикалары бар СССР державасы кыйрагандан кийин элибиз өзалдынча мамлекет болуп түзүлүп, өзөнүгүүсүндө укуктук-демократиялык жолду тандап, ушул күндө эгемен мамлекетибизге 32 жыл болуп олтурат. Кыргыз Республикасынын Жогорку Кеңешинде 1991-жылдын 31-августунда “Мамлекеттик көз карандысыздыгы жөнүндө” Декларация кабыл алынып, Кыргыз Республикасы көз карандысыз, эгемендүү демократиялык мамлекет катары жарыяланган. Көз каранды эместиктин шартында 1991-жылы 12-октябрда Аскар Акаев жалпы элдик шайлоодо Кыргыз Республикасынын алгачкы Президенти болуп шайланган.
Кыргыз Републикасынын туусу, гимни жана герби кабыл алынган. Кыргыз Республикасынын мамлекеттик туусу 1992-жылы 3-мартта кабыл алынган. Туунун авторлору Э.Айдарбеков, Б.Жайчыбеков, С.Иптаров, Ж.Матаев, М.Сыдыков болушкан. Кыргыз Республикасынын Мамлекеттик гимни 1992-жылы 18-декабрда Кыргыз Республикасынын Жогорку Кеңешинин № 1141 — XII токтому менен бекитилген.Сөзүн Жалил Садыков, Шабданбек Кулуев, музыкасын Насыр Давлесов менен Калый Молдобасанов жазган.
Ал эми Кыргыз Республикасынын Мамлекеттик герби 1994-жылы 14-январда Жогорку Кеңештин токтому менен бекитилген. Авторлору А.Абдраев, С.Дубанаев болушкан. Кыргыз Республикасынын Президентинин Указы менен 1991-жылы 20-октябрда Мамлекеттик коопсуздук жоюлуп, анын ордуна Улуттук коопсуздук боюнча мамлекеттик комитети, ал эми 3-декабрда Кыргыз Республикасынын Улуттук Гвардиясы түзүлгөн. Кыргыз Республикасынын аскери, чек аралык коргонуу системалашкан.
Башкы жетишкендик – Кыргызстан мамлекеттик эгемендүүлүктүн бардык белгилерине ээ болду. Анын тышкы саясаты калыптанды. Бир катар дүйнөлүк, эл аралык уюмдарга мүчө болду. Кыргызстан эгемен, өз алдынча мамлекет болуусу менен дүйнөлүк коомчулукка интеграцияланып, өлкөдө базар экономикасы калыптанып, жерге жеке менчик укугу киргизилген, ишкердик тармагы, жергиликтүү өз алдынча башкаруу системасы өнүккөн, билим берүү, медицина, социалдык тармактар, деги эле жалпы эл чарба тармагында реформалар жүргүзүлгөн.
Кыргыз Республикасын дүйнөлүк коомчулук тааныды. Кыргызстанда Европа өлкөлөрүнүн, АКШнын, Кытай жана башка бир катар чет мамлекеттеринин элчиликтери ачылып, эл аралык кызматташуу ийгиликтүү уланууда. Ошону менен катар Кыргыз Республикасынын элчиликтери Россияда, АКШда, Кытай Эл Республикасында жана Европа, Азия өлкөлөрүндө, башка да өлкөлөрдө ачылды.
2001-жылы Кыргыз мамлекеттүүлүгүнүн 2200 жылдыгы ЮНЕСКОнун урааны алдында белгиленгендиги чоң жетишкендигибиз. Оштун 3000 жылдыгы, Манастын 1000 жылдыгынын белгилениши да чоң ийгилик. Ош шаарынын 3000 жылдык салтанаты – 2000-жылдын октябрь айында Бириккен Улуттар Уюмунун колдоосу менен өткөрүлгөн. Манас эпосунун 1000 жылдыгына карата “Манас-1000” иш -чарасы Бириккен Улуттар Уюму, ЮНЕСКО өңдүү бир катар эл аралык уюмдардын колдоосу менен уюштурулган.
Ал эми Дүйнөлүк “Көчмөндөр оюндары” өткөрүлгөнү , ага 60тан ашуун өлкөдөн меймандар келиши өзүнчө жетишкендик. Бул маданият тармагынын өнүгүшүнө байланыштуу. Кыргыз маданиятын дүйнө тааныды. 2014-жылы тарыхта биринчи ирет Кыргызстанда өткөрүлгөн. Мелдешке Азия, Европа, Түштүк Америка, Америка өлкөлөрү катышкан. 32 жылда билим берүү тармагы мыкты өнүктү десек болот. Көптөгөн жогорку окуу жайлары ачылды. Жалпы республикалык тестирлөө системасы киргизилди. Медицина тармагы толук реформаланып, милдеттүү медициналык камсыздандыруу иштеп калды. Үй-бүлөлүк дарыгерлер топтору, Үй- бүлөлүк медицина борорлору түзүлдү. Улуттук банк тармагында реформалар жүргүзүлүп, кыргыз валютасы — сом кабыл алынып, ийгиликтүү жүгүртүүгө чыкты, учурда бекем валюта болуп калды. Көптөгөн акционердик коммерциялык банктар ачылып, калк зарылчылыгына иштеп жатат. Банк системасы өнүгүп, дүйнөнүн көптөгөн мамлекеттери менен кызматташууда. Айыл чарба тармагы реформаланды.
Колхоз, совхоздор жоюлду. Дыйкан жана фермердик чарбалар, кооперативдик чарбалар иштеп жатышат азыр. Жеңил жана оор өнөр жайында да өзгөрүүлөр бар. Алтын, көмүр кендери иштеп, кийим тигүү өнүгүүдө. Текстиль калыптануу жолунда. Энергетика тармагы өнүктү. Электр энергиясын өнүктүрүү тармагында жетишкендиктер орун алды, Камбар Ата-2 ГЭСи курулду, Кыргызстан электр энергиясы боюнча көз карандылыктан чыкты. ГЭСтерди куруу боюнча долбоорлор менен иштөө колго алынды. Жол траснпорт тармагындагы ири жетишкендик Ош-Бишкек стратегиялык жолдун курулушу болду. Элге шарт түзүүдө бул жол артерия катары пайдаланылууда. Экинчи Ош-Бишкек альтернативалык жолу курулуп, бүтүшү күтүлүүдө. Аба каттамдары боюнча болуп көрбөгөндөй өзгөрүү бар. Аба каттамдары мурункудан айырмаланып, дүйнөнүн бир катар мамлекеттерине жүргүнчүлөрдү ташууда жана ташып келүүдө.
Байланыш тармагы өнүгүп, интернет, санариптешүү жолго коюлду. Бардык тармактарда санарип менен иштөө калыптанып, өнүгүүдө. Спорт тармагында көп кубанычтуу ийгиликтер бар. Уул- кыздарыбыз дүйнө чемпиондугун алып жатышат, олимпиадалык оюндарда алдыңкы орундарды багындырышууда. Санай берсек, башка да жетишкендиктер арбын.
32 жылдагы эгемен өнүгүүбүздө бир катар көйгөйлөр да коштоп келүүдө. Алсак, бир катар ири заводдор, фабрикалар жабылып, миграция күч алды, жумушсуздуккөбөйдү, коррупция өнүгүп, тышкы карыз көбөйдү. Ири ишканалар курулбай жатат. Чет өлкөлүк кредиттердин баары эле максаттуу пайдаланылбагандыгы, ага экс-президенттердин үй-бүлөлөрү кийлигишкени да коомчулукта айтылып келет. Көйгөйлөрдөн улам 32 жылдын ичинде Март революциясы ишке ашып, Аскар Акаевдин бийлиги кулатылды. Апрель революциясы жүз берип, Курманбек Бакиевдин бийлиги алынды, Алмазбек Атамбаев президенттикке келди. Башкаруу системасы өзгөрүп, жаңы Конституция референдум аркылуу кабыл алынып, Парламенттик башкаруу системасы кирди. Кийин президент Сооронбай Жээнбеков президенттик кызматтан алынып, азыркы бийлик келди.
Президент Садыр Жапаровдун тушунда Башкы мыйзам — Конституция өзгөрүп, Президенттик башкаруу системасы кирди. Элдик Курултай Конституцияда жазылып, биринчи Элдик Курултай өткөрүлдү.
Укуктук-демократиялык өнүгүү жолунда алга кадамыбыз арбысын.
К.Кыдыралиева