Кыргыз Республикасынын Президенти Садыр Жапаров мамлекетибиздин эгемендүүлүгүнүн 32 жылдыгын майрамдоонун алкагында жана Кыргыз Республикасынын биринчи премьерминистри, көрүнүктүү мамлекеттик жана саясый ишмер Насирдин Исановдун 80 жылдык мааракесин белгилөөнүн алкагында ОшМУнун башкы имаратында анын эстелигин ачты. Бул салтанаттуу майрамдык иш- чарага КР Министрлер Кабинетинин Төрагасы Акылбек Жапаров, КР Жогорку Кеңешинин Төрагасы Нурлан Шакиев, Жогорку Кеңештин депутаттары, министрлер, Ош облусунун жана Ош шаарынын жетекчилери, коомдук жана саясий ишмерлер, жогорку окуу жайлардынжетекчилери, ОшМУнун профессордукокутуучулар курамы жана жалпы коомчулуктун өкүлдөрү катышты.
Иш-чарада өлкө башчысы Ош шаарында белгиленип жаткан эгемендүүлүк майрамы менен куттуктады. Өзүнүн сүйлөгөн сөзүндө Кыргыз Республикасынын туңгуч Премьер министри Насирдин Исанов – өмүрүн мамлекетти курууга арнаган чыгаан мамлекеттик ишмер, жаратман инсан экендигин белгиледи. Мамлекет үчүн аткарган зор эмгектерин айтты. Ал Насирдин Исановго ыйгарылган “Ак шумкар” өзгөчө белигисин жана “Кыргыз Республикасынын баатыры” эң жогорку артыкчылык даражасын (көзү өткөндөн кийин) үй-бүлөсүнө тапшырды.
“Насирдин Исановдун 80 жылдыгы мамлекеттик деңгээлде белгиленип жаткандыгына байланыштуу бүгүнкү Эгемендүүлүк күнү менен катар анын жаркын элесин түбөлүккө калтыруу максатында Ош мамлекеттик университетинин астына айкелин да ачып жатабыз”,- деп билдирди өлкө башчысы.
“1991-жылы эгемендүү республикабыздын тарыхындагы алгачкы Өкмөттү жетектөө милдети Насирдин Исановго жүктөлгөн. Аны Өкмөт башчылык кызматка сунуштоодо Президент Аскар Акаевдин “Билими, тажрыйбасы, адамдык сапаты боюнча Насирдин Исановго альтернатива азырынча жок” деп айтканын адилеттүүлүк үчүн белгилей кетсем ашыкча болбос. Өзүңүздөргө белгилүү болгондой, ошол кездерде өлкөдө өндүрүш төмөндөп, жумушсуздук күчөп, бюджеттик кызматкерлерге, экономикада эмгек акы боюнча карыздар топтолуп, экономика өзү рецессияга кабылган.
Кыргыз ССРинин Жогорку Советинде Насирдин Исанов Өкмөт башчылыкка шайланып жатып, сунушталган кызмат аны такыр кубандырбастыгын, тескерисинче, тынчсыздандырып жаткандыгын белгилеген. Кыргыз Республикасынын Өкмөтүн жетектөөдө пландуу экономикадан базар экономикасына өтүү маселеси боюнча Насирдин Исанов өзүнүн конкреттүү сунуштарын алып чыккан. Анын сунуштары эң туура болгондугун кийинки окуялар далилдеди. Насирдин Исанович өзүнүн бай тажрыйбасын, терең билимин, интуициясын, башкаруучулук талантын Ата Мекендин кызыкчылыгына жумшаган. Эгемендүү Кыргыз Республикасынын тарыхында чиеленген маселеге айланган “Кум-Төр” алтын кени маселесинде Н.Исанов өз позициясында катуу туруп, кыргыз алтынын өзүбүз гана иштетебиз деген көз караштан тайган эмес. Тилекке каршы, шылуундардын максаты ишке ашып, анын аягы Исановдун кейиштүү тагдыры менен жыйынтыкталганы өтө өкүнүчтүү болду. “Кум-Төр” алтын кени 2021-жылы толугу менен Кыргыз Республикасынын менчигине өткөрүлдү. Ийгиликтин эрте кечи жок дегендей, кеч болсо да элибиздин ырыскысы элибиздин, мамлекетибиздин өнүгүүсү үчүн ийгиликтүү иштеп жатат. “Жакшынын көзү өтсө да, жасаган иши түбөлүк” дегендей, учурда Насирдин агабыз экинчи, түбөлүк өмүрүн жашоодо. Эл сыймыгына айланган бул инсан жаш муундарды тарбиялоодо сөзсүз үлгү болот деп эсептейм.
Ошентсе да, Исановдун ак кызматын элибиз билет, элибиз баалайт. Насип ушундай экен, анын Ата Мекенине жасаган ак эмгеги көзү өткөндөй кийин бааланып, өлкөнүн эң жогорку сыйлыгы ыйгарылып олтурат. Насирдин Исановдун айкелин тургузууну демилгелеп, колго алган Ош мамлекеттик университетинин эмгек жамаатынын аракети алкоого татыйт. Мында билим алган студенттер улуу инсандын тарыхый басканжолунан өрнөк алып, мекенчил дем менен алдыга умтулат деген үмүтүм чоң”, — деди мамлекет башчысы.
«Учурда мамлекет тарабынан билим берүүгө олуттуу көңүл бурулууда. Өткөн жылы атайын Жарлык менен өлкөбүздөгү 5 жогорку окуу жайга “Өзгөчө макам” берүү чечимин кабыл алдык. Алардын катарында Ош мамлекеттик университети да бар. Бул окуу жайларга уюштуруучулук, финансылык жана академиялык автономияны кеңириберүү менен эл аралык стандарттарга ылайык реформа жасоо милдети жүктөлдү. Ош мамлекеттик университетин жаңыланууга умтулган окуу жай катары билем. Учурда университет тарабынан демилгеленип, 7 кабаттуу медициналык клиниканын курулушу башталганын баса белгилегим келет. Бул клиника кыргыз медицина тарыхында окуу жай өзү курган эң чоң масштабдагы тарыхый курулуш болот деп күтөмүн”, — деп айтты Садыр Жапаров.
Бул иш-чарадан соң, Насирдин Исановдун 80 жылдыгын белгилөөнүн алкагында Ош мамлекеттик университетинде “Кыргызстандын эгемен жолундагы Насирдин Исановдун ролу”: тажрыйбалар жана чакырыктар” аталышындагы илимий- практикалык конференция өткөрүлдү.
Илимий -практикалык конференцияга КР Мамлекеттик катчысы Сүйүнбек Касмамбетов, Кыргыз Республикасынын Баатыры, легендарлуу парламенттин төрагасы, коомдук жана саясий ишмер Медеткан Шеримкулов, КР УИАнын академиги, филология илимдеринин доктору, коомдук ишмер Абдыганы Эркебаев, Кыргыз Республикасынын Билим берүү жана илим министри , саясий илимдеринин доктору Каныбек Иманалиев, Президентке караштуу Мамлекеттик тил жана тил саясаты боюнча улуттук комиссияынын төрагасы, физика-математика илимдеринин доктору, профессор Каныбек Осмоналиев жана башка тиешелүү тараптар, окумуштуулар катышышты. Конференцияда Сүйүнбек Касмамбетов сөз сүйлөп, Насирдин Исановдун өмүрү жана эмгеги тууралуу айтты. Анын кыргыз элине жана мамлекетке карата аткарган иштерин белгиледи. Конференциянын катышуучулары да өз сөзүндө Насирдин Исановго жогору баа беришти жана анын өлкөнүн саясий турмушундагы ордун, жаңы саясий системанын калыптанышына кошкон салымын белгилешти.Пленардык отурумдан соң, беш секцияда бир катар актуалдуу темаларда иш алып барылды. Конференциянын соңунда резолюция кабылалынды. Ошондой эле ОшМУнун окуу корпустарына саякат уюштурулду.
К.Кыдыралиева