Кыргызстандын футбол боюнча улуттук курама командасы Бириккен Араб Эмираттарынын «Аль-Наср» клубунан 1:0 эсебинде жеңилди. Бул тууралуу Кыргыз футбол союзу Фейсбуктагы баракчасына жазды.
Белгилүү болгондой, улуттук курам сентябрь айындагы машыгууларын БАЭде өткөрүп жатат. Анын алкагында Кыргызстан улуттук курамасы жергиликтүү «Аль-Наср» клубу менен «Аль-Мактум» стадионунда кез келген. Оюндун натыйжасында улуттук курама «Аль-Насрга» 1:0 эсебинде утулуп калган.
Бул оюнга байланыштуу улуттук кураманын башкы машыктыруучусу Штефан Таркович өз ою менен бөлүшкөн. Ал командасынын тактикалык жана физикалык жагына маани бергенин, оюндун жыйынтыгына маани бербегенин билдирген.
«Биринчиден, «Аль-Наср» клубуна бизди кабыл алып, расмий эмес беттешинин матчын өткөрүүгө уруксат бергени үчүн ыраазычылык билдирем.
Биздин футболчулар Европанын жана дүйнөлүк деңгээлдеги мыкты оюнчулар менен атаандаша алышат, алардын айрымдары УЕФАнын Чемпиондор Лигасында, Европанын эң мыкты 5 лигасында же Дүйнөлүк чемпионатта ойногон футболчулар. Бул оюн биз үчүн тактикалык жактан да, физикалык жактан да абдан баалуу тажрыйба болду. Беттештин жыйынтыгы биз үчүн маанилүү болгон жок»,-деген Ш. Таркович.
Ошондой эле, Таркович бул машыгууларды жана оюндарды оюнчулардын ысык аба ырайына ыңгайлашуусу жана дүйнөлүк чемпионатка тандоонун алгачкы оюнуна карата даярдык катары баалаган.
«Эң негизгиси, оюнчулардын жогорку нымдуулукка жана температурага кантип ыңгайлашканы болду. Биз Малайзияда биринчи беттешибизди өткөрө турган дүйнөлүк чемпионатка жолдомо алууга жакшы даярдануу үчүн бул шарттарда жетиштүү тажрыйбага ээ болушубуз керек. Январь айында өтүүчү Азия кубогунда да ушундай шарттар бизди күтүп турат.
Биз ошондой эле оюнчулардын физикалык жактан даярдыгын жана мындан ары кантип өнүгөөрүн карап чыгышыбыз керек болчу. Биз кызматташуунун туура жолун табышыбыз керек, оюнчулар биздин философиябызды түшүнүшү керек жана бул үчүн бизге убакыт керек. Биз команда менен ишибиздин башталышындабыз, экинчи машыгуу жыйынында чогуу төртүнчү беттешибизди жыйынтыктап, дагы эле таанышып жатабыз.
21 оюнчу жана 2 дарбазачы беттешке барып ойноого мүмкүнчүлүк алды. Мен алардын машыгуу процессине жана бул матчка болгон мамилесине кубанычтамын. Физикалык жактан оор болгон бул беттештен кийин жакшылап калыбыбызга келип, кечээ Бахрейнди 3:1 эсебинде жеңген Кувейт курамасы менен жакында келе жаткан беттешке даярданып жатабыз»,-деген Ш. Таркович.
#Улуттуккурам #БАЭ #футбол