Айтылуу Алайкуунун Ой-Тал айыл өкмөтүндөгү Султаналы Үркүнов атындагы айылдык маданият үйүнөн кабар алдык. Таланттууларды таптаган аталган маданият үйүнүн директору Тагайбаев Бейшеналы Төрөбекович менен таанышып, мындагы маданий иш-чаралардын аткарылышы, тоо койнундагы маданият үйүнүн көйгөйлөрү туурасында маалымат алдык.
Чыгармачылыктын чыйырына өмүрүн арнаган Бейшеналы Тагайбаев кесиби кыргыз тили мугалими, жан-дүйнөсүнө байыр туткан маданият чөйрөсүндө жуурулушуп, элдин руханий байлыгын арттырып, иштеп келүүдө. Дегенибиздей, Бейшеналы Төрөбекович аталган маданият үйүнүн директору болуп 2019-жылы дайындалган. Ага чейин аталган мекемеде көркөм жетекчи кызматын аркалаган. Аккордеон чертип, созолонто обон созуп далай кароо-сынактарга катышып, байгелүү орундарга татып келген.
Бул маданият үйүнүн имараты 1987-жылы курулуп, иштеп келген. Кийин дээрлик 20 жылдай аралыкта маданият үйү иштебей, кароосуз калган. 2007-жылы айыл өкмөт тарабынан ремонттон өткөрүлүп, ишке киргизилген. 2019-жылы бейөкмөт уюм тарабынан ремонттон өткөрүлгөн. Учурда мында үч кызматкер иштейт.
Булашбаев Туратбек көркөм жетекчи кызматын аркаласа, Кийизбаева Айгүл кенже тейлөөчү кызматында тер төгүп келет. Аталган маданият үйү 80 орундуу. Бардык маданий иш-чаралар дал ушул жерде өткөрүлөт. Учурда көрүүчүлөр залындагы столдор эски.
“Бизде көйгөй көп. Аны чечүүгө мүмкүнчүлүк чектелүү. Бирок, кол куушуруп отургандан алыспыз. Алдыдагы планым – маданият үйүнүн ички жасалгасына каражат табуу. Ошондой эле маданият үйүбүздө бир да улуттук аспаптар жок. Өзүмдүн жеке каражатыма эки аккордеон алдырганмын. Аны да көп жылдан бери эскилиги жетсе да пайдаланып келатабыз. Айыл өкмөт бизге интернет чубалгысын тартып берди. Кызматкерлерибиздин окшош улуттук формалары жок. Музыкалык аппаратурабыз бар. Аны маданий иш-чараларда колдонуп турабыз. Жакында айыл өкмөт тарабынан каражат ажыратылып, сахнанын көшөгөсүн жаңылап тиктирип, илип алдык. Ашкан каражаты жылытуу системасына жумшасакпы деп турабыз. Анткени, бизде кыш оор болгондуктан, залыбыз ысыбайт”, — дейт Бейшеналы Төрөбекович.
Айыл тургундарынын арасында да түрдүү таланттын ээлери арбын. Алар менен да иштешип, атайын топторду түзүп, аймактын атынан иш-чараларга катышып келишээрин айтат жетекчи.
“Талант өлбөйт демекчи, адамга берилген “чымынды” көмүскөдө калтырбай айыл арасында болсо да жайылтууга аракет кылуудабыз. Ыр-бийге кызыккан, Манасчылыкты мыкты өздөштүргөн, деги эле көөдөнүндө көзү бар, жүрөгүндө шыгы бар жаштардын келечегинин пайдубалы бизден башталат десем болот. Эл ичинде катылып жаткан өнөр ээлерин сахнага тартып, аларга шык-дем берип турабыз. Өзүңүздөр көргөндөй жолдун алыстыгынан, шарттын катаалдыгынан кээде чакырылган иш-чараларга катыша да албай калабыз. Айылдагы ар бир даталуу күндөрдө маданий-массалык иш-чараларды уюштуруп, шаңдуу өткөрүүгө аракеттерди көрөбүз. Ак элечек айымдардан түзүлгөн Шайыр апалар тобубуз бар. Алар майрамга көрк берип турушат”, — дейт Бейшеналы Төрөбекович.
Баарыбызга маалым болгондой, өткөн жылы маданият кызматкерлеринин айлык маянасы жүз пайызга жогорулаганы белгилүү. Айлыктын көтөрүлүшүнө кубанган мындагы кызматкерлер Өлкө башчыга рахматтарын айтып, кыргыз маданиятынын өсүп-өнүгүшүнө талыкпай эмгектене беришээрин билдиришти.
“Президентибиз Садыр Нургожоевичтин колдоосу менен айлыгыбыз жүз пайызга көтөрүлүп, маданият кызматкерлеринин маанайлары куунак. Ушул жылга чейин бийлик тарабынан бизге эч көңүл бурулбай келди эле. Акыркы планда калып калган болчук десем болот. Сиздерден пайдаланып Мамлекет башчыбызга чоң ыраазычылыгыбызды билдиребиз”, — дейт жетекчи.
Тоо элин аралап, гастролдоп барган артисттердин концерт коюп кетүүсүнө жардамдарын аябайт. Алардын билеттерин сатып, коопсуздук чараларын карап турушат.
“Бизге атайын уруксат кагазы менен келген артисттерге маданият үйүнүн эшигин ачып беребиз. Аларга жардамдашып да турабыз. Бирок, беш кол барабар эмес дегендей, кээде маданият кызматкери болсо да, маданиятсыз артисттер келген учурлар да болот. Бул маданият үйү элдики. Аны кастарлап, кийинки муунга өткөрүп берүү биздин милдет. Ошондуктан кээ бир маданиятсыздарга маданият үйүнүн эшиги жабык”,-дейт Бейшеналы Төрөбекович.
Н.ӨМҮРЗА КОВА , Ош–Ой-Тал–Ош