Кыргызда “жолуң шыдыр, жолдошуң кызыр болсун”- деген сөздөр кулакка жагымдуу, канчалаган жакшы жерлерде, кош колдой бата тилегенде жакыныңа, кайманага, бир тууганыңа кош тизелей олтура кала калайык жүзүнө сүрдүү телмире, коңур үнүң менен бата тилегенде бүтүндөй денең дирилдеген кан тамырың менен кошо, дүкүлдөгөн жүрөктөн тээп чыккан, каның менен кошо тилек ооматы да жолго, сапарга байланыштуу тура.
Ошондо өзүңчө сак боло сапарыңдын бейпил, кырсыктан сырт болсок экен деген тилектериңдин самоосунда жолдун камын көрөт турбайсыңбы. Жолду ошон үчүн ыйык сезимтал жүрөк аркылуу сезгенин өзүңдүн бейпилдигиңе шарт белем. Жолдун ыйыктыгы, ырыскысы, шыдыр болуусу да ушунда окшойт.
Мурда болсо жөө жалаңдай, ой улоо менен жолго кам көрсөк, анын шарты азыркыга такыр коошпогон тарых-тагдыры бар мезгил белгилери десек өз ордундай болчудай.
Азыркы учурда кымкуут машиналар, алардын ар биринде жүргүнчүлөр, кейип-кепчигени мындан көп сыяктуу. Өзгөчө жол тыгындары шаар ичинде соңку учурларда жанга жанчылган кейип-кепчүүлөрдү алып келүүдө. Азыркы мезгилде мындай көрүнүш жолдун азабы өлкөнүн булуң-бурчтарынын бардык тараптарында орун алганы жашыруун эмес.
Өлкө ичиндеги сапар тартуулардын дээрлик көпчүлүгү кара жолго байланыштуу экендигин эске алганда Ош-Кара-Суу жолунун стратегиялык мааниси өзгөчө орунда десек кеп уңгусунан бузулбайт болсо керек. Анткени кыймыл аталган жолдо тунү-күнү тынымсыз болот. Мында автоунаалардын турдүү маркаларын жолуктуруу деле кыйынга турбайт. Айтылган көрүнүш тээ союз убагында деле ушул калыбынан жазган эмес. Анда деле Ош–Кара-Суу жолу автоунаалардын кыймылынын молдугу менен эл оозунда тарых таржымалдуу айтылып келген. Көптөгөн ал мезгилдеги жүргүнчүлөр, учурдагы облустун аймагындагы Жалал-Абад тараптагы райондордун, Өзгөн-Кара-Кулжа райондорунун чарбаларынын оор жүк ташуучу машиналары, жүргүнчүлөрдү ташуучу автобустардын дээрлик бары Ош-Кара-Суу жолу аркылуу байма-бай сапар тарта турган. Көпчүлүк айылдыктар сапардан барганда тоо койнундагы айылдаштарына жолдогу жүргөндөрдүн, көргөн билгендерин дайыма узак аңгеме кура айтып түгөтө алышчу эмес. Ал убакта айылдан шаарга, өзгөчө, Ош-Кара-Суу шаарларына каттагандар деле аз болот эле. Ошондон улам ал учурдагы бизге окшогон тестиер балдарга, асти шаар жытын искебегендерге өтө кызыктуу боло турган. Ички туюмубузда алардын айткандары бизге башка элес тартуулачу.
Сүрөт «Т-Медианыкы»
Бул өткөн кылымдын 1970-жылдары болчу. Андан бери дээрлик 50 жыл сапар карытты. Андагы Ош-Кара-Суу жолунун тоому каршы-терши каттаган машиналарга ылайык азыркысынан тар, ошол мезгилдеги автоуналардын кыймылына ылайыкташкан экен. Кийин жылдан жылга автоунаалардын көбөйгөнүн эске алуу менен азыркысы салынган дешет.
Аталган жол 1980-жылдардын башында пайдаланууга берилсе керек. Ошондо жол курууда жаңы технологиялары пайдаланылганы жөнүндө да сөздөр айтылган. Ал тургай колхоздун машинасын башкарган айдоочулар Ош–Кара-Суу жолунун кооздугу, эки тарапка экиден багыттагы автоунаалар каттай тургандыгы, жолдун тегиздиги ортосунда гүлдөр, арчалар олтургузулгандыгы, суулар атылып өзүнчө эле фонтан экендиги жөнүндө, жолдун ортосундагы газонго түнкү жарыктар орнотулгандыгы жолдо жүрсөң, түнкүсүн күндүзгүдөй жарык экендиги туурасында көп аңыз кылып айткан жомокторун ал учурда көп укканбыз.
Көрсө бардык эле жолдор өз стандартына маанилүүлүгүнө, багытына карай салыныш керек окшойт. Бирок, ошол учурдагы эң үлгүлүү жол, ошондой функцияларда кыймылдын шартына карай курулганы Ош-Кара-Суу жолу экендигине азыр ынанып турбайбызбы. Анан калса Ош, Кара-Суу шаарларынын өткөн мезгилдеги стратегиялык мааниси да, ошону талап кылган көрүнөт.
Ал мезгилде Ош да, Кара-Суу да өнөр жайлуу болуп, өндүрүлгөн продукцияларды, айыл чарбасынан, дыйканчылыктан алынган чийки заттарды сыртка жөнөтүүгө ылайыктуу шарттардын бардыгынан аталган жолдун курулушунун мааниси чоң экендигине ынансак болот. Анткени Ош, Кара-Суу шаарларында темир жол түйүндөрү бар эле. Союздун чар тарабынан келген бардык товарлар, жүктөр, эл керектөөчү азык-түлүктөр Ош, Кара-Суу темир жолуна түшүп, андан ары керектүү жерлерге дареги менен жөнөтүлчү тура.
Ошондон бери Ош–Кара-Суу автоунаа жолу эл үчун көп багытта кызмат кылып келет. Кийинки эки каршы-терши багыттагы жаңы жолдун деле эл кызматына коюлганына 40 жылга жакын чамадагы убакыт болуп калган тура. Кийин заман өзгөрүлгөнү, коом башка нукка бурулганы менен андагы СССР деген улуу өлкө ыдыраганда Кыргызстан да эгемендүү, өз тагдырын өзү чечкен мамлекетке айланган. Ошондон бери казаныбызга карап аш кайнатып, төшөгүбүзгө карап бут сунуп келебиз. Андан бери деле 32 жыл өтүп кетти. Экономикабызга байланыштуу Ош-Кара-Суу жолуна ушунча жыл өтсө да тийиштүү көңүл бурулбай, ремонт иштери жүргүзүлбөй, жолдун абалы начарлагандан начарлоодо. Жолдо Оштон Кара-Сууга карай, Кара-Суудан Ошко карай автоунаалардын кыймылы мурунку жылдарга салыштырмалуу оголе көбөйгөн. Жолдон ар түрдүү маркадагы оор жүк ташыган, жүргүнчү ташыган машиналарды көрүүгө болот. Ошондой учурда аталган жолдун азыркы абалы заман талабына жооп бербей келүүдө. Баягы Союз мезгилиндеги жолдун көрктүү көрүнүшү жок. Анан калса жолдун чыныгы ээси КР транспорт жана коммуникациялар министрлигиби же Кара-Суу райондук бийлигиби, азыркыга чейин колун-колуна чаап жолдун келечеги жөнүндө өз оюн айткан аталган бийликтердин үнү угулбайт. Жол болсо начарлагандан начарлап баратат. Каттамдын Оштон Кара-Сууга чейинки абалы начар. Оюлган жерлери жамала берип тамтыгы калбаган. Жолдун ортосундагы газон эрте жазда саргайган, ошол бойдон кароосуздуктан кургап турат. Жол ортосундагы тилкеге эгилген декоративдүү өсүмдүктөр суунун жоктугунан эбак куураган, мурун гүлдөп, сүйкүм түрдүү ыраңдарды берген гүлдөрдүн бири дагы жок. Баштагы суу жүгүртүлгөн суу түтүктөрүн да дат басып, эбак коррозияга учурап, темир турбалар чирип, керектен чыккан. «Айта берсе арман көп» дегендей, өлкөбүздө кара жолдон башка эмне каттамыбыз бар дейсиң. Өлкөдөгү бардык элдүү түйүндөргө сапар алсаң, кара жолдор гана пайдаланылат.
Жол өлкөнүн күрөө тамыры болгон соң, өзгөчө маанидеги жолдого зор ынтаа менен көңүл багытын берүү жылдан-жылга талаптуу бойдон калууда.
Канткен менен Ош-Кара-Суу жолун оңдоп-түзөөдөн өткөрүү учурдун зарыл милдеттеринен болуп калууда. Ош өлкөбүздүн экинчи борбору катары, түштүк регионундагы эң чоң шаар. Ал эми Кара-Суу республикадагы элинин саны боюнча эң чоң район болуп саналат. Кара-Суу шаары Орто Азиядагы үлкөн базары менен атагы далайга угулган чөлкөм. Базары тээ өткөн кылымдарда деле соода-сатыгынын байманалуу экендиги менен эл оозунда азыркыга чейин айтылып келет.
Ошондон улам Кара-Суу базарында миңдеген ишкер соода-сатык кылышат. Он миндеген кардар аларман катары бир күндө ары-бери кирип чыгат. Ушундай көп кыймылды тейлөө үчүн жол керек экендиги бештен белгилүү болуп турбайбы. Бул көрүнүш адам кыймылы менен коштолгондуктан күн сайын азыркы шартка карап алганда Ош–Кара-Суу жолунда миңдеген автоунаалардын кыймылы суткалап токтобойт.
Заман талабынан караганда жолдун азыркы турушун эл аралык стандартка шайкеш келтирүү зарылчылыгы жетилди көрүнөт. Мындай талаптар жөн жерден чыга калган жок чыгаар. Бул зарылдык учур талабы менен коштолуп олтурат. Азыр Кыргызстан дүйнө жүзүндөгү эгемен өлкөлөрдүн бири. Биздин жашоо-турмушубузду дүйнө жүзү баамдап, байкап турган шарттан алганда Ош-Кара-Суу жолу өлкөнүн азыркы шартка ылайык жолуна айланышы зарыл. Аталган жолдун Ош шаарынан Кара-Сууга чейинки аралыгында автоунаалардын кыймылынын жыштыгына жолдун чен өлчөмүнүн абалы жооп бербей калганы ушундай зарылчылыкка түртүп олтурат.
Ош-Кара-Суу жолунун азыркы абалынын мындай болушу тейлөө мөөнөтүнүн эбак жеткендигинен кабар берет. Сөз учугу уланган жолдун пайдалануу мөөнөтү эбак эле бүткөндүгүнө карабастан азыркыга чейин анча мынча ремонт иштери жүргүзүлүү менен колдонулуп келүүдө. Жолдун Ош шаарынан чыга беришинен тарта Кара-Суунун кире беришине чейинки акыбалына катуу көңүл буруу менен жаңы жол куруу керектиги эбак бышып жетилген. Эгер жаңы жол курууга каражат жетишпесе мынтип карап олтура бербей, жолду акчасы бар инвесторлорго сунуштап, курулган жолду акы төлөп жүрүүчү жолго айландырбаса айтылган проблемалардан чыгуунун жолдорун мамлекет жакынкы жылдарда караштыра албайт окшойт. Анын үстүнө өлкөнүн аймагындагы бардык эле жолдордун абалы өтө оор. Райондорду облус борборлору менен байланыштырган жолдордун деле акыбалы оңолуп кеткен жок. Жыл сайын жамай берип, бодурлуу, өңгүл-дөңгүл жолдорго айланган. Мунун баары каражаттын тартыштыганан жаралган көйгөйлөр. Каражаттын тартыштыгына шылтап коюп эле отура берген менен да болбойт. Иш билги, менеджер жетекчилер ар кандай булактардан каражат таап, оңдойм деген адам оңдоп салаар эле. Эми кандай болбосун Ош–Кара-Суу жолун жакынкы аралыкта оңдоонун, жаңы жол салуунун зарылчылыгы бышып жетилгенин эске алганда күтүп олтуруудан майнап чыкпасы айдан ачык. Эми мындан ары автоунаалардын каттамы аталган жолдо көбөйсө көбөйөт, бирок, азайбайт болушу керек. Дүйнөлүк карым-катнаштын күчөп турган шартындагы эл кыймылын, соода-сатык иштерин Кара-Суу шаарындагы Кара-Суу базары Орто Азия чөлкөмүндөгү зор теңдешсиз дүң соода түйүнү экендигин эске алганда, сөз болгон жолдун абалын оңдоо, эл аралык стандартта жаңы жол салууну колго алуу өтө зарыл экендигин кармануубуз керек.
М. Жуманазаров