Өзүңүздөр билгендей Кыргызстан акыркы эки жарым жылдан бери инвестицияларды тартууга өзгөчө көңүл буруп келет. Бул иш Президент Жапаровдун жеке көзөмөлүндө.
Мамлекет башчысы ар дайым «инвесторлорго жагымдуу шарт түзүү керек» деген талапты бардык мамлекеттик органдарга, тийиштүү мекемелерге коюп келет, деп жазды президенттин басма сөз катчысы Эрбол Султанбаев Фейсбуктагы баракчасына.
Анын жазганына караганда, өлкөгө түз инвестицияларды тартуу иши оңой эмес. Ошол эле учурда бүгүнкү күндө тилекке каршы, инвесторлордун өлкөбүздө ишмердүүлүгүнө жолтоо болгон учурлар бар.
Эрбол Султанбаев, Садыр Жапаровдун басма сөз катчысы
«Мисалы. акниет эмес бир жаран кармалды. Ал өзү бизнесмен жана жогорку даражалуу аткаминерлер менен байланышы бар экенин айтып, керек болсо силерди жок кылам деп коркутуп, инвесторлордон опузалап ири өлчөмдө акча талап кылган.
Бул маалымат Президент Жапаровго жеткен жана ал териштирүү тапшырмасын берип, анын жыйынтыгында бул жаран кармалып, камакка алынды. Андан ары тергөө иштери жүрөт»,-деп жазган Э. Султанбаев.
Ошондой эле Эрбол Султанбаев президент Жапаров дагы бир жолу Кыргызстанда «кол тийбестер» жок экендигин эскертерин, өлкөдө кимде-ким инвесторлорду жогорку даражалуу байланыштары менен коркутуп-үркүтүп, алардын ишмердүүлүгүнө жолтоо болсо, инвесторлорду жеке кызыкчылыгына пайдаланып, алардан мыйзамсыз акча каражатын талап кылса — дароо камалат, -деп жазды.
«Өлкө башчысын адаштырып коебуз же ал эч нерсе билбей калат» дегендер болсо, алар катуу жаңылышат, деп белгилейт Э. Султанбаев.
«Президент Жапаров УКМК, ИИМ жана башка жеке булактарынан ыкчам маалыматтарды дайыма алып турат. Учурда Мамлекет башчысында дагы кимдер «жогорку байланыштарына» жамынып инвесторлорду коркутуу, акча талап кылуу менен алектенип жаткандыгы тууралуу маалыматтар бар. Арам ойлорун ишке ашырам дегендер үчүн абактарда орундар жетиштүү»,-деп жазат Э. Султанбаев.