Министрлер кабинетинин төрагасынын орун басары жана Улуттук коопсуздук боюнча мамлекеттик комитеттин төрагасы Камчыбек Ташиев менен Тажикстандын атайын кызматынын башчысы Саймумин Ятимов кечээ, 2-октябрь күнү Баткен шаарындагы эки тараптын жолугушуусунан кийин биргелешип маалымат беришкен. Ташиев менен Ятимовдун кабыл алынган №44 протокол боюнча айтышканын айрым ЖМКлар жазып чыгышты.
УКМКнын төрагасы Камчыбек Ташиев аталган протокол боюнча төмөндөгүлөрдү айтты.
«Протокол бардык чек ара маселелерин чечүүгө негиз болуп берет. Кудай буюрса, жакында мамлекеттик чек араны толугу менен тактоо боюнча акыркы чечимди кабыл алабыз. Чечимдерди даярдоого катышкан бардык командаларга ыраазычылык билдирем.Мындан сырткары, биздин комиссиялар тынымсыз иштеп, жакын арада акыркы чечимдерди кабыл алат деп чечтик. Кудай буюрса, бүгүнкү кабыл алынган чечимдер чек ара тынч, туруктуу болуп, элибиз түбөлүк достукта, ынтымакта жашай турганына негиз болду»,-деген К. Ташиев.
Тажикстандын УКМКсынын башчысы Саймумин Ятимов буларды айткан.
«Биз бул протоколго кол коюу менен аны максаттуу жана конструктивдүү түрдө кадам сайын ишке ашырабыз деп ишенебиз. Эң кыска мөөнөттө биз фундаменталдык документтерге келебиз. Бул протокол биздин талыкпаган эмгегибиздин, эки тараптуу мамилелеребиздин жана элибиздин жерибизде тынчтыкты, стабилдүүлүктү жана өнүгүүнү камсыздоого болгон эркибиздин натыйжасы экендигине сыймыктанабыз»,-деген С. Ятимов.