Кечээ, 5-октябрь күнү Ош шаарында “Joop Bar” аттуу жумуш издөө боюнча инновациялык платформанын ачылышы болуп, 170тен ашуун жумуш издеген жаштар менен 25 жумуш берүүчү компаниялар бир аянтчада чогулуп, жаштар “JoopBar” платформасы аркылуу тандаган кесиптеги бош орундарга тапшырды. Бул тууралуу иш-чаранын уюштуруучулары билдирди.
Маалыматка караганда, жумуш жана кесип жарманкеси өтүп, жумуш издеген жаштардын дээрлик көпчүлүгү «Мбанк», «Жаннат» мейманканалары сыяктуу ишканаларга жумушка орношуу баскычтарынан акыркысы болгон интервьюга өтүшкөн.
Жарманкеге катышкан “Forester” ишканасынан кадрларды тандоо бөлүмүнүн адиси Айбүбү Түркбаева «JoopBar» платформасы тууралуу өз оюн ортого салды.
“Бизде 200дөн ашык жумушчу бар жана биз жумушчуларды ар дайым издегендиктен жумушчу табуу кыйынчылык жараткан учурлар көп болот. «JoopBar» тиркемесин бүгүнкү иш-чарада ачып, колдонуп көрдүм. Ачык, колдонгонго оңой, бизге ылайыктуу жумушчуну тапканга бардык опциялар бар экен жана телефондо колдонулгандыктан көп адамга жеткиликтүү. Кыскасы менин жумушумду абдан жеңилдетет экен, рахмат тиркемени жасагандарга»,-деди А. Түркбаева.
Иш-чарада жумуш берүүчүлөр жумушка орношууда керектүү талаптар тууралуу маалымат менен бөлүшүп, жумуш издөөчүлөр жөндөмдөрүнө жана алдыга койгон карьералык пландарына жараша ыңгайлуу кесип тандоо мүмкүнчүлүгүнө ээ болушту.
Жарманке Ага Хан Фондунун USAID тарабынан каржыланган “Жергиликтүү өнүгүү” долбоору тарабынан уюштурулган.