Ош облустар аралык балдардын клиникалык ооруканасынын Көз микрохирургия бөлүмү тууралуу сөз кылабыз. Аталган бөлүм учурда 40 керебетке ылайыкташкан. Балдардын көзүн дарылаган бөлүмдө үч жогорку даражадагы, бирөө 1-даражадагы жана калганы 2 даражадагы врач офтальмологдор жана тажрыйбалуу медицина кызматкерлери эмгектенишет. Врач-офтальмологдор чет мамлекеттерге барып квалификациясын жогорулатып турушат жана илим менен техниканын жетишкендиктерин өз иштеринде колдо-нуп, эмгектенишет. Аталган балдар ооруканасынын Көз микрохирургия бөлүмүн 2013-жылдан бери жогорку даражадагы врач-офтальмолог Азизова Айгүл Бектемировна жетектеп келет. Сөз аталган бөлүм жөнүндө болмокчу.
Көз -жашоонун күзгүсү
«Жакында биздин бөлүмдө баланын көзүнө «хрусталик» коюу операциясын ишке ашырдык. Көп жылдардан бери биз балдардын көзүнө операциянын 9 түрүн жасап келебиз. Алардын ичинде оор операциялар бар. Ал эми катарактага операция жасачубуз, бирок хрусталик койчу эмеспиз. Жакында эле эки мектеп жашындагы кыздардын көздөрүнө хрусталик коюу операциясы ийгиликтүү өтүп, жыйынтык жакшы. 6 жаштагы кыздын эки көзү тең тубаса катаракта менен ооруп келген ага операция жасап, хрусталик койдук. Кийинкиси 11 жаштагы кыз көзүнөн травма алып, 7 жылдан бери көзү катаракта менен жүргөн экен. Бул кызга да операция жасап, хрусталик койдук. Кыздардын операция болгонуна 10 күндөн ашты, кечээ келип көрүнүп кетишти, көрүүсү улам көтөрүлүп жатат. Мындан ары да ушул боюнча ишти колго алалы деп турабыз»-дейт Айгүл Азизова.
Бөлүмдүн жетекчиси Айгүл Азизованын айтымында, ушул жылдын май айында салмагы жетпей төрөлгөн балдардын көзүнүн саламаттыгын текшерүүчү жаңы аппарат алышкан. Ушул боюнча учурда бөлүмдүн бир дарыгерин Казакстандан окутуп даярдап, сертификат алууга аракет кылып жатышат. Жаңы аппарат офтальмоскоп делип, 900 грамдан баштап салмагы жетпей төрөлгөн ымыркайлардын көзүнүн артынан бери текшерип, дартын так аныктап, көзүнүн көрүүсүн убагында сактап калууга чоң мүмкүнчүлүк түзүлдү.Аппарат ишке кирсе түштүк облустарындагы салмагы жетпей төрөлгөн балдардын көзү толук көзөмөлдө болот.
Азыркы учурда түрдүү факторлордон улам, эки жаштан жогору көзүнүн көрүүсү төмөн балдарды көп алып келишет. Аларга дары-дармекке караганда аппараттар менен дарылоого басым жасалат, бул баланын көрүүсүн көтөрүүгө кыйла ыңгайлуу. Учурда дагыжаңы аппараттарды алып келүүгө буюртмалар берилип жатканын кошумчалайт Айгүл Азизова.
Мектеп жашындагы балдар көп келишет
Бөлүм башчынын айтуусунда, бөлүмгө мектеп жашындагы балдар көп кайрылышат. Көз-сезүү органдарынын эң негизгиси экенин айткан Айгүл Азизова кээде кенебей жүрө берип, баланын көзү жарага айланып кеткенде алып келишээрин айтат. Себептери: баланын каралбай калуусу, көздү туура эмес дарылоо жана башка себептер менен көздүн чечекейи жабыркайт. Быйылкы жылы эле көзүнө мык сайылган, айнек сайылган балдарды алып келишкен, дарыгерлер алардын көзүн сактап калышкан. Баланын көз оорусу, көздүн бузулушу- ички органдардын же системалардын кандайдыр бир оорусу менен байланыштуу да болот.
Борбордук жана четки нерв системасынын, жүрөк-кан тамыр системасынын оорусунда, ууланууда, зат алмашуу, ички секреция бездери бузулганда, ошондой эле көзгө жакын органдардын ооруу процессинин таралышынан көздө өзгөрүүлөр байкалат. Эне боюнда бар кезинен жугуштуу оорудан алыс болуусу абзел. Адистин айтымында, көз ооруларынын тубаса, кийин пайда болгон, катуу кармаган жана өнөкөт түрү болуп, бир же эки көз тең оорушу мүмкүн. Көз ооруларына жалпы организмдин оорулары: мисалы, жугуштуу оору, борбордук нерв системасынын жабыркашы, витамин жетишсиздиги, көздүн урунуусу, күйүүсү, чаңдын көзгө түшүшү, түрдүү химиялык, физикалык таасирлер себеп болот. Бул ооруларды өз учурунда дарылоо көрүүнү сактап калууга өбөлгө берет. Дарылоону оорунун себебине жана мүнөзүнө жараша көз врач дарылайт. Күн тартибин, өздүк гигиенаны сактоо, мүнөздөп тамактануу, убагы менен эс алуу зарыл. Жугуштуу оорулардан сак болуу керек. Көздүн айрым оорулары жугуштуу болот. Ал шейшеп, сүлгү, бет аарчы жана башкааркылуу жугат.
Баланын көзү ооруганда же жабыркаганда врач сунуш кылган дарыны жакындары сыйпайт же куят. Ошондуктан алар дарылоо процедураларын аткарууну билгени оң.
«Ата-энелерге айтар элем, баланын саламаттыгы ар кандай нерседен жогору туруу керек. Баланын көзүн өз алдынча дарылап күчөтүп албай дароо эле дарыгерге учурунда кайрылышса. Ата-эненин кенебей жүрө бергенинен кээ бир балдардын көзүн жара басып кетет. Канчалык кыйын болбосун, көрүүсүн сактап калууга бар күчүбүздү жумшайбыз. Кээде кенебеген апаларды урушуп жиберген учур болот»,- дейт Айгүл Азизова.
Балдардын эң ыйык, эң азиз делген көзүн дарылап, көрүүсүн сактап калган врач-офтальмологдорду эл баатырлары десек жарашат. Ооруканада дарылоонун алгачкы кадамы андагы түзүлгөн шарттан башталат эмеспи, бул жаатта, биз сөз кылган бөлүмдө балдар үчүн каралган шарттар талаптагыдай. Врач-офтальмологдор, башка медициналык кызматкерлер жетиштүү. Бөлүмдүн врач-офтальмологдору маал-маалы менен аймактарга чыгып, балдардын көзүнө көзөмөл жүргүзүп турушат. Облус борборлорундагы оор операцияларды барып жеринен жасап, жандандыруу бөлүмүндөгү балдарга да көзөмөл жүргүзүп турушат.
Бөлүмдүн тарыхы
Ош облустар аралык балдардын клиникалык ооруканасынын Көз микрохирургия бөлүмүнүн тарыхы тээ 1971-жылдан башталат. Ошол жылы 20 орунга ылайыкташып ачылган бөлүмдүн алгачкы жетекчиси, тажрыйбалуу врач-офтальмолог М.Комарова болгон. Мына ошондон бери бөлүмдөгү керебеттин саны көбөйүп, азайып отуруп, ушул күндөрү 40 орунга ылайыкташкан.
Жарым кылымдан ашуун тарыхы бар Ош облустар аралык балдардын клиникалык ооруканасы Кыргызстанда эле эмес Орто Азиядагы медициналык мекеме катары мааниси чоң. Дегеним, ооруканага Кыргызстандын түштүк облустарынан, кошуна мамлекеттердин Ошко жакын аймактарынан ооруган балдарды алып келишет.
Гүлбара Мамазияева, Кыргызстан Журналисттер кошуунунун мүчөсү