Ушул жылдын 4-октябрь күнү Бишкек шаарындагы «Блондер Паб» ресторанындагы атышуу учурунда «Мыйзамдагы ууру» Камчы Көлбаев өлтүрүлгөнүн УКМКнын маалымат кызматы билдирди. Анткени ал УКМКнын атайын даярдыктагы бөлүгүнө куралдуу каршылык көргөзгөн. Кылмыш дүйнөсүндөгү Көлбаев – Камчы Асанбек, «Коля кыргыз» деген аттары менен белгилүү болчу. Анын өлтүрүлүшүнөн кийин, ага байланышы бар башка «каралар», мыйзамга баш ийе тургандыктарын айтып, криминалдык көз караштарынан кайткандарын ачык айтып чыгышты. Ошентип бул окуялар коомчулукта катуу талкуу жаратып, мамлекеттин аларга каршы күрөшү күчөгөнүн көрсөттү.
«Коля кыргыз» кантип өлтүрүлдү?
УКМК кримтөбөл Камчы Көлбаев Бишкектеги кармоо операциясынын жүрүшүндө жок кылынганын 4-октябрда расмий маалымдады. Маалыматка ылайык, ал күнү Бишкектеги Blonder pub эс алуу жайында кримтөбөлдү кармоо операциясы жүргөн болчу. Анын алкагында Көлбаев жана анын жансакчылары күч органдарына ок аткан. Натыйжада Көлбаев жок кылынган.
49 жаштагы Камчы Көлбаев Кыргызстанда кылмыштуу топтун жетекчиси катары Ички иштер министрлигинин (ИИМ) каттоосунда турган.
2012-жылдын декабрында «кылмыштуу топ түзгөн, курал жана маңзат сактаган, бийлик өкүлүнө күч колдонуп, адам уурдаган» деп айыпталып, камалган.
Ошол жылы ал мекенинде “кылмыштуу топ түзгөн, курал жана баңгизат сактаган, бийлик өкүлүнө күч колдонгон жана адам уурдаган” деген айып менен үч жылга соттолуп, 2014-жылы бошонуп чыккан.
УКМК Көлбаевди 2020-жылы октябрь айында кылмыштуу топ түзүүгө айыптап кармаганын билдирген. Бирок төрт айдан кийин тилкат менен абактан чыккан. Атайын кызмат 250 миллион сомдон ашуун кылмыштуу кирешени адалдоо фактысы боюнча Көлбаевге карата иликтенип жаткан иштин алкагында анын туугандары мамлекетке 49,6 миллион сом которгонун билдирген.
Ал эми АКШнын бийлиги Көлбаевге эки жолу санкция салган. 2011-жылы «чет элдик баңгизат соодасынын анабашы» жана 2012-жылы «эл аралык уюшкан кылмыштуу дүйнөнүн өкүлү» же мурдагы советтик республикалардан чыккан кылмышкерлердин көзүрлөрү кирген «Агайиндер чөйрөсү» тобуна мүчө деп айыптаган.
Буга чейин УКМК төрагасы Камчыбек Ташиев Кыргызстанда криминалга каршы чечкиндүү аракеттер жүрөрүн белгилеп, кылмыштуу топторго мыйзам бузбоого жана өлкөдөн чыгып кетүүгө чакырык таштаган болчу.
«Каралардын» «кадырынан» баш тартышы
Кылмыштуу дүйнөнүн өкүлдөрүнүн өзүнүн «ыйык» статусу бар экени баарына белгилүү. Кыргызстандагы криминалдардын анабашы делген «Коля Кыргыздын» өлтүрүлүшү менен ат тезегин кургатпай кылмыштуу дүйнөдө өзүнчө макамга ээ болуп жүрүшкөн криминалдар өз статустарынан биринин артынан бири баш тарта башташты.
Алгачкылардан болуп «Сакал» каймана ат менен белгилүү Улан Токтосунов, «Женго» макамы менен белгилүү Кадыр Досонов макамдарынан баш тартканын айтып чыгышса, кийин Камчы Асанбектин уюшкан кылмыштуу тобунун Ош шаарындагы «смотрящийи» Алмаз Эрмекбаев, ушул эле топтун Нарындагы мүчөсү Нурлан Омокеев, Асанбектин күзөт кызматынын башчы Улан Барчекеевдер бийликти колдоп, мыйзамды бузбастыгын айтып, видео кайрылуу жасашты. Мындан аз өтпөй, Көлбаевдин уюшкан кылмыштуу тобунун Талас шаарындагы «смотрящийи» делген «Тайсон» каймана аты бар жаран УКМК тарабынан кармалды.
Сооттолгон автоунаалар, алтын, бриллианттар менен шөөкөттөлгөн 500 миң доллардык таажы: Камчы Асанбектин 1 млрд долларлык мүлкү камакка алынды
УКМК 9-октябрда Камчы Көлбаевге жана жакын туугандарына таандык делген мүлктү коомчулукка көрсөттү. Анда ага таандык делген 500 миң долларлык таажы, Ысык-Көлдүн жээгиндеги пансионаттар, эс алуу жайлары, жер тилкелери, жашаган үйү, Бишкектеги көп кабаттуу үйлөр, батирлер, сооттолгон унаалар, 60ка жакын унаалары бар экени белгилүү болду. Булардын жалпы баасы 1 млрд долларды чамалай турганы айтылып, ал мүлктүн баары камакка алынганы маалымдалды.
Ага улай эле «Мадина» базарынын кожоюну, экс-депутат Турсунтай Салимов, Кыргызстандын грек-рик күрөш федерациясынын вице-президенти Акрор Иминовдор Көлбаевдин кылмыштуу тобун каржылаган деген шек менен кармалышты. Ага улай эле жеке ишкер Олег Подобедов да үйүнөн жана кеңсесинен ок-дарылар табылып, кармалышты.
Мындан мурун Камчы Асанбектин кылмыштуу тобунун ондогон мүчөсү Оштон кармалып, «мыйзам бузбастыгын» айтып чыгышкан.
Криманалга каршы күрөш күчөдү
5-октябрь күнү Токмок шаарындагы УКМКнын жаңы оңдолгон имаратынын ачылышында сүйлөп жатып, УКМКнын төрагасы Камчыбек Ташиев, мындан ары өлкөдө «мызамдагы ууру» деген түшүнүк болбостугун, мыйзамга каршы иш кылгандар катуу жазаланаарын эскертти.
«Кечээ жок кылынган кримтөбөлдүн жанында жүргөндөр коомго каршы баш көтөрүүгө аракет жасай турган болсо же мыйзамсыз иш-аракеттерге барса, мыйзамдын негизинде катуу жазаланат. Мен эскерткен нерсени аткарам. Криминалдык элементтерге кайрылып жатып, аларга мыйзам бузбоо тууралуу эскертем. Биздин өлкөдө эч кандай «мыйзамдагы ууру», кылмыштуу топтордун лидерлери болбойт. Эгер жаңы лидерлерин шайлап, жаңы топ түзгөнгө аракет кылышса, катуу жазалайбыз», – деди К.Ташиев.
Ошентип «мыйзамдагы ууру» жана ага тиешеси бар делген уюшкан кылмыштуу топтордун «мыйзамга каршы иш кылбайм» деп видео кайрылуу жасашы, Коля Кыргыздын кылмыштуу тобунун мүчөлөрүн каржылаган деген шек менен кармалган фактылар мамлекеттин «караларга» каршы масштабдуу иш баштаганын айтинеледи.
Криминалдык топтордун анабашчылардын атын алгачкылардан болуп ачык атап, кылмыштуу топтордун активдүүлүгү байма-бай билдирип турган, калк арасында Комиссар Катани наамы менен белгилүү, мамлекеттик ишмер, милициянын оставкадагы генерал-майору Өмүрбек Суваналиев, Камчы Көлбаевдин «каралар» дүйнөсүндө кандай империя түзүп алганы, кылмыштуу топтор менен күрөшүү үчүн эмне иштер жасалышы керектигин медиаларга берген интервьюсунда айтты.
«Кыргызстанда эки адамдын башы бириксе эле Камчы Көлбаев боюнча айтып жатышат. Бул Кыргызстанда кылмыштуу топтор бар, Көлбаев «мыйзамдагы ууру» аталып кандай деңгээлге жеткенин айгинелейт. Негизи ушундай анализ берсе болот. Бирок, УКМКны ала турган болсок, бул катардагы эле операция. Оор кылмышка шектелген адамга атайын топ менен барат. Атайын топко каршылык көргөзгөндөргө жок кылынат. Бул классика. Дүйнө жүзүндө ушундай. Криминал ликвидация болгондон кийин эң оор этап башталат. Бүгүн күндө Көлбаев абдан чоң мафия түзүп койгон. Бүт бардык жагынан. «Каралар» дүйнөсүндө өзү жалгыз монополист эле. Эми бул чөйрөдө таасир талашуу болот. Ишкерлердин артындагы «каралардын» мүлктөрү бар аларды таап чыгыш керек. Баңгизат деген бар, ошону аныкташ керек», -дейт Суваналиев.
Министрлер кабинетинин төрагасы Акылбек Жапаров 11-октябрь күнү «Фейсбукта» баракчасына билдирүү жазып, эл өзү «карамын» дегендерди жергиликтүү милиция жана жогорку бийликке кабарлап турса, маселенин калганын алар чечерин жазды.
«Чет өлкөдөн келген инвесторлор, карапайым калкыбыз, жөнөкөй бизнесмендерибиз үчүн. Кыргызстан бейиштин төрүндөй эле болот. Демократия, сөз эркидиги мындан да өркүндөйт. Мындан ары криминал деген түшүнүк болбойт. Ар бир айылдагы мен «чёрныймын» дегендерди эл өзүңөр жана жергиликтүү милиция жогорку бийликке жеткирип турсаңар болду. Калганы биздин ишибиз»,-деп жазды А.Жапаров.
Расмий маалыматтарга ылайык, бүгүнкү күнгө чейин 1199 адам уюшкан кылмыштуу топтун мүчөсү катары ИИМдин каттоосунда турат. Алар Камчы Көлбаевдин, Азиз Батукаевдин, Алмаз Бокушевдин тобундагылар болуп эсептелет.
2022-жылы августта Сербия өлкөсүнүн борбору Белград шаарында жайгашкан Numbeo сайты 142 өлкөдөгү криминалдын деңгээлин аныктаган. Анын ичинде Кыргызстан кылмыштуулук күчөгөн 50 өлкөнүн катарына кирип, 36-орунду ээлеген.
Нуркамил Мамажунус уулу