Асылкан Бөрүбаев -атына заты жарашкан асыл адам эле дешет аны билгендер. Ал эми ал кишинин жакын тууганы, Ош шаардык билим берүү бөлүмүндө иштеп кеткен, маркум Тойгонбаева Шаимгүл Солтобаевна мынтип эскерди эле.
Ак көңүл, кишиликтүү жан эле
Асылкан Бөрүбаев өтө эле эстүү, ак көңүл, кишиликтүү жан эле. Аны жакын тууганым катары көп эстейм. Ушундай учурлар болот, кээде андай ой чабыттарга бир жолу сүңгүп кирип кетем. Аны билгендер атына заты жарашкан асыл адам эле деп калышат. Ошолор катары Асылкан Бөрүбаев байкем жалаң жакшы сапаттары менен менин да эсимде калды. Аны эскерүү мени жаштык курагыма бир кайрып алып барат.
Тагылган кызматына байланыштуу Фрунзеде да, Ошто да иштеп жүрдү. Атам Солтобай Асылкан байкем жөнүндө зор сыймыктануу менен сүйлөчү. Туугандарына болгон өзгөчө мамилесин, камкордугун кантип унутайын. Эмгек өргүүсүнө келгенде атам менен бакка төшөк салдырып, бакылдашып черлери жазылганча сүйлөшчү. Атам Асылкан байкем менен тууган-урук жөнүндө аркы беркини айтып, көп акылдашаар эле. Айылга келсе өзү сөзсүз чакыртып, меймандап анан узатчу.
Сегизинчи класста окуп калгам. Каникулдан Ысык-Көлгө эс алып келаткан мезгилде Фрунзеде Асылкан байкемдин үйүндө болдум. Ошондо Асылкан байкемдин уулу Алтай онунчу классты алтын медаль менен бүтүрүп, окууга келген экен. Биз Таласта Алтай байкемдин орто мектепти алтын медаль менен бүтүргөндүгүн угуп сүйүнүп жүргөнбүз. Ал эми Асылкан байкем болсо, уулунун мектепти бүтүрүп окууга келгенине, эми айылда ата-энеси жалгыз каларын айтып, ойлонуп да, өкүнүп да отурган экен.
Ал ошентип аябай кызууланып алган. Атама сиз да Алтайга айтыңыз, айылдагы чоң ата, чоң энесине кетсин, окуусун сырттан улантсын деп жатты. Атам болсо, койсоңчу Бөкөмдөргө биз деле каралашып турабыз. Карындашым Кымбаттын балдарынан бирин киргизип берелик.
Быйылкы окуу жылында Талас өрөөнүнөн бир Алтай алтын медаль алууга жетишкенин угуп, жетине албай сүйүнүп турабыз. Бул балаңдан бир нерсе чыгат. Окуткан мугалимдери да Алтайдын зээндүүлүгүн айтып, деп жатышат деп калды. А Асылкан байкем болсо, атамдын айткандарына деле макул болбой, баласын айылга кет, сырттан оку, үйдөн чоң ата, чоң энеңди бак деп жатты.
Көрсө, Асылкан байкем ата-энесин айылда жалгыз калтырганына элден уялып, намыс кылып жатыптыр. Алтай байкем болсо кирүү экзамендерин бешке тапшырып, окууга өтүп кетти. А Асылкан байкемдин эси-дартында айылда калган ата-энеси турду. Кийин кемпир-чалды кышкысын үйүнө алып келип, жайкысын кайра Таласка көчүрүп жүрдү.
Асылкан Бөрүбаев кызматка байланыштуу Оштогу «Ленин Жолу» (азыркы «Ош Жаңырыгы») гезитинде башкы редактор болуп иштеп, мында жашап калды. Мен да орто мектепти аяктап, байкемдин үйүндө жүрүп окудум. Окуунун шылтоосу менен ал кишилер менен бирге туруп, аралашып калдым.
Асылкан байкем мен үчүн да сөзсүз убакыт таап, өз кызындай камкордукка бөлөр эле. Кеч күз түшөрү менен айылдагы чоң ата, чоң энемди Ошко алдырып келгени шашчу. Алар айылда жашап көнгөн кишилер зорго эле турушат, кыштын бүтүшүн күтүшүп, күн жылыры менен Таласка үйгө кетебиз дешет.
Байкем ата-энесине эле эмес, мага да өзгөчө мамилесин ыроолоп, мен ачка жүргөнсүп, ичсең-жесең деп, жеңем Суусарга «ой бул Сокемдин жалгыз кызы, тамактан кыспай бер» деп турар эле. Анткенде, мен өзүмчө тартынып уялып калаар элем. Асылкан байкем кийин атам менен кандай акылдашкан болсо, мени менен да ошондой акылдаша баштады.
Алтай байкем КМУнун физика-математика факультетин кызыл диплом менен бүткөнүн, эми аспирантурадан окуй турганын, чоң ата, чоң энесин Фрунзеге алып келип өзү карап бага тургандыгы жөнүндө кабарлап жазыптыр. Асылкан байкем болсо, аны өзүнчө мага айтып, кейип кирди.
Кемпир-чал шаарга көнбөйт турбайбы. Шаарга жашаса мени менен деле жашайт эле го деп, ата-энесинин шаарга көнбөгөндүгүнө кейип, баласынын окуусун да кыялбай жатты. Мен болсо, байке чоң атамдар айылда жакшы эле турушат экен. Каралашаар тууган урук бар. Эжемдин баласы Аманбек кемпир-чал менен бирге жашап турбайбы десем, ээ айланайын ал эми жээн да деп калды.
Үй-бүлө, туугандаргакамкор эле
Асылкан Бөрүбаев ата-энеге, үй-бүлө, туугандарга үзүлүп түшө калган айтаарлык камкордугу бар эле. Ишинде да абдан так иштеген мыкты журналист эле. Иштен дайыма кеч кайтчу. Газетага бир маанилүү макала чыгаарда кайра-кайра кабар алып, телефондон сүйлөшүп, гезиттин бул бетине жайгаштыргыла, деп кеңешип, кайра эле эмне болду экен дегенсип, чыдабай күнбү-түнбү баары бир, редакция жашаган үйүнө жакын болгондуктан, бир маалда деле редакцияга бир барып келер эле.
Түшкү тамактануу мезгилинде деле үйгө келе калса кайра эле ишине шашчу. Кийин мен турмушка чыкканда, жолдошум комсомолдун обкомунда иштеп турган, азыркы жаштар иштесе эле ишинен пайдаланууну көздөшөт экен, сен жолдошуңа андайга жол бербе, өсө турган балдар иште таза иштеши керек деп кеңеш берип калар эле.
Жеңем кээде Фрунзеде жашап турган үйдү балдарга алып бербедиң, тиги… балдарын эле киргизип коюптур десе, жок балдар дагы үйгө, кызматка өздөрүнүн ак эмгеги менен жетсин, өздөрү иштеп, жандары кичине кыйналса, ойлонсо ошол берекелүү, таттуу да, туруктуу да болот. Эч балдарды жеңил турмушка көндүрбөш керек деп койчу эле.
Ошондой эле Алтай байкем өз күчү менен алтын медалга, кызыл дипломго ж.б ийгиликтерге, профессордукка чейин атасы айткандай өз ак эмгеги, билими, адамгерчилиги, акылы менен жетти.
Асылкан Бөрүбаевдин мүнөзүндө ишти чала калтыруу, бирөөнү жөн эле кемсинтүү, ыксыз эле тура эмес иштерди жасоо деген болчу эмес. Өзүнүн жеке жүрүм-турумунда да, ишинде да таза тыкандыкты жактырчу. Бирөөлөргө да жакшылыкты ыгы менен кылчу. Жөн жерден, туура келбей турган иштерди бирөөлөр суранса, андай туура
келбейт, кийин уят болуп калабыз деп гана түшүндүрүп койчу эле. Бирок, ыгы келген жерде адамдарга боорукер, адамгерчилик менен жардам көрсөтүп, адамдарга колдон келсе жакшылык кылыш керек, кийин андан кайтпаса башка бирөөдөн, кудайдан кайтат. Бирөөлөргө кара ниеттик, караөзгөйлүк кылбаш керек деп эскертип калар эле.
Эл эмгектен эскерет
Асылкан Бөрүбаев өтө эле ашыкча байлыкты, ач көздүктү жактырбайт эле. Үйүндө өзүнүн, үй-бүлөсүнүн, балдарынын дагы кийим-кечесин ыгы менен, таза, тыкан кийинүүсүн талап кылып, өтө эле ашыкча нерселерди алууга тыюу салар эле. «Бийлик учуп кетер куш, байлык ээрип кетер муз, өнөр, бала артыңда калар из» деген- дей анын элге, өкмөткө кылган ак кызматы, туугандарына кылган туура мамилеси, алардын эсинде калар жакшы сапаттары калды.
Асылкан Бөрүбаевдин уулу Алтай бардык жагынан адамдык асыл сапаттары, ички дүйнөсү, ишке болгон аракетчилдиги, эмгекчилдиги, үй-бүлөгө болгон камкордугу, туугандарына болгон өзгөчө мамилеси жагынан атасына өтө окшош.
Математик, окумуштуу, академик Алтай Бөрүбаев Оксфорд университетиндеги дүйнөлүк окумуштуулардын реестрине кирген Орто Азиядагы биринчи адам. Анын илимдеги үч ачылышы эл аралык деңгээлде бааланган. Москва обсерваториясында жылдыздардын бирине “Алтай” ысымы берилген. Оксфорд университетинин “Илимдеги ысым” алтын медалы менен сыйланган. Анын илимдеги, ишиндеги жетишкендиктерин көрүп, «Аккан арыктан суу агат» деген бекеринен эмес экен деп сыймыктанат экенсин. Асылкан Бөрүбаев көп эмгекти Ош жергесине сиңирди. Таласта жаш кезинде комсомолдо иштөө менен эмгек жолун баштаган экен. Таласта өзү жашаган айылда жана Талас шаарындагы бир көчөгө ысмы ыйгарылды. Көк-Арык орто мектеби Асылкан Бөрүбаев атындагы Көк-Арык орто мектеби деп аталып калды. Оштогу өмүрүнүн акыркы жылдарына чейин жашаган үйүнүн жанындагы көчөгө да ысымы коюлду. «Эл эмгектен эскерет» дегени ушул эмеспи депмындайда ыраазы да болуп кетет экенсиң.
А.МАТИЕВА