Шамуратов Азизбек Гыламидиновичтин айыл өкмөтүнүн жетекчиси болуп эмгектенгенине аз гана убакыт болду. 2022-жылдын 11-майында Ноокат райондук мамлекеттик администрациясынын-башчысы-акимдин буйругунун негизинде Он-Эки-Бел айыл өкмөтүнүн башчылыгына дайындалган.
Быйылкы жылы Ноокат районундагы Он-Эки-Бел айыл өкмөтүнүн аймагында бир топ көзгө көрүнөөрлүк иштер, тактап айтканда, курулуштаркурулуп жаткандыгына жеринде барып таанышып, көрүп чыктык. Мындай курулуш иштерин жүргүзүп жаткан элдин камын ойлогон, эл үчүн эмгектенген жаш жетекчинин аткарып жаткан иштери мактоого татыктуу.
“Миң уккандан бир көргөн артык” дегендей, Он-Эки-Бел аймагындагы курулуп жаткан курулуш иштери менен таанышып чыктык. Алгач, Нарай айылындагы КОIСА- 1000 долбоорунун негизинде 5 млн. 700 миң сомдук 60 орундуу башталгыч класстын мектеби курулуп жаткандыгына күбө болдук. Бул айылдын балдары мурда кыйналышып, жолдун алыстыгына карабастан башка айылга барышып окушчу экен. Эми мектептин курулушу бутүп калса, окуучулар өздөрүнүн айылында билим алышып, алыска каттабай калышат. Мектептин курулушуна жергиликтүү бюджеттин эсебинен 300 миң сом, жашоочулар тарабынан 300 миң сом салым кошушту. Ушул эле айылга Ж. Алоудинов атындагы жаш жеткинчектер үчүн эки кабаттуу 100 орундуу балдар бакчасы курулуп жатат. Сметалык баасы 49 млн. 843156 сомду түзөт. Республикалык бюджеттин эсебинен каржыланууда. Тендерден утуп чыккан жоопкерчилиги чектелген “Баасыз курулуш” компаниясынын курулушчулары кызуу иштеп жаткан учурлары экен. Нарай орто мектебинде футболдук аянтча бөлүнүп берилип, газон себүүгө жер даярдалып, айланасын тосуп коюшкан. КРдин Президентинин Ош облусундагы ыйгарым укуктуу өкүлчүлүгүнүн өнүктүрүү фонду тарабынан 3,5 млн. сом которулган. Ал эми жергиликтүү бюджеттин эсебинен 572 миң сом, калк тарабынан 200 миң сом салым кошушкан.
Өрнөк айылындагы А.Нарматов атындагы орто мектепке Мерси-Ко Эл аралык уюму тарабынан ашкана курулуп берилди. Азык-түлүк продукциясын жана ички тетиктерди Мерси-Ко уюму камсыздайт.
Айыл ичиндеги жашоочулар үчүн мөмө-жемиштен сок чыгаруучу кичи цех курулуп жатат. Мында КОIСА-1000 долбоорунун негизинде АРИС уюму тарабынан иш жүзүнө ашырылууда, Жеке ишкер Мундуз Мыйзамов тарабынан инвесторлор тартылып станоктор коюлат. Он-Эки-Бел айыл өкмөтүнүн жанындагы эскилиги жеткен ФАПтын жанына заманбап үлгүдөгү ҮБДТнун имаратынын курулуш иштери жүрүп жатат.
Ал эми жеке ишкер Алмаз Сранов тарабынан сыйымдуулугу 500 тонналык мөмө-жемиш сактоочу муздаткыч Он-Эки-Мойнок айылында курулууда. Азыркы учурда курулуштун 80 пайызы аткарылды. ЮСАИД уюму тарабынан 5 млн. 162 миң сомдук тетиктерди гранттын негизинде алуу алдында турат.
Ушул эле айылга Акматали Сранов атындагы орто мектепке республикалык бюджеттин эсебинен сметалык баасы 132 млн. сомдук 275 орундуу мектептин орду техникалар тарабынан тегизделүүдө. Учурда эски мектепте билим алып жаткан окуучулар үчүн айыл өкмөтү тарабынан 290 миң сом бөлүнүп берилген. Ал эми Мерси-Ко уюму тарабынан азык-түлүк продукциясы жана колдонуучу техникалык каражаттар орнотулуп коюлган.
Он-Эки-Бел айыл өкмөтүнүн башчысы Азизбек Гыламидинович быйылкы жылдын эсебинен бир канча курулуш иштерин баштап, жылдын аягына чейин бүткөрөбүз деген чоң үмүттөрү бар. Кышка карата дагы камылгаларды көрүшүп, көмүр түшүрүшүп коюшкан. Андан тышкары, столбаларды жаңы конуштарга тартуу үчүн алып коюшкандыгын айтып кетүүгө болот. Көп жылдан бери эмгектенип, айыл өкмөтүнө салымын кошкондордун катарына башкы эсепчи Каныкей Парманова, жооптуу катчы Жанара Абдивасова, Нарай айылынын айыл башчысы Кудайберди Анарбаевдин ысымдарын сыймык менен атоого болот.
Бурма Ысакова, Асылкан Бөрүбаев атындагы сыйлыктын ээси