Айтылуу Алайкуу өрөөнүнүн Ой-Тал айыл өкмөтүндө жайгашкан Куланчы Орунбеков атындагы орто мектептин директору Нурбек Сабытович Осмонов 2018-жылдан бери үзүрлүү эмгектенип келет. Биз аталган мектепке барып, Нурбек Осмонов менен баарлашканбыз. Маек учурунда Нурбек Осмоновдун тажрыйбасына баа бердик. Анткени агай бизге бардык иштерди ирети менен айтып берип, бир да суроо узатуубузга, кайталап суроо берүүбүзгө жол бербей, жагымдуу маектешүүгө шарт түзүп берди. Агайдын өз ишинин мыктысы экенине ынанып, ичибиз жылыганын жашыра албайбыз. Анда сөз башынан болсун.
Кара-Кулжа районунун Ой-Тал айыл өкмөтүндө жайгашкан К.Орунбеков атындагы орто мектептин имараты 2003-жылы электр тогунун кесепетинен толук күйүп кеткен. Кийин мамлекет тарабынан жаңы имарат курулуп, ишке киргизилген. Ал эми учурдагы мектеп директору Нурбек Осмонов 2018-жылы директорлук кызматка дайындалып, мектептин техникалык базасын чыңдоого аракеттерди көрүп келүүдө.
Атай кетсек, КР Билим берүү жана илим министрлиги тарабынан 21 жаңы компьютер комплектиси жана алты проектор менен кошо берилген. Учурда компьютерлер бардык класстарга коюлуп, окуучулардын сапаттуу билим алуулары үчүн пайдаланылууда. Ал эми жеке ишкер Кадыр Сайдилканов мектепке интерактивдүү доска жана эки компьютер алып берген. Ал эми ЖК депутаты Эмил Токтошев да үч компьютер белек кылган. Мектептин ысымын алып жүргөн Куланчы Орунбековдун балдары да демөөрчү болушуп, 1 интерактивдүү доска, бир проектор алып беришкен.
«Буга чейин эски компьютерлерден төртөө иштейт эле. Алар 2004-жылкы компьютерлер болчу. Эски маркадан болгондуктан аларды иштетүү өтө кыйын эле. Директор болгон күнүмдөн баштап, мектептин техникалык базасын чыңдоого, балдарга билим берүүдө заманбап компьютер, интерактивдүү доскаларды пайдалануу максатын көздөгөм. Буюрса, бардык класстарды комплект компьютерлер менен камсыздап алдым. Мугалимдер үчүн да бардык шарттар жаралды»-дейт Нурбек Осмонов.
Мектеп өткөн жылы түрткү берүүчү гранттын чектеринде капиталдык ремонттон өткөн. Ага улай айыл өкмөт тарабынан жылытуу системасы жаңыланып, терезелер пластикке алмаштырылган. Ал эми мектепке 20 жылдык жолугушууга келген бүтүрүүчүлөр мектептин экинчи имаратынын чатырын жаңылап беришкен. Нурбек Осмонов 2018-жылы мектепке спорт зал курууга аракеттерди көрүп, бул жумушту аягына чыгарган.
«Мектептин спорт залы республикалык бюджеттен каржыланды. Курулуш иштери башталгандан соң, аягына чыккыча тыным көрбөдүм. Себеби, тендер менен келген компания ишти чабал жасап, чатырынан тамчы агып, жылытуу системасы да дурус иштебей, көп кемчилдиктерди кетиришти. Ишти аяктадык десе да спорт залды пайдаланууга кабыл албай, ошол кемчилдиктерин өздөрүнө жасатып, кайра- кайра текшерип жатып, 2022-жылы кабыл алдым. Антпесем, азыр кайра эле жараксыз абалга келип калаары бышык эле» — дейт директор.
1984-жылы мектептин беш бөлмөлүү ашканасынын дубалы курулуп, ошол бойдон калып кеткен. Директор агай демөөрчүлөрдү таап, аталган ашкананын курулушун улантып, ашкананы ишке киргизген. Мектептин ар бир класстарына, айланасына коюлган видеобайкоо камералары иштен чыккандыктан, алардын бардыгын ремонттон өткөртүп, пайдаланып келишет. Бул видеобайкоолор сабактардын сапаттуу өтүлүшүнө себеп болуп, мектептин айланасындагы коопсуздук чараларын алдын алат.
Учурда аталган билим уясында 34 мугалим иштейт, бардыгы жогорку билимдүү. Кадр маселеси жетиштүү. Агартуучулардын арасында Арыкбаева Кыздаркан, Токоева Айсулуу эжекелер «Эл агартуунун отличниги» төш белгисинин ээлери. Ошондой эле КР Билим берүү жана илим министрлигинин Ардак грамотасына татыгандар да бар. Мугалимдер билим берүү программаларын мыкты өздөштүрүшүп, арасында ийгилик жараткандар арбын.
Быйылкы окуу жылында 11-класстан 15 окуучу аяктаса, 9-класстан 27 окуучу мектепти бүтүргөн. ЖРТга катышкан окуучулар 148 баллдан жогору упай топтоп, босого баллдан өтүп келишет.
«Бүтүрүүчүлөрдү ЖТРге даярдоодо Оштогу Секом, Рекорд окуу борборлорунан адистерди алып келип, бир-эки ай балдарды сынакка даярдоосуна шарттарды жаратып келем. Келген адистерди үйүмө түнөтүп, алардын коопсуздугун, тамак-ашын карап, балдарыбыз тереңдетилген билим алышса деп ниет кылам. Шүгүр, бул эмгегим текке кетпей бүтүрүүчүлөрүбүз жогорку окуу жайларына өтүп, билим алып жатышат. Ал эми бул иштеримдин артынан окуучуларды Алтын тамга жана Алтын сертификатка чыгарууга да өбөлгө жаралууда. Мындай ийгиликтер буюрса, алдыда болот»-дейт Нурбек Осмонов.
Окуучуларды предметтик олимпиадаларга катыштырууда облустук турга чейин чыккандар бар. Бирок, мектеп олимпиадасы кыш мезгилинде болгондуктан, жолдун катаалдыгынан катыша албай калган учурлар кездешип тураарын айтат директор. Ал эми балдарга ысык тамак уюштурууда МерсиКо уюму менен келишим түзүлүп, өз жемишин берүүдө.
Н.ӨМҮРЗАК ОВА, Ош–Ой-Тал