Биз жакында дүйнөлүк мелдештерде Кыргызстандын желегин желбиретип, мамлекетибиздин Гимнин ойноткон бир нече чемпиондорду тарбиялап чыккан Араван районундагы Т.Исмаилов атындагы орто мектептин дене тарбия мугалими Ибрагим Алимов менен жолугуу максатында атайын Чек-Абад айыл өкмөтүнө сапар алдык. Бизди өкмөт башчысынын орун басары Сайбилла Токторов тосуп алып, ага келген максатыбызды түшүндүрдүк.
Экөөбүз жолдо баратканда ал:
-Кызыр-Абад деп аты айтып тургандай, бул айыл кызыр даарыган аймак,-деп сөзүн улады,- ал мурда Тойчу аттуу балбаны менен атагы чыгып келген айыл. Карыялардын эскерүүсүнө караганда Тойчу балбан көп жолу күрөшкө чыгып, далысы жерге тийбеген адам болгон экен деп айтылат.
Бир жолу Ноокатта болгон күрөштө биягы Андижан, тиягы Кара-Тегин, күн батыштан Кокон, Коженттен келген балбандардын арасында таш көтөрүү мелдеши өткөрүлүп, Тойчу балбан көтөргөн ташты эч ким өйдө көтөрө албай, байге ага ыйгарылган экен.
Биздин айыл өкмөттүн жашоочулары сиз издеп келген Алимовдорду спортко кызыккан үй-бүлө деп билишет. Ибрагим Алимовдун бир тууган агасы Кыргыз Алимов да дене тарбия институтунда окуган. Ал кезегинде 1980-жылы Москвада өткөн жайкы олимпиадада чемпион болгон Каныбек Осмоналиевдин машыктыруучусу Семён Давыдович Иткиндин көзөмөлүндө оор атлетика менен машыгып, бир топ ийгиликке жетишкен.
Биздин аймакта мурда волейбол, баскетбол оюндары көп ойнолчу. Ибраимдин аракети менен бизде спорттун күрөш, футбол түрү жакшы өнүгүп, жердешибиздин талбаган аракети менен анын машыктырган балдары биздин чакан айылыбызды гана эмес, Кыргызстанды да бүткүл дүйнөгө таанытты. Ибраимдин улуу уулу Максат Алимов Кыргызстандын футбол боюнча курама командасынын капитаны. Ал да биздин балдарга баалуу кеңешин берип турат. Ибрагимдин ийгиликтери көп болсо да, башкаларга окшоп, көкүрөгүн ургулап мактанбайт, мүнөзү оор басырыктуу, адамгерчиликтүү, мамилеси сылык. Азыр барсак, өзүңүз да күбө болосуз.
Издеген адамыбызды мектептен таптык. Ал адегенде кыскача өмүр баянына, эмгек жолуна токтолду.
— Мен ушул мектепти аяктап, 1981-жылы Фрунзе шаарындагы Кыргыз мамлекеттик дене тарбия институнунун эркин күрөш адистигине кирүү экзамендерин ийгиликтүү тапшырдым. Жогорку окуу жайын 1986-жылы аяктадым. Студент кезимде институттун “СКИФ” командасынын мүчөсү катары көп мелдештерге катышып жүрдүм. Педагогдук эмгек жолум Араван районундагы Төө-Моюн айыл өкмөтүндөгү Гагарин (азыркы Сыдыков) атындагы орто мектепте дене тарбия мугалими болуп башталган. Ал жерде мектеп окуучуларын волейбол боюнча машыктырдым. Биздин мектептин командасы адегенде райондо, кийин облустун биринчилигине чыккандан кийин, мени ДСЮШнун директору Азамат Аскаров өзүнө чакыртып алды. Ал жерде 3 жыл иштеп, мектептин балдарын мини-волейболдон даярдап, облустук мелдеште 1-орунга чыктык.
Андан кийин спорт мектебинде улуттук күрөш боюнча бөлүм ачылып, ага мени которушкан. Бул жерде эски имарат бар эле, аны бузуп, чакан залга айландырып, балдарды машыктара баштадым. Эки-үч жылдан кийин аракетибизден майнап чыгып, биздин балдарыбыз райондук, облустук спартакиаларга катыша баштады. Биздин команда адегенде облуста 3-орунга чыкты. Андан кийин 7 жыл катары менен республикада алдыңкы орунду бербей жүрдүк. Республикалык деңгээлдеги мелдеште көп жолу Талас облусу биринчи, Ош облусу 2-орунду ээлеп кайтчу элек.
Биздин тарбиялануучубуз Султанов Исамидин Татарстанда өткөн эл аралык турнирде алыш күрөшү боюнча дүйнө чемпиону болду. Андан кийин алыш күрөшчү Кочкоров Мырза Азия биринчилигинде чемпион болуп кайтты. Баймырза Эргешов Монголияда дүйнө чемпиону болду. Кийин И.Султанов Сеулда, М.Кочкоров Польшада, Иранда болуп өткөн чемпионаттарда биринчи орунга чыгышты. Мырза дүйнөлүк көчмөндөр оюнунда да чемпион болгон. Андан кийин Абдазов Элбек Кытайда өткөн мелдеште дүйнө чемпиону болгон. Абдазов Мирлан 48 кг чен салмак менен көп жыл бою республикада 1–орунду эч кимге бербей жүрдү.
Акжол Махмудов 5-класста окуп жүргөндө бир жыл биздин залда машыккан. Кичинесинен эле чапчаң болчу. Арыкчырай келген шамдагай бала болгон. Кийинки жылы Бишкекке кетишкен. Акжол шаарда да машыгуусун улантып, азыр күрөштүн грек рим түрү боюнча дүйнөнүн жана Азия боюнча бир нече жолу чемпиону болду. Өткөн жылы биздин мектептин окуучулары футбол боюнча облуста биринчи орунга чыгып, республикада 2–орунду ээлеп кайттык. Кызыр-Абаддын балдары тырышчак, намыскөй. Алардын артынан түшсөң сөзсүз майнап чыгат.
Биздин жетишкендиктер мамлекет тарабынан эске алынып, республикалык бюджеттин эсебинен жалпы суммасы 14 млн. сомду түзгөн спорт залыбыз пайдаланууга берилгендигине 5 жыл болду. Азыркы учурда шарттыбыз абдан жакшы. Таабалдиев Алмаз деген бала артынан чуркап жүрүп, Бишкектен баасы 20 000 доллар болгон олимпиадалык матрасты алып берди. Облус тарабынан баасы 3000 доллар турган матрац берилген. Айыл өкмөтүнүн көмөгү менен 500 миң сом тренажерлор алып келинди. Балдарыбыз жаңы залда машыгышат.
Кийинки жылдарда мектеп окуучуларынын арасында футболго кызыгып жаткандар көбөйүп жаткандыктан, аны өнүктүрүүгө олуттуу маани берип жатабыз. Кыргызстандын мектеп лигасынын футбол боюнча өткөн мелдешинде биздин мектептин командасы 2-орунга чыгып, Рыскелди Маданов аттуу спортсменибиз “Мыкты чабуулчу” деген номинацияга ээ болуп келди. Мектептин аймагына райондук өнүктүрүү фондусунун жана айыл өкмөтүнүн жардамы менен жалпы суммасы 2 млн. сомду түзгөн мини футбол аянтчасы пайдаланууга берилди.
Сөзгө Т.Исмаилов атындагы орто мектептин директору Айнагүл Матраимова кошулду.
— Биздин мектептин спортмендери жыл сайын спартакидага активдүү катышып, алдыңкы орунду ээлеп келишет. VIII республикалык спартакидада Ош облусунун намысын коргоп келишти. Мына ушундай ийгиликтердин жаралышына Ибрагим Алимов баш болгон дене тарбия мугалимдерибиздин эмгеги чоң. Ибрагимдин ишке жасаган мамлеси абдан жоопкерчиликтүү, сабакты өз убагында өтөт, балдарга катуу талап койот. Ага “Ош облусунун ардактуу атуулу” деген наамынын ыйгарылгандыгына, биз эле эмес, жалпы Араван районунун тургундары сыймыктанып жатат. Атактуу балбан Акжол Махмудовдун көмөгү менен грек-рим күрөшү боюнча райондогу спорт мектебинен атайын машыктыруучу келип, окуучуларыбызды жумасына 4 жолу машыктырып жатат. Алгачкы жыйынтык бар. Шарип Эрматов деген окуучубуз облуста биринчи орунду алып, республикалык мелдешке даярданып жатат.
Төлөнбай АБДЫРАЗАКОВ