Баарыбызга белгилүү болгондой, түштүк аймагындагы өнөрпоздордун каймагы топтолгон Ош облустук Рыспай Абдыкадыров атындагы филармониянын жетекчилиги бир топ жылдардан соң алмашып, ага жаш жетекчи, кыргыз журтчулугуна аттын кашкасындай таанымал таланттуу жигит, журт сыймыгы болгон Алишер Тоотаев жетекчи болуп дайындалган. Ош шаарынын борборунда жайгашкан залкар обончунун атындагы өнөр ордосунда жаңы жетекчи кандай жумуштарды аткарып жатканын билүү максатында аталган филармонияга баш бакканбыз. Дегенибиздей, облустук филармониянын жетекчиси Алишер Тоотаевге суроолорду узатып, алдыдагы иш-пландары менен ой бөлүшкөнбүз.
— Алишер мырза, филармониянын жетекчилик кызмат ордуна жарыяланган сынакка кандайча катышып калдыңыз?
— Маданият тармагында иштегениме көп жыл болгондуктан, бул тармактын күңгөй-тескей жактарын жакшы билем. Буга чейин эле жеке чыгармачылыкта жүрүп, группаларды түзүп, өзүмдү көп эле сынап көрдүм. Өзүм да эмгек жолумду дал ушул филармонияда иштеп баштаганмын. Кийин филармониянын жетекчилигине сынак жарыяланганда алдыга койгон максаттарымды долбоорлоп жүргөм, ошол иш-пландарымды сынакта айтып бердим. Ал долбоорумдун негизги бөлүмү «Маданиятты кандай өнүктүрүү керек?» деген темага басым жасаганмын. Кийин Жараткандын буюругу экен, жетекчи болуп келип калдым. Чынын айтышым керек, буга чейин деле бул жака жетекчиликке сунуш түшкөндө, баш тартып жүргөм. Себеби, мурунку жетекчини сыйлагандыгым болгон.
— Кызматка киришкенде, «чү» дегенде эле эмне жумуштан ишти баштадыңыз?
— Бул жака келгенимде кадр маселесине көңүл бурдум. Мыйзамга ылайык, диплому жокторду иштен четтетип, атайын маданият тармагында алган билими барларды ылгап алдым. Диплому жокторду окуп билим алууларына көмөктөшүп, аларга туура түшүндүрүүгө аракет кылдым. Капа болгондору да болду, ызы-чуу чыгаргандары да болду. Бирок, убакыт барын өз ордуна коюп, диплом керектигине ынанышты. Себеби, азыр билимдүүлөрдүн заманы келди десем болот. Билими бар маданият кызматкери албетте, бул тармакта кандай иштөөнү, жакшыртууну жакшы билет. Бул кадамым ишке ашкан соң, көп өтпөй мамлекеттик аттестация тапшырууга туура келди. Коллектив аталган аттестацияга даярданып, аны ийгиликтүү тапшырып алдык. Ошондой эле, Болуш Мадазимов атындагы эл аспаптар оркестринин курамын кеңейттик. «Аалам» деген жандуу үн менен аткаруучу фольклордук ансамбль жана эстрадалык ансамбль түздүм. Ансамбльдин ырчылары репетиция жасашып, даяр болуп калышты. Манасчы, дастанчыларды да тартуу планым бар. Ошондой эле, филармонияга улуттук аспаптарды алуу үчүн тендер жарыяланып, жыйынтыкталды. Ал эми формаларды тиктирүүдө биздеги тигүүчү штаттарды ишке киригизип, көрүнүктүү дизайнерлерди ишке алдык. Себеби, мындай штат болгон дагы, бирок, бир да тигүүчү иштеген эмес экен. Эми кездеме алсак, тигүүчүлөрүбүздүн эмгеги менен канча болсо да формаларыбызды жаңылап алабыз, ошондой эле каражатыбыз да үнөмдөлөт.
— Алишер мырза, филармонияга аттын кашкасындай таанымал залкарларды жумушка тартты деп уктук?
— Туура эле угупсуздар (жылмайып). Филармония дегенден кийин, албетте, өнөр дүйнөсүндө өзүнүн бараандуу салымын кошкон , улуу инсандар — ды ишке тартууну колго алдым. Андай адамдардан биздин уучубуз кур эмес. Филармония ошондой улуу инсандар менен филармония деген атка татыктуу. Биз ошол үлгүлүү инсандардын кеп-кеңешин угуп, алардын чыгармаларына сугарылып, баталарын алышыбыз керек. Колдо барда барктап-баалап алуу биздин милдет деп билем. Ошондуктан заманабыздын залкары, элибиздин сүймөнчүгү, улуттун жүзү, бир доордун аңызы, улуу устатыбыз Жолболду Алибаев агайды алгачкылардан болуп филармонияда иштеп, бизге жол көрсөтүүсүн өтүнүп, жумушка чакырдым. Андан кийин белгилүү өнөр ээлери Бабравшан Тургунбаев, Абдыкерим Ахмедов агайларыбызга кайрылдым. Албетте, алардын катарында белгилүү композиторлор Акбарали Тасмаев, Абдыманап Төрөбеков агайларым менен да иштешип жатабыз. Улуу устаттарыбыз ар жума сайын артистерибизге мастер-класс өтүп, жандуу үн менен машыгууларды өткөрүп жатышат. Филармониянын жанынан өтүп бара жаткан адамга биздин ырчыларыбыздын добушу кадимкидей угулуп, филармония жандана түшөт. Андан да, филармониядагы артистерге ушул улуу композитор агайларыбыздын ырларын аткартып, репертуарларын жаңылаттым. Бир кварталда ушул маселени чечели десем, кызматкерлерибиз активдүү иштешип, эки айдын ичинде ар бир компазитордун ондон ашуун ырларын репертуарларына кошушту.
— Өткөн аптада филармонияга баш баксак, артисттер гастролдо жүрөт дешти. Бул боюнча да билсек?
— Филармониянын милдети элди аралап, тарбияны ыр аркылуу жайылтып, элди ынтымакка, ырашкерликке чакыруу. Ошондуктан филармонияда көп жылдан бери токтоп калган гастролду тикеледим. Учурда артистерибиз Жалал-Абад облусун түрө кыдырып келишип, Баткен облусуна кетишти. Андан соң, Ош облусун кыдыруу милдети турат. Чоң-Алай, айтылуу Алайкуу жергесине чейин барышып, элге руханий маанай тартуулап келишет. Ушул жылы коңшу Өзбекстанга да барып концерт коюу планыбыз бар.
— Филармонияда бир топ өзгөрүүлөрдү байкадым, дагы кандай иштер менен убарасыз?
— Филармониянын имараты илгери «Космос» кинотеатры болуп, кийин филармонияга өткөрүлүп берилген. Ошол учурдан бери эң негизги көйгөй бул филармониянын имаратынын бир да тиешелүү документтери жок экен. Ал тургай айланасындагы жердин да мамлекеттик актысы жок тура. Мен жакшы пландар менен келип, имаратты ремонттоп, реконструкциядан өткөрүүнү баштайын десем эле, документи жок эч кандай жумуш аткара албайт турбайсыңбы. Ошентип, азыркы учурда борборго чейин барып, тиешелүү мекемелерге кайрылып, документ иштерин жасатып жүрөм. Имараттын техникалык паспортун бүтүрдүм, ал эми айланасына мамлекеттик акты алуу үчүн аракет көрүүдөмүн. Негизи мен ушул ишти бүтүрүп жүрүп, борбордо иштеген мекемелердеги кызматкерлер бир сөзүңдү эки кылбай, барын туура-так бүтүрүп, анча убара кылбай, кылдаттык менен иштегендерине күбө болдум. Ал эми Оштон бүтүүчү документтерге ишенсеңиздер, ушул күнгө чейин капа болуп келүүдөмүн. Бир эле документке канча жолу чуркатышты. Бүтө турган документти деле илең-салаң кылып кармап жүрө беришет экен. Бул документтер менин үйүмүн документи эмес го, бул өлкөбүздүн маданиятынын имараты го деп кейип турам. Билбейм, эми ушуну көп убара кылбай, ал жак, бул жака арыздандырбай эле бүтүрүп беришет го деген үмүттөмүн. Анан калса, келгенимде эле имаратты ремонттоп, эшик алдына брусчатка бастырып, газон эгем деген планым бар эле, досторум, жакындарым демөөрчү болуп беребиз дешкен. Бирок, документтин жоктугунан мен аларды аткара албай, документ иштери менен убара болуп жүрөм. Анан да мен бул документтерди бүтүрүп, эки залды бириктирип реконструкциялоо иштерин алып барайын дегем. Бирок, архитектура бул имарат элүүнчү жылдары курулгандыктан уруксат беришпеди. Мүмкүн эмес деген корутунду чыгарып беришти. Себеби, имарат эски болгондуктан көчүп кетүү коркунучу бар экен. Д е м е к , эмне кылуу керек? — деген суроо туулду. Мунун чечими жаңы заманбап филармониянын имаратын куруу керектигине токтолдук. Жакында филармониянын имаратынын эскизин чийүү боюнча тендер жарыяладык. Мен ага да карап отурбай, өзүмдүн кыялымдагы кыргызды кыргыз кылып тааныткан символикалык стилде, улуттук колоритти чагылдырган имараттын эскизин чийип койгом. Эгер, тендердеги эскиздер туура келбесе, ошол чиймени сунуштап көрүү планым бар. Албетте, баары мыйзам чегинде болот. Ал эми имаратты кайсыл жерге куруу керектигин ойлоп жатабыз, жер участокторду сунуштап жатышат, бир болсо өз ордуна эле курсакпы деген пландар да бар. Имарат куруу идеясына Президентибиздин маданий мекемелерди жаңылоо керек деген сөзү бизге дем берип, КР Мин. Кабдын, маданият министрлигинин колдоосуна арзып келүүдө. Чындыгында Ош экинчи борбор болгондуктан, миң адам батуучу сахналуу имаратыбыз жок болгондуктан, бул нерсе бизге керек. Чет элден келген өнөр ээлери чоң зал сурашса, стадионду сунуштайбыз. Ал жер спорттук мекеме да, ыңгайсыз болот. Ошондуктан ордолуу Оштогу филармониянын абалына көңүл бурулуу зарыл деп ойлойм. Бизде патриот, бизнесмен инсандарыбыз көп. Аларды да маданият тармагын колдоого чакырып кетет элем. Себеби, кыргызды кыргыз кылып тааныткан бул, албетте, маданият. Сиздерден пайдаланып, биздин ар бир ишибизди колдоого алган КР Маданият, маалымат, спорт жана жаштар саясаты министри Алтынбек Аскарович Максутовго, анын орун басары Кайрат Олжобаевич Иманалиевге ыраазычылык билдирем. Бизге ишеним көрсөткөндүктөн биз да ал ишенимди актоого аракет кылабыз. Иштейм десең эле, жакшы планың болсо эле, колдоого алынаары анык экен.
— Филармониянын бир кездеги чуусу «таштанды» маселесин канттиңиз?
— Филармониянын акыбалына келсем, албетте, көйгөйү көп экен. Филармонияны ремонттон өткөрүп, эшик алдын иретке келтирүү зарылдыгын колго алдым. Эшик алдына өзүңүздөргө белгилүү болгондой Тешик-Таш базары, ылдыйкы Ош базары эки тарабында жайгашкан. Мында иштегендер филармониянын алдына товарларын коюшуп, чакан пирожки бышырган күркөлөр пайда болуп, жада калса эстеликтин алдына чейин бытырап, башаламандыкты айтпай эле коюн. Аларды бул жерге койбогула, бышырыктарды бышырбагыла деп тазалай баштасак, алардан, албетте, жакшы сөз укпадык. «Менчик жериң беле, ушуга чейин коюп келгенбиз, дагы деле кое берибиз»-деп аябай капа кылышты. Бирок, ага карабай биз эшик алдын тазалоого катуу кириштик. Кийин шаар мэри Бактыбек Жетигенов рейддин негизинде келип калды эле, калаа башчысына айтсак, ал киши жардам кылып, ошол менен эшик алдын бошотуп алдык. Ал эми таштандыларды чыгарууда өз чөнтөгүмдөн эле каржылап, тазалатып жүрдүм, кийин шаар башчысынын көмөгү менен шаардагы Тазалык ишканасы менен келишим түзүп, жолго салып алдык. Ошентип, эшик алдына гүлдөрдү эктик, эстеликтин айланасын жасалгаладык, жарыктандыруу иштерин алып бардык.
Маектешкен: Н.ӨМҮРЗАКОВА.