Ысык-Көл облусунун Чолпон-Ата шаарындагы Чыңгыз Айтматов атындагы «Рух Ордо» музейи жана мамлекеттик тарыхый маданий корук музейи туристтерге өзгөчө маанай тартуулайт.
Кыргыз бермети Ысык-Көлдүн жээгиндеги Чолпон-Ата шаарындагы Чыңгыз Айтматов атындагы «Рух Ордо» музейи ачык асман алдындагы өзгөчө комплекс. Жалпы аянты 4,5 гектарды ээлеп турган ачык асмандагы музей 2002-жылы коомдук ишмер Ташкул Керексизов тарабынан негизделип, 2007-жылдан тарта кызмат көрсөтө баштаган. 2008-жылы музейге залкар жазуучу Чыңгыз Айтматовдун ысымы ыйгарылган.
Комплекске келген туристтердин тобун гид коштоп жүрөт. Анда “Ч.Айтматовдун музей-үйү”, “Кыргыз искусство жана маданият залы”, сүрөт жана фото галереялары, “Саякбай Каралаевдин чатырчасы”, “Билим казынасы” жана дүйнөлүк ири ислам, католицизм, православие, буддизм жана иудаизм конфессияларды камтыган мечит жана чиркөөлөр орун алган.
“Рух-Ордо” музейи кыргыз элинин маданияты жана каада-салты жөнүндө кеңири маалыматты камтыйт. Музейде кыргыз мамлекетинин түптөлүшүнө өз салымын кошкон тарыхый инсандардын портреттери жана алар жөнүндө жазылган маалыматтар бар. Анын жанында жалпы кыргыздын санжырасын элестүү чагылдырган “Дарак-санжыра” орун алган.
Мында ар түрдүү ыкмалар менен жасалган укумдан-тукумга кылдаттык менен өтүп турган кол өнөрчүлүк буюмдары, ондогон айкелдер жана жүздөгөн сүрөттөр бар. Комплекстеги боз үй, балбал таштар маданий баалуулук катары айырмаланат.
Музейге кирген адам кыргыз дүйнө таанымынын кенендигине, философиясынын тереңдигине суктанбай койбойт. Жер жүзүндө жашап жаткан адам пендесинин улутунун, тутунган диниин айырмачылыктарга караганда анын окшоштуктары, жалпылыктары көп экендигине ынанат.
Комплексте планетардык улуу жазуучу Чынгыз Айтматовдун, белгилүү манасчы Саякбай Каралаевдин, ошондой эле тарыхта аты калган белгилүү саясатчылардын жана өнөр адамдарынын айкелдери орнотулган. “Рух-Ордо” музейинде көл жээгиндеги эң кооз пирсти көрө аласыз. Ал Ысык-Көлдөгү төрт мезгилди символдоштурат. Музейде Түркия Республикасынын негиздөөчүсү Мустафа Кемал Ататүрктүн да айкели бар.
Гиддин айтуусуна караганда Кыргызстандагы бул ири маданий борборго алыс-жакындан келген меймандар көп келет. Алсак, 2018-жылы Түркиянын президенти Режеп Тайип Эрдоган барган. Ал көргөзмө фонду ар дайым жаңы жана кызыктуу экспонаттар менен толукталып, ачык асман алдындагы музейде бир катар расмий иш-чаралар, концерттер жана эл аралык фестивалдар өтүп жаткандыгын кошумчалады. Музейдин кызматкерлери бизге “Рух Ордо” жыл бою ачык экендигин айтып келген конокторду жылуу маанай менен узатып койду.
****
Чолпон-Ата шаарындагы Ысык-Көл мамлекеттик тарыхый маданий корук музейи да келген туристтерди өзүнө тартып турат. Ага киргенде Россия Федерациясынын Иркутск шаарынан келген туристтер бар экен. Бизди илимий агартуу бөлүмүнүн илимий кызматкери Асел Соодакеева коштоп жүрдү. Ал Чолпон-Ата курорттук шаар болгондуктан музейге келген туристтердин саны арбын экендигин, алардын көпчүлүгү жергебиздин байыркы жана орто кылымдагы тарыхына, кыргыз элинин маданий мурастарына, этнографиясына көбүрөөк кызыга тургандыгын белгилеп өттү.
Тааныштыруу анын биринчи бөлүмү — адам баласы пайда болгон таш доорунан калган архелогиялык залда жайгашкан табылгаларды көрсөтүү менен башталды. Андан кийин Б.з.ч. IV кылымдын 40-жылдарында Азов деңизинен тартып Дунайга чейинки скифтер жашаган мезгилге тиешелүү Ак-Өлөңдөн табылган археологиялык эстеликтер тууралуу баяндап берди.
Бул көрүстөндөрдөн жез, алтын, күмүш жасалган идиш-аяктар, карапалар, ар түрдүү кооздук буюмдары табылган. Көптөгөн буюмдар айбанаттар стилинде өтө кызыктуу жасалган. Сүрөттөр алтындан, күмүштөн, темирден жана колодон түрдүү ыкмалар менен жасалып, алардын башаты тотемдик түшүнүктөр аркылуу башталат. Скифтер доорунда жоокерлерге арналган таш балбалдар да өкүм сүргөн. Кызыл-Суу, Оргочордон табылган скиф доорундагы Андронов маданиятына таандык туурасы 50, бийиктиги 10-15 метр болгон жол башчылардын сөөгү коюлган көрүстөн- дөбөлөрдөн табылган коло, алтын буюмдар, канжарлар, жебенин учу, аялдардын жасалгалары жайгашкан.
Б.з.ч. 161-158-жылдардын аралыгында хуннулардан көз каранды эмес деп жарыяланып, “Усун го” – усундардын мамлекети түзүлгөн. Ысык-Көл аймагындагы Чигу шаары (Чигучен – кызыл өрөөндөгү шаар) болгон.
Усундардын доорунда Кыргызстандын жергеси аркылуу Ыраакы Чыгыш менен Жер Ортолук деңизинин аймагын байланыштырып турган Улуу Жибек жолу негизделген. Ушул доордо Кыргызстандын жана ага жамааташ аймактарда жашаган элдердин арасына Индия тараптан буддизм дини кенири жайыла баштап, Кыргызстанга алгачкы жолу башка маданияттардын таасири кучак жая баштаган. Музейден орун алган эскпононаттар аны тастыктап турат. Биздин замандын VI кылымынан тарта Кыргызстандын тагдыры даңазалуу Байыркы Түрк империясынын тарыхы менен тыгыз байланышта болгон. Байыркы Түрк империясынын чек аралары Ыраакы Чыгыштан Жер Ортолук деңиздин аймагына чейин созулуп, бул кеңири аймактар Евразиянын Улуу Жибек жолу байланыштырып турган өлкөлөрүн өз кучагына алып турган. Биринчи Түрк каганатынан өз алдынча Батыш түрк каганаты бөлүнгөндөн кийин Батыш түрктөрдүн «негизги ордосу» Жети-Суу жана Борбордук Теңир-Тоо болуп, анын курамына Орто Азиянын көпчүлүк бөлүгү, Поволжье аймагы, Казахстан, Ал- тай, Жунгария, Чыгыш Түркстан кирген. Ал эми Алтай Батыш түрк каганатынын «чыгыш чек арасы» болгон. Музейде Батыш түрк маданиятына таандык балбал таштар коюлган.
Ысык-Көлдүн түштүк-чыгышында жайгашкан Барскоон шаарында туулуп, Кашкарда билим алган дагы бир даңазалуу аалым — XI к. түрк этнологу, диалектологу, фольклорист, тарыхчы, тилчи, географы Махмуд Кашгариге арналган бөлүмдө анын «Дивану лугат ат-түрк» аттуу эмгеги жана андагы дүйнөнүн тегерек картасынын көчүрмөсү коюлган. Анын картасында Теңир-Тоо тоо системасы, Ысык-Көл, Баласагун, Барсхан, Кочкар-Башы шаарлары көрсөтүлгөн.
Музейге кыргыз элинин 1916-жылда болгон Үркүндө баштан кечирген азап-тозоктуу учурун элестүү чагылдырган материалдар жайгаштырылган. Ошондой эле 1916-жылы Россия империясынын топографтары тарабынан тартылган Чолпон-Атанын картасы бар. Илимий кызматкер Асел Соодакееванын айтуусунда чет элден келген туристтер кыргыздардын уникалдуу турак жайы-боз үйдүн философиялык маанисин түшүндүрүп берүүсүн суранат. Музейдин кызматкерлери аларга «боз үй-көчмөндөрдүн жашоо-турмуш символу, анын босогосу- эне, түндүгү — үй ээси болгон эркек, ууктары — уулдары, керегелери — келиндери, кооздолгон жасалгалары — кыздары» деген түшүнүктү бергендигин айтышат.
Экскурсиянын аягында музейдин директору Гүлүм Алымкожоеваны да сөзгө тарттык. Анын айтуусунда музей 1979-жылы ачылган, анда 13 миңден ашык баалуу эскпонаттар бар. Анын саны жыл сайын артып жатат. Музей 6 бөлүмдөн турат, 42 гектар аянтта петроглифтер жайгашкан аймак да анын карамагында. Музейдин жамааты илимий агартуу жаатындагы жумуштарды ырааттуу жүргүзүп келүүдө. Ошондой эле республикадагы жана чет өлкөлөрдөгү тарых музейлери менен өз ара тажрыйба алмашуу жана кызматташуу боюнча меморандум-келишим түзүп жатат.
«Быйылкы жылы май айында ушул максатта Өзбекстан Республикасынын Кокон шаарындагы мамлекеттик музейдин жетекчилигин чакырдык. Биз да жакында Кокон шаарныа барып келдик. Максатыбыз — Кокон шаарынын мамлекеттик музейи менен кызматташуу аркылуу Кокон хандыгы доорундагы кыргыздарга байланыштуу тарыхый маалыматтарды, жаңы табылгаларды табуу. Мамлекетибиз тарабынан жаңы имарат курулуп калса, ага көчүп чыкканы турабыз. Жамаатыбыз жаңы күч, жаңы дем менен иштейбиз деп турат»,-деди Гүлүм Алымкожоева.
Төлөнбай Абдыразаков, Ош–Чолпон-Ата–Ош