Тээ балалык чактан эле гезит менен тааныш элек. Дегеним, айтылуу Арстанбап жайгашкан Киров атындагы токой чарбасында директордун орун
басары – башкы токойчу болуп иштеген атам Орунбай орус тилин мыкты билген, билимдүү инсан болчу. Анткеним, СССРди дээрлик 30 жыл башкарган Сталин кезинде немец улутундагыларды, чечен улутундагыларды өзүнчө сүргүн кылып аймактарга жиберип, анын ичинде Кыргызстанга да жиберген экен. Ошондо атам, чоң атам менен чоң энем туугандары менен жердеген Арстанбапка, ага жанаша жайгашкан Гүмкана (мурунку аталышы Гүлкана болгон экен кооздугу үчүн, кийин барып-барып Гүмкана делип калган экен) айылына да сүргүнгө немец, чечен улутундагылар келишип байырлашкан экен. Мындан тышкары деле орус улутунлагылар көп жашашат болчу. Жергиликтүүлөр немецтерди деле орус улутундагылар деп билишкен тура. Алар тууралуу көп сөз кылышчу эмес. Анда саясат ошондой эле. Немецтер деле баары эле орусча сүйлөшчү дешет. Көрсө, бул немецтер падышалык Россия убагында эле Германиядан келишип, орус тилди мыкты билип калышкан жергиликтүү улуулардын айтымында.
Гүмкана айылында немецтер бардык жакшы шарттарда жашашкан. Алар үчүн орус тилинде да
балдар бакчасы, мектептер салынып, ишканалар ачылып, үйлөр салынып,бактылуу жашашкан. Аны СССР жоюлганга чейинки курактагылар деле билип
калдык. Бул орус дегендерибиз немец экенин СССР жоюлуп, эгемендүү болгондо билдик. Себеби, биз орустар деген немецтер дээрлик баары үйлөрүн сатышып, Германияга кетип калышты.
Немецтердин ысымдарына, фамилияларына жөнөкөй жергиликтүү калк көңүл бурушпаган тура. Алардын ысымдары Вильгельм, Иосиф ж.б. ушул сыяктуу болчу. Орус тилинен мектепте сабак берген агайыбыздын ысымы Иосиф Тамасович Отто эле. Токой чарбасына деле көбүнчө орус улутундагы адамдар директор болуп иштешкен. Кийинчерээк гана кыргыз улутундагылар да директорлукка дайындалып калды.
Булардын баарын айтып жаткан себебим, ошондо атам ушул орус тилдүүлөр көп болгону үчүн орус тилин жакшы өздөштүргөн экен. 7 класс билим алып, Токмок шаарына токойчулар окуусуна тапшырып, окуп, дипломун алып келген. Билимдүү адам катары жарыктык атам китеп, гезит журналдарды көп окуп, радиону дагы көп укчу, теледен жаңылыктарды үзбөй көрөр эле. Айрыкча, Манас эпосун, Курманбек, Сейтек жөнүндө айтып берээр эле. Олжобай менен Кишимжан ( менин жана эжемдин ысымдарын ушул “Олжобай менен Кишимжан” деген эпостон алып коюшкан, эжем Кишимжан, менин ысымым Канымжан) жана башка эпостор китептери үйдө болор эле. Апам Пазилат да андыктанэпостордон көп айтып берчү, макал, лакаптарды дагы да көп билет эле.
Гезит дегендей, “Ленин жолу”, “Ленинский путь”, “Советтик Кыргызстан”, “Ленинчил жаш” деген гезиттерди, “Чалкан”, “Ала Тоо”, “Ден соолук” деген журналдарды үйгө алып келчү. Мен өзүм дагы адабиятка көп кызыгып, мектептин, токой чарбасынын китепканаларынан чыкчу эмесмин. Китепканачы эжекебиз Бүзира Курманалиева азыр көрсө да ошо китепканадан чыкпаганымы айта берет. Сөз башында айтылгандай, гезит менен таанышып, окуп чоңойдук. Утуру жаңы алып келген гезиттер өзгөчө боек жыттанып турат эле. Мектепте дубал гезитке алгач мүчө, кийин редактор болуп, жазып, аракеттенет элек. Мектепти аяктаган соң, Россиянын Саратов шаарындагы Н.Г.Чернышевский атындагы университетине тапшырып, журналистика боюнча адистикке ээ болдум. Ошол мезгилдеги шарт боюнча 2 жыл Саратовдогу гезитте иштедим. 1989-жылы “Ленин жолу” гезитине корректорболуп ишке орноштум. Ал кезде тажрыйбалуу жетекчи Шайлообек Мойдунов башкы редактор экен. Адегенде мени : “Сен Базар-Коргондук экенсиң, ишке албаймын”деп албай койду. Кийин компартиянын Ош обкомунун кйилигишүүсү менен алды.Албайм дегенинин себеби, мен кызматкаорношкону келгенде редактордун үстүнөн “жердештерин баарын жумушка алып жатат” деген арыз түшүп, эми эле арыз каралып бүткөн экен. Дагы үстүмөн арыз жазып жиберишпесин деп чочулаган окшойт азыр эстесем. Эки ай корректор болуп иштегенден кийин котормо бөлүмүндө котормочу болуп иштедим. Кийин бөлүм башчы, жооптуу катчы, башкы редактордун орун басары,
башкы редактор кызматтарында иштедим. Учурда жооптуу катчымын. Негизи газетада иштгениме быйыл туура34 жыл болду. Бул жылдар ичинде көптөгөн башкы редакторлор, журналисттер менен чогуу иштедик. Алардын насаатын, жакшы сөздөрүн уктук, достошуп, бир туугандай болуп калдык. Редакторлор Шайлообек Мойдунов, Аскарбек Сыдыков, Абибилла Пазылов, Жапаркул Ташиев, Талантбек
Моңолбаев, Мамырайым Дубанаев, Абдувахап Монуев, Гүлжамал Жороева, Маматазим Жуманазаров менен ынтымакта чогуу иштедик. Кесиптештер Эдилкан Сыргабав, Сейит Аминов, Бүажар Калматова, Калия Карыбекова, Зинакан Пасаңова, Анара Суракматова, Бурма Ысакова, Динара Жусупбекова, Ризван Исмаилова, Айгүл Матиева, Гүлбара Мамазияева, Назгүл Өмүрзакова, Айбек Абдылдаев, корректор Гүлүмкан Ташбаева, машинистка Тургун Жакшыбаева, иш алып баруучу Майрам Калыкова ж.б. менен көп жылдардан бирге иштедик, иштеп да жатабыз. Айрымдары ардактуу эс алууда. Гезит басмакана менен бирге жайгашып, тамга теримчилер Зыйнат эже, Саламат эже, Үрүнса эже, Бурма эже ( раматылык) биз менен бирге түнү-күнү дебей иштешти. Гезиттин чыгуусуна жооптуу, кийин жооптуу катчы болуп иштеген Ашым Жанболотов да иш илгерилеткен кызматкерлерден болду. Кээ бир кесиптештер маркум болуп кетишти. Редакторлор Аскарбек Сыдыков, Шайлообек Мойдунов, Талантбек Моңолбаев, Абдувахап Мониев, журналисттер Бозон Мамасалиев, Ысак Жумабеков, Эсен Тиллебаев, Абдыжапар Жээнбеков, Жыпар Акунова, машинисткалар Гуля Аблазова, Ибарат эже, фотосүрөтчү Манас Жакыпов жамаатташтардын эсинде.
Уюткулуу, ары барктуу, ары нарктуу, биз менен тагдырлаш болгон сүйүктүү гезитибизге учурда мурун өзүбүздө кабарчы болуп иштеген Каракозуев Асанбек Курманбекович 85 жылдык маараке чегине башкы редактор болуп келди. Анын ийкем жетекчилиги менен мамлекетибиз жана элибиз үчүн медиа айдыңында маалыматтарды, окуяларды жеткирип, руханий азык болгон чыгармаларды жарыкка чыгарып мындан ары да арымыбыз улана бермекчи.
К.Кыдыралиева