«Ош жаңырыгы» гезитибиздин тарыхы тээ өткөн кылымдын башталышына барат. Ошо жыйырманчы кылымда 1938-жылы 14-октябрда биринчи номери чыккан. Биринчи редактору Төлөгөн Жумабеков аттуу инсан болгон. Гезитибиз алгач латын тилинде жарык көргөн. Себеби, Кыргызстан СССР мезгилинде адеп большевиктердин катарында автономиялуу облус, кийин республика болгон мезгилдерде ариби жок болуп, (негизи кыргыз элибиздин Орхон жазуулары делип ариби болгон, анан тарых деле бурмаланып, жазуу тиешелүү себептерден пайдаланылбай калган) алгач араб арибин кабыл алып, кийин латын арибин кабыл алган. Так ошол гезитибиз жарык көргөн мезгилде латын ариби пайдаланылган. Андыктан гезиттин биринчи номери “Кыргызстан большевиги” деп аталып латын арибинде жарык көргөн. Кийин 1940 жылы “Ленин жолу” болуп өзгөргөн. СССР державасы 1991-жылы августта кыйраган соң, “Ош жаңырыгы” аталышында чыга баштады. Албетте, Кыргызстан мамлекетибиз кириллицага, орус арибине өткөндүгүнө айланыштуу гезитибиз да орус алфавитинде чыга баштаган.
Ошо кыргыз элинин тарыхына тамырлаш, тагдырлаш нускалуу, ооматтуу гезитибизде өлкөбүздө болгон бардык окуялар, дүйнө жаңылыктары маалымдалып турган. Чыгармалар, ырлар, аңгемелер жарыяланган. Негизи коом эмне менен дем алып, эмне менен жашаганын ошол кезде жарык көргөн гезитибизди барактап олтуруп таанышасың. Көрүнүктүү инсандар, эмгек алдыңкылары, жөнөкөй эмгекчилер, не деген ири курулуштар курулганы, не деген маданий обьектилери курулган — баары гезит бетинде тарых болуп жазылып, сүрөткө тартылып калган.
Гезит-тарых барактары десек болот. Гезитибизин жарык көргөн күндөн баштап архивде сакталып келиши өтө маанилүү. Азыр дагы ошол алгачкы жарык көргөн гезит номерлериин ар бир жылы өзүнчө китеп болуп тигилип, алтындай болуп архивде сакталып турат. Архив кызматынын Ош облустук башкармалыгында, Т.Сатылганов атындагы облустук китепканада гезиттер тамгалары жаркырап, сүрөттөрү да даана ошол күнкү эле көрүнүшүндө сакталуу турат. Биздин гезиттен илимий иш жазса да болот. Айтайын дегеним, санарип заманында баары техникада сакталат. Керек болсо өчүп калат. Анча-мынча сайт дегендер бат эле өчүп калат. Ал эми гезит күнү бүгүнкүдөй сакталат.
К.Кыдыралиева