“Ош жаңырыгы” гезити өзүнүн бир кылымга тете тарых жолунда коомубузга, калкыбызга маалымат жеткирүүчүлүк, агартуучулук жана жалпы өнүгүү багытында үлкөн салым кошуп келатат. Уюшулуп биринчи номерин жарыкка чыгаргандан бери тарых күзгүсү болуп, мамлекетте жана дүйнөдө эмне жаңылыктар, кандай окуялар болгонун, өлкө кандай өзгөрүүлөрдү башынан өткөргөнүн, кандай жетишкендиктер, маселелер болгонун калтырбай калың элге жеткирип, өз жамааты менен арыбай кадамын арбытып барууда.
Айтайын дегенибиз, маалым болгондой, алгач 1938-жылдын 14-октябрынан “Кыргызстан большевиги”, кийин 1940-жылдан “Ленин жолу” 1991-жылдан “Ош жаңырыгы” деген аталыш менен маалымат айдыңында ат салышып, мезгил ашып келаткан гезитибиздин ишин жөнгө салып, жамаатты ынтымак-ырашкердикте жетектеп, гезитибиздин редакциясынын ишин илгерилеткен жетекчи-башкы редакторлордун чаалыкпаган эмгегин баалайбай коюуга болбойт эмеспи. Алардын ар бирине – ардак. Жаңы эле гезит түптөлгөндөгүдөн тартып Улуу Ата-Мекендик согуштагы кыйынчылыкта, андан кийинки согуштун кесепеттеринен арылып, калыптандыруу мезгилинде, дагы кийинки өркүндөө жана өнүгүү мезгилинде, СССР таркап, жашоо жеңил эмес болгон, мамлекетибиз Эгемендикке ээ болгон мезгилдин алгачкы жылдарында, бүгүнкү “облустук гезиттер жоюлат, жабылат” деген ойлондурган чакта да гезит ишин, жамаатты башкарып аткан редакторлордун да ролун айтууга татыйт.
Ошол мамлекетибиз Эгемен болгондон кийинки оорчулук мезгилде газетабызга башкы редактор болуу туш келген Ташиев Жапаркул Актаевич тууралуу гезитибиздин 85 жылдык маараке майрамында сыймык менен айтсак жарашат. Каарманыбыз жөнүндө айтып жатып, анын өмүр баянына токтоло кетсек эп болот. Ташиев Жапаркул Актаевич 1960-жылы 28-январда Өзгөн районунун Жалпак-Таш айылында туулган. Орто мектепти аяктаган соң, 1983-жылы Россия Федерациясынын борбор шаары Москвадагы дүйнөгө таанымал, айтылуу М.В.Ломоносов атындагы мамлекеттик университетин «журналистика» адистиги боюнча бүтүргөн.
Эмгек жолунда 1983-1985 жылдары Кара-Суу районундагы «Эмгек туусу» көп тираждуу газетасында редактор болуп иштеген. 1985-жылдан 1986-жылга чейин Кара-Суу райондук Эл депутататтары Кеңешинин райондук аткаруу комитетинин инструктору болуп эмгектенген. 1986-жылдан 1987-жылга чейин «Советтик Кыргызстан» гезитинин редакциясында кабарчы, 1987-жылдан 1989-жылга чейин Кыргыз ССРинин Жогорку Советинин Президиумунун Кеңештердин иштери боюнча бөлүмүнүн кеңешчиси, 1987-жылдан 1989-жылга чейин Кыргыз ССРинин Жогорку Советинин Президиумунун Уюштуруу иштеринин протокол боюнча улуу кеңешчиси болуп иштеп турган.
Ал эми 1989-1990-жылдары Кыргызстан коммунисттик партиясынын Ош облустук комитетинде идеология бөлүмүнүн инструктору, 1990-1991-жылдары СССР Жогорку Советинин Секретариатында актыларды жарыялоо бөлүмүндө кыргыз тобунун кеңешчи — бөлүм башчысы (Москва шаарында) болуп иштеген.
1991-1993-жылдары Ош облустук «Ленин жолу» гезитинин редактору болуп эмгектенген. 1993-1994 жылдары Ош облустук мамлекеттик администрациясынын башчысынын орун басары, 20.07.1994-20.12.1994-жылы Ош облустук мамлекеттик администрациясынын аппарат жетекчиси кызматтарында иштеген. 1994-1995-жылдары Ош облустук мамлекеттик администрациясынын башчысынын социалдык-маданий мекемелеринин, улуттар аралык мамилелердин жана коомдук бирикмелердин маселелери боюнча орун басары кызматтарында эмгектенген. 1995-1997-жылдары Кыргыз Республикасынын Өкмөтүнүн Аппаратынын реформалар саясатынын идеология жана маалыматтык камсыздоо бөлүмүнүн референти кызматын аркалаган. 1997-2006-жылдары «Кыргыз Туусу» гезитинин башкы редакторунун орун басары, 2006-2009-жылдары Ош облустук «Ош жаңырыгы» гезитинин башкы редактору болуп иштеген жана Ош облустук мамлекеттик администрациясынын коллегия мүчөсү болгон. 2009-2012-жылдары Кыргыз Республикасынын Эмгек, калкты жумуш менен камсыздоо жана миграция министрлигинин алдындагы Кесиптик-техникалык билим берүү агенттигинин директорунун кеңешчиси болуп иштеген.
2010-2012-жылдары Кыргыз Республикасынын Эмгек, калкты жумуш менен камсыздоо жана миграция министрлигинин алдындагы Кесиптик техникалык билим берүү агенттигинин директорунун орун басары болуп иштеген. 2012-2018-жылдары Кыргыз Республикасынын Өкмөтүнүн алдындагы Интеллектуалдык менчик жана инновациялар боюнча мамлекеттик кызматынын статс-катчысы болгон. 2018-2021-жылдары Кыргыз Республикасынын Билим берүү жана илим министрлигинин статс-катчысы, 2021-жылдын 27 майынан тартып Кыргыз Республикасынын Саламаттыкты сактоо министрлигинин статс-катчысы кызматтарында эмгектенген. Учурда аталган министрликтин орун басары кызматында иштеп жатат. Запастагы майор, Мамлекеттик кызматтын 3 класстагы мамлекеттик кеңешчиси.
Жапаркул Ташиев редакцияда редактор болуп иштеп, эмгеги сиңген белдүү, артынан жакшы ой, мыкты пикир калтырган жетекчи. Жамаатта жана коомчулукта кадыр-барктуу, адискөй, редакциянын да, коомдук иштердин да прогрессивдүү болушунда жаш жана алдыңкы көз караштагы, активдүү, чечкиндүү, кең көз караштагы, цивилизациялуу өнүгүү кадамын карманган башчы болду. Союз ыдырап, мурунку коомдук-экономикалык формация, бүтүндөй система түп тамырынан өзгөрүп, эгемендүү Кыргызстан өз алдынча өнүгүп, “Кыргыз ССРи” деген союздук республикабыз жоюлуп, укуктук-демократиялуу өнүгүү жолуна түшкөн эгемендүү Кыргыз Республикасы болду. Конституция, Гимн, Туу, Герби бар көз карандысыз, өз алдынча мамлекет болдук. Ошол өзгөрүү гезитке түздөн-түз таасирин тийгизди.
“Ленин жолу” деген гезитибиздин аталышын эми кандай деп өзгөртөбүз деген маселе пайда болду. Ошондо башкы редактор Жапаркул Ташиев Ош облустук мамлекеттик администрациясы (мурун Кыргыз ССРинин компартиясынын Ош обкому делчү жана гезит анын органы болгон, Союз жоюлган соң, Ош облустук мамлекеттик администрациясы деп аталып калды, учурда КР Президентинин Ош облусундагы ыйгарым укуктуу өкүлчүлүгү болуп калды. Гезитибиз болсо КР Маданият, маалымат, спорт жана жаштар саясаты министрлигине карап калды) менен макулдашып, сынактын негизинде “Ош жаңырыгы” деген аталышта алды. 1991-жылы 31-августта Кыргыз Республикасы эгемен мамлекет болгон соң, “Ош жаңырыгы” деген аталышка гезитибиз да өзгөрдү. Бул аталыштын жаралышына, албетте, Жапаркул Ташиевдин, жамааттын салымы чоң. Ошол күндөн баштап гезитибиздин да аталышы жаңырып, өркүндөп-өсүп, маалымат айдыңында жамаатыбыз жигердүү иштеп, мамлекетке жана калайык-калкка кызмат кылып келүүдөбүз. Ошол эгемендүүлүктүн алгачкы кыйынчылык жылдарында бардык эле ишкана-мекемелер чарбалык жана башка кыйынчылыктарга тушукканы маалым. Кээ бир ири ишканалардан тартып, чакан мекемелер деле жоюлуп кетти. Себеби, СССР мезгилиндеги 15 республикалар аралык экономикалык байланыштар үзүлүп, чийки зат жана башка каражаттар жетишпей, иштөө кыйындаган. Бардык тармактарда реформалар жүргүзүлүп, эмгек акы, пенсия, жөлөкпулдар чай, самын жана башка товарлар менен төлөнүп калган учурлар болгон, казынада акча жетишпей. Ошондой кыйынчылык мезгилде редакцияда башкы редактор болуп иштеген Жапаркул Ташиев гезиттин бир дагы номерин калтырбай, үзгүлтүксүз чыгарып, жамааттын эмгек акысын кечиктирбей ай сайын берип турган. Ал эле эмес, кварталдык сыйлык да берээр эле.
Кыргызстанда союз мезгилиндеги пландуу экономиканын ордуна базар экономикасы келип, чарба иштерин жүргүзүү өзгөргөн эгемендүүлүктүн алгачкы мезгилинде, түрдүү чакан ишканалар, фермердик, дыйкан чарбалары, жоопкерчилиги чектелген уюмдар, кредиттик союздар, банктар, микрокредиттик компаниялар ж.б. жеке сектордогу мекемелер пайда болуп, өз ара келишимдик кызматташуулар келип чыкты.
Гезиттин чарба иштерин ошо базар экономикасынын эрежесине ылайыктап, иш алып баруу керек болгон. Айрым гезиттер базар экономикасына ыктай албай, айлап чыкпай же жабылып деле калган учурлар болгон. Ошондо уюштуруучулук иштерин колго алган Жапаркул Ташиев Кыргызстанда биринчилерден болуп гезиттин чарбалык иштери жакшыртууга бел байлаган. Гезитке жазылуу иштерин жүргүзүү, жарнама, агартуу иштерин заман талабына ылайык жүргүзүүнү активдештирип, башка ишкана-мекемелер, уюмдар менен кызматташууну жолго салып, басма ишинде алар менен, жеке тараптар менен келишим түзүүнүн негизинде ишти жолго койгон. Ошол эле мезгилде гезитте иштеген журналисттерге стимул катары, келишим түзүп, кызматташуу аркылуу кошкон салымынан сыйлык берүүнү уюштурган жана аларга материалдык жактан колдоо көрсөткөн. Эң башкысы, базар экономикасынын шарттарынын башталышында, кыйынчылык күндөрдө “Ош жаңырыгы” гезитинин сакталып жана өркүндөшүнө чоң салым кошкон редактор болду.
Гезиттин өнүгүшүндө өлкөдөгү жөнөкөй эмес бурулуш жылдары жетекчи катары арыбай иштеп, чоң эмгек жасаган Жапаркул Ташиевдин ишине бекем ден соолук жана ишине ийгиликтерди каалайбыз. Үй-бүлөсү, неберелери менен аман болушсун. Баса, өмүрлүк жубайы Замира Келдибаева да Москвадагы М.В.Ломоносов атындагы университеттин журналистика факультетин чогуу окуп, бүтүргөн. “Кыргыз Туусу” жана башка республикалык гезиттерде иштеген. Биздин гезитте да бөлүм башчы кызматында эмгектенген.
Кесиптешибиз Жапаркул Ташиев жубайы Замира Келдибаева менен төрт перзенттүү болушуп, аларды окутуп, тарбиялашып, татыктуу кесипке ээ кылышып, неберелеринин чекесинен сүйүп, кубанып жүрүшкөн чактары.
Канымжан Кыдыралиева