Жаңылык. Жаңырык. Убакыт өтүп көп нерсе жаңырып турмуштун чоң дайрасында агылып отуруп биз сүйгөн «Ош жаңырыгы» гезитибиз үстүбүздөгү жылы 85 жашка толуп отурат. Эң биринчи саны 1938-жылы 14-октябрда «Кыргызстан большевиги» деген ат менен жарык көрүп, күндө жаңы саны чыгып элге жетип турган.
1940-жылы аты өзгөрүлүп «Ленин жолу» деп аталып, союз тараганга чейин жалпы элдин сүйгөн газетасы болуп кызмат кылган. Коом өсүп, өзгөрүлүп СССРдин таралышы менен 1991-жылдан баштап «Ош жаңырыгы» болуп аталып калды.
Гезит мамлекетибиздин саясый, экономикалык кызыкчылыгынан тартып жаш балдарга арналган материалдарга чейин жарык көрүп жарыяланат. Болгон окуя жаңылыктарды өз убагында туура чагылдырып элге жеткирүүдө мында иштеген кабарчы журналисттердин эмгеги зор. Мезгилдин кайсы учуру болбосун жаңылык жарчылары журналисттер дайым ат үстүндө. Азыр техника өнүккөн учурда дагы газета өз окурмандарын жоготпой келүүсүнүн себеби дагы ошол көз караштарды туура чагылдырып кызыктуу чыгарган эмгек жамаатынын талбаган эмгеги. «Ош жаңырыгы» – кутман курагың кут болсун. Жалпы журттун катмарына сиңип окурмандардын сүйгөн гезити бол. Элиң үчүн кылымдар бою кызматта жүр.
Көпчүлүк окурмандар сыяктуу мен да сени сүйүп окуган окурманыңмын.
Жыргал Өмүрзакова, Алай району