“Ленин жолу”, азыркы “Ош жаңырыгы” аталышындагы облустук гезитинин 85 жылдык мааракеси майрамдалуу алдында турат. Бул мага көп нерсени эстетти. Бул гезиттин редакциясында канчалаган залкар жазучулар, чыгаан журналисттер, калемдештер иштешти. Ушул газетанын биринчи номерин чыгарып, кийин түптөп, калыптандырып, өнүктүрүп келген чоң жамаатта жүздөгөн калем ээлери жан үрөп иштешти.
Бул редакцияда Улуу Ата-Мекендик согушта кан майданда ажалга тике караган мекенди коргоп келгендер да талыкпай эмгектенишкен. Алардын бири Сооронбай Жусуев эле. Кийин борбор шаар Фрунзеге, азыркы Бишкек шаарында жашап, иштеп калды. Кыргыз Республикасынын Баатыры болду бул киши. “Ош жаңырыгына” кез-кезде келип, жолугуп да турчу. Анын насаатын жаш калемгерлер алып калышты. Айтышыбыз керек, бул инсан чыгармачылыгы, коомдук иштери менен кыргыз коомчулугуна үлгү катары көп эмгегин калтырды. Мындан тышкары, Жумабек Келешбаев агайыбыз да Улуу Ата-Мекендик согушка катышкан. Ошондой эле Узак Турсункулов, Бекбото Примкулов да Улуу Ата Мекендик согушка катышып, жергебизде тынчтык орнотууга кан жанын аяшкан эмес жарыктыктар.
Ушундай таасирдүү, белдүү журналисттер иштеген түптүү гезит тарых жолун татыктуу улантып келүүдө. Биз да жаш кезде баш багып, мында иштешкен чыгармачыл жамаат менен жолугушуп, макала, чыгармаларыбызды жарыялап турар элек. Редакцияда көп жыл Асылкан Бөрүбаев жетектеп, иштеди. Шайлообек Мойдунов, Аскарбек Сыдыков, Талантбек Шарипов жана башка бир топ редакторлор гезит ишин өркүндөтүп, маалыматттарды, окуяларды жарыкка чыгарып, заман менен теңтайлаш иштешти. Гезиттин нускасын көбөйтүп, окурмандарды арттырышты. Гезит жамааты сын макалаларды да жарыялашып, көйгөйлөрдү чечүүгө дагы салымын кошту. Эмгек алдыңкылары, чабан, саанчы, тракторчу, мугалим, дарыгер, учкуч, тигүүчү, токуучу, айдоочу, дыйкан, пахтакер, кондитер, бригадир, артист, өтүкчү жана башка түрдүү кесиптеги, түрдүү тагдырдагы инсандар менен таанышат элек гезит бетинен. Аябай кызыктуу, мазмундуу, маанилүү гезит “Ош жаңырыгын” дайыма окуп жүрөм.
Гезиттин жамаатын 85 жылдык маараке майрамы менен куттуктаймын, ден соолугуңар бекем, ишиңер дайыма илгери болсун.
Салима Шарипова, “Ош” альманахынын редактору, жазуучу, акын, коомдук ишмер