«Жаштын тилегин берет» деген сөзгө дагы бир ирет ынанып отурам. Андай дегенимдин себеби, кызым Айдай бала кезинен кыялдаган кесибине жетип, анын үзүрүн көрүп, эмгектенип келүүдө. Айдай Дубайдагы улуттук «Этихад» авиакомпаниясынын окуу академиясынан билим алып, аны ийгиликтүү аяктап, диплом алган соң, сүйүктүү кызматына киришип, алты айлык сыноодон да өтүп, асман карлыгачына айланды, мындайча айтканда стюардесса болуп иштөөдө. Албетте, ар бир баланын ийгилиги ата-эненин кубанычы да. Алыста жүргөн балдары менен күндө кабарлашып турган ар бир ата-эненин жүрөгү тынч болсун деген ниет менин да жүрөгүмдө сакталып келет. Дегенимдей, Айдай кызымдын чакыруусу менен Дубайга эс алууга барып келдик. Албетте,кызым атасын, эки инисин кошуп, төртөөбүзгө виза ачтырып, билет алып, бардыгын камсыздап берди. Борбордогу Манас аба майданынан Бириккен Араб Эмиратынын борбору болгон Абу-Даби жергесине барып кондук. Самолетто дээрлик беш сааттай абада калкып учтук окшойт. Мурда анча маани бербеген экем, стюардессаларды астейдил карап отурдум. Алардын кыймыл аракетин, сүйлөгөн сөздөрүн, жасаган жумуштарын беш саат көз албай сарасеп салып бардым. «Менин кызым да ушулардай иштейт да» деп сыймыктануу жүрөгүмдө толкундантып турду. Англис тилинде сүйлөшкөндүктөн, аларга кызыккан суроолорумду бере албай, жым гана ордумда отурдум. Тил билбесең ушул экен да. Жанымда сапарлашым нарындык Айгүл деген кыз экен. Бир жылдан бери Абу-Дабиде эмгектенип жатканын айтты. Алыс жолду жакын кылып, ал менен божурашып отурдум. Ошентип «Этихаддын» аба майданына конгондо, самолет айдаган капитаныбыз жеттик деди окшойт го, баары кол чаап киришти. Самолет коноору менен ааламдай кең шаарда адашып кетчүүдө алаңдадым окшойт, Айгүлдүн телефонунан кызыма коңгуроо кылууга да жетиштим. Кызым аэропортто бизди күтүп турганын айтты. «Апа, шашпай чыга бериңиздер, телефонун берген кызга айтыңыз каралашсын»-деди. Ошентип, самолеттон түшөөрүбүз менен үп тарткан аба бетке уруп, бул жактан калың кийим менен баргандыктан, тер баса баштады. Үстүбүздөгү калың кийимдерди чечип, жеңилденип алдык.
Аэропорттогу текшерүүдө бизге кезек келгенде сылык мамилелери менен колдорун ишаарат кылып көрсөтүп, түшүндүрүп жатышты. Тил билбегендер менен иштеше берип үйрөнүп деле калышыптыр кургандар. Ошентип текшерүү дегени камераны бир эле жолу кароо турбайбы. Бишкектегидей азап жок экенине кубанганымды жашыра албайм. «Этихаддын» аэропортунда тепкичтердин жанына өзү жылчу эскалаторлор бар экен. Аэропорт ушунчалык чоң болгондуктан, чарчаган жүргүнчүлөр эскалатор менен жылып, сыртка чыгууга багыт алышат экен. Кызым Австралиядан 20 саат учуп келип, жаңы гана аэропортко келген экен. Бишкектин самолету качан конот деп кесиптештеринен сураса, конду, азыр жүргүнчүлөр түшүрүлөт дешиптир. Үйүнө барып келүүгө үлгүрбөшүн билип, бизди эки чоң чемоданы менен биз телефондон көргөн чырайлуу униформасы менен көзүнө кубанычтын жашын алып, ооздо күтүп туруптур.
Ата-эне, бир туугандары менен үч ай аралыкта сагынышкан жолугушууну сөз менен жеткире албайм. Аэропортто бизди көргөндөр бизди тегеректеп да алышты. Видеого да тартып, кол чаап, кубаттап турушту. Элдин маданияттулугуна тан бердим. Ошентип, бизди күтүп турган турагентствонун айдоочусу Дубайды көздөй жол тартты. Айдоочу англис тилинде бизге суроо узатат, кызым которуп берип жатты. Зымылдаган жол менен бир саатка жетпей Дубайдын Марина деген районуна жетип бардык. «Мarina View» деген отелден алдын ала брондолгон комнатабыздын ачкычын ресепшндеги жигит кызыма карматты. Лифт менен зуулдап бийиктикке көтөрүлүп, комнатабызга да кирип бардык. Эки бөлмөлүү номерге кирээрибиз менен узун-туурабыздан жатып, «өх» деп жеңилдей түштүк. Кызым менен божурашып, таңдын атканын деле билбей калдык.
Бизди көргөнүнө кубанган бала кыялдуу кызым атасына, мага эркелеп, инилерин кучактап өөп, сагыныч таратып отурдук. Ошентип, эрте мененки тамактанууга мейманкананын ресторанына түштүк. Чындыгында швед столу сыяктуу тамактын элүүдөй түрү тизилип коюлган. Жашылча-жемиштер кооздолуп кесилген, таттуунун түрү, кофе, чай деги эле көрүп көзүң тойбойт. Тамактанган соң, сууга чөмүлүп, эс алуу үчүн океан жээгине жол тарттык. Океандын суусунун жылуулугу, жээгиндеги кумунун майдалыгы абдан жакты. Сууга түшсөң чыккың келбейт. Баса, Айдай үч ай мурун эжесин – чоң кызым Айсулууну да Дубайга алып кеткен. Бир тууганга колдоо көрсөтүү сыяктуу бир туугандык вазийпаны кулактарына куюп, өзүм көргөн тарбияны балдарыма берүүгө аракет кылганмын. Мына ушул эмгегимдин акыбети болду окшойт, Кыргызстанда арзыбаган айлык менен жүрө бересиң, Дубайга барып иштеп, бутуңа туруп ал деп акыл болгон сиңдисинин сөздөрүнө ынанып, Айсулуум да Дубайга кеткен болчу. Пляжга барып, эс алып отурсак, Айсулуум да келип калды. Өзү кичинекей болсо да, акылы тоодой кызым бизди сагынып калыптыр. Инилерин эркелетип отурду. Жаратканыма чексиз шүгүр келтирем, үй-бүлөм менен Дубайда жолугуп, балдарым менен чогуу кубанычтуу учурларды өткөргөн насип болгонуна. Дегенимдей, айтылуу Дубайга болгон эс алуу сапарыбыз кубанычтуу мүнөттөр менен коштолду. Дубай деген Дубай тура. Мурда-кийин интернеттен көрүп жүргөн өлкөнү өз көзүң менен көрүү башкача экен. Асман тиреген бийик имараттар көз жоосун алат. Дубайдын тазалыгы, көчөлөрүнүн көрктүүлүгү көз уялтат. Көчөдө жүргөн ар бир туристиби, келген меймандыбы, айтор, көчөсүнүн тазалыгы эле тартипке чакырып коет экен. Себеби, асфальттары таптаза, тоголок кыл жатпаган көчөгө таштанды таштоодон, чылым чегип ыргытуу, жосунсуз жорук болгон түкүрүнүп булгоодон да уялаарың анык. Дубай өлкөсү иш берүүчүлүк тарабынан аябай өнүгүптүр.
Кайсыл жерге кирбе, башка улуттун өкүлдөрү иштеп жатканын көрүүгө болот. Дубайда Инди океанынын жээгине укмуштуудай эс алуучу жайлар курулуп, тейлөө кызматы алдына ат салдырбайт. Ар бир кызматтын эмгегин баалай билүүнү, иштеп жүргөн жарандарга адилет мамиле кылууну, биз дал ушул Дубайдан үйрөнсөк болчудай. Кийинки күнү Абу-Дабидеги айтылуу жаныбарлар паркына барууну туура көрдүк.
Абу-Дабиге баруучу эки автоунаа жолу бар экен. Бир жолу менен барсаң бекер, бирок, бир аз узагыраак жол жүрөсүң. Ал эми экинчи жолуна акча төлөнөт экен, бирок, бат жетесиң. Биз эки жол менен тең жүрүп көрдүк. Айтылуу зоопаркта пил, жираф, бегемот, крокодил айтор, жаныбарлардын бардык түрүн көрүүгө болот. Мындагы тейлөө кызматы да мыктыланыптыр. Абу-Дабидеги беш кабаттуу азыркы тил менен айтканда Моллго кирсек, жергиликтүү араб тургундарын дал ушул жерден көрдүк. Кээ бири экиден жубайларын ээрчитип алдыда баратышса, балдарынын сумкасын асынган, коляскага жаш баласын сүдүрөп алардын артынан бара жаткан филиппин, тай улутундагы аялдарды көрүүгө болот. Анткени алар арабдардын бала багуучусу болуп иштешет экен. Дубайда айлык маяна жакшы төлөнгөнү менен мындагы кымбатчылык ошого жараша тура. Бир дирхамды сомго чагып эсептеп алып, төбө чачым тик турганын айтпасам болбос. Биздеги арзан буюмдар, ал жакта үч-төрт эсе кымбат экенин көрүп, ичим тызылдай түштү.
Дубайдагы айтылуу дүйнөдөгү эң бийик имарат болгон Бурдж-Халифага бардык, анын тегерегиндеги түстүү фонтанды да жеринен көрүп, мындагы көп туристтерди байкадык. Ал эми Дубайдагы «Гүлдөр багына» баргандагы суктануумду сүрөттөй албасам керек. Гүлдөрдүн миңдеген түрү эгилген гүл бакчага бара жатканда эле гүлдөрдүн жыпар жыты аңкып турат. Бакты кыдырып, анын ичиндеги түрдүү формаларга салынып эгилген гүлдөрдүн гүлдөп турушун көрүп, ушундай ысыкта да аларды астейдил карап, бапестеп өстүрүп, бажырайып гүлдөп турушуна кандай гана эмгектерди жумшаганына баа бердим. Мультфилимдеги каармандардын элеси, белгилүү «Белоснежка» жомогундагы гномиктердин үйлөрү нускалап көчүрүлгөндөй. Айтор, сары кумду, кагыраган чөлдү гүлгө айландырган жергиликтүүлөрдүн эмгегине эсим ооду. Ал эми тез жүрүүчү метросу асма көпүрө сыяктуу атайын бийикке курулган жолдо жүрөт экен. Анын айдоочусу жок, компьютер башкарып, ар үч мүнөт сайын станцияларга токтоп турат экен. Метро вагондору алтын, күмүш, бронза деген үч бөлүккө бөлүнүп, ар бир салонго өзүнчө карта сатылат экен. Кызымдын алып берген алтын картасы менен алтын бөлүгүндө жүрүп, Дубайдын кечине да, таңына да күбө болдук. Баарынан да Айдайдын беш жылдыздуу кемеге уюштурган кечки тамагын кубануу менен эстеп келебиз. Ар бир кеме океандын ийне сайсаң көрүнгүс капкараңгы жерине чейин сүзүп барып, анан артка кайтат экен. Океандын чексиздиги, сүрдүүлүгү дал ошол учурда байкалаарын көзүм менен көрдүм. Атайын чектелген жерге темир тосмо коюп коюшкан. Себеби, андан ары сүзүп кетсе, анда океандын кеңдигине өтүп кетүү коркунучу бар экен. Кемеде уюшулган кечки тамак да швед столундай тура. Каалаган тамагыңды салып келип, ырахаттанып эс алып отурууга сонун экен. Мындагы атайын коюлган шоулар, кемедеги концерттик программалар адамдын көңүлүн көтөрүп, чарчооңду унуткарат.
Дубайдан дагы бир көзүмө урунуп, көңүлүмдү бурган нерсе, айдоочулардын автоунаа айдоосунда болду. Себеби, өтө кылдаттык менен бир темпте айдаган машиналарды көрүп, автоунааны айдоочу эмес, роботтор башкарып бара жаткандай сезилди. Жол коопсуздугуна укмуш көңүл бурулганына ынандым.
Андан да бир нерсе, курулушу кучак жайсада, Дубайда дагы деле жаңы курулуштар курулуп жаткандагысын көрүп, «аз эле убакытта ушунча өнүгүпсүңөр, дагы каягына өнүгөсүңөр» деген суктануумду шыбырап да, үнүмдү чыгырап да айтып жүрдүм. Ал жерде мени ким түшүнмөк эле. Биз эс алган Марина районунан кыргыздарды бир да көрбөдүк. Орус улутундагылар менен индиядан келгендерди көп байкадык. Деги эле, Өзбегим ресторанына барганыбызды, «Дубай Моллду» түрө кыдырып, көргөн-билгендеримди, алган таасирлеримди жаза берсем кагаз бетине батпайт. Он күндүк үй-бүлөлүк эс алуубуз көңүлдөгүдөй өтүп, өз мекенибизге кайтып келдик. Андык- тан Дубайды көрүп, эс алып келүү ар бир пендеге насип этсин.
Назгүл Өмүрзакова