Азыркы «ЭлТР » мамлекетттик телерадиокомпаниясы 1967-жылы Кыргыз ССРнин Министрлер Советинин алдындагы радиоуктуруу жана телекөрсөтүү комитетинин коллегиясында Ош облусу боюнча башкы редакциясы катары негизделген. Ал 1968-жылы 20-январда кечки саат 20.00дө эфирге чыккан. Бул күн «ЭлТР » мамлекетттик телерадиокомпаниясынын түзүлгөн күнү болуп калган. Ош областтык радиокомитетин Толтой Алдыраков жетектеп, Жолон Мамытов, Курбаналы Сабыров жана Абдужалил Сулайманов түштүк аймактагы радиожурналистиканын алгачкы борозун салышып, бутуна тургузушкан.
Биз мурунку учурда Ош областтык радиокомитетинде 15 жыл эмгектенген, азыркы учурда “Ош садоси” гезитинин башкы редактору Лутфулло Рахмоновдон өзбек тилинде уктурууларды алып барган А.Сулайманов жөнүндө билгендерин айтып берүүсүн сурандык.
— Мен Абдужалил аке менен көп жолу маектешип калганмын. Ал Ош областтык радиокомитети уюштурулганда «Ленин йули» гезитинде иштөөчү экен. Жаңыдан түптөлгөн областтык радиокомитеттин калыптанышына салым кошкон, радиожурналистиканын сырын өздөштүрүп, аны жаш адистерге үйрөтүүгө чын дилден көмөк көрсөткөн кесиптештерин көп эскерер эле. Жумасына бир ирет чыгуучу бир сааттык программасынын өзбек тилиндеги материалдарды даярдоо үчүн тынбай эмгектенген учурун баяндап берчү. Ал эл достугун даңазалаган материалдарды жарыялоого көп көңүл бурчу. Жамааттан ошондой мазмундагы уктурууларды даярдоону талап кылчу. Турсунбай Адашбаевдин өзбек тилине которгон «Манас» эпосунун кириш сөзүн жазып, диктор катары өзү окуп берген. Эпос баштан аякка чейин толугу менен эфирде жарыяланган. Ошол берүүлөр алтын фондунда сакталып тургандыгы бизди кубандырат.
Аксакал радиокомитет көптөгөн жаш калемгерлердин чыгармачылыгына чыйыр салган ыйык жай болгондугуна токтолуп, өзү менен чогуу иштеген Жолон Мамытов, Курбаналы Сабыров, Турсунбай Адашбаев жана Мамыр Иминжанов сыяктуу чыгармачыл адамдар менен ынтымакта, алар менен үй-бүлөлүк карым-катышта болгондугу тууралуу узун сабак сөз козгоп берчү. Дем алыш күндөрү алар бала-чакасы менен жаратылышы кооз жерлерге барып чогуу эс алып жүрүшчү.
Бир жолу жаздын күнү Жолон Мамытов ишемби күнү огородуна картошка отургузарын айтып, кесиптештерин ашарга чакырат. Шаарда жашагандар үчүн Төлөйкөн айылынын абасы таза эмеспи, үй-бүлөлөрү менен эс алганча жардамга барышат.
Иш ортолоп калган кезде арыктын боюна дасторкон жайылып, тамактанууга олтурушат. Ошол кезде Абдужалил Сулаймановдун 4-5 жашар кызы Икболхан суунун боюнда ойноп отуруп, капыстан чоң арыктын ичине түшүп кетет. Чоңдор ызы-чуу түшүп, артынан жүгүрүп жөнөшөт. Жолон Мамытов чуркап барып, үстүндөгү кийими менен секирип түшүп, кичинекей кызды катуу аккан суудан алып чыгат.
Икболхан ошол күндү минтип эскерет:
— Мени чоңдор көрүп калбаганда эмне болот эле, аны бир кудай билет. Жолон акенин шамдагайлыгы болбогондо катуу аккан суу мени ылдыйга агызып кетмек. Ошол окуядан бери жарым кылымдан ашык убакыт өттү, биздин үй-бүлө Жолон акенин жакшы жагын көп эстейбиз. Жолон Мамытов менен Курбаналы Сабыровдун туулган күндөрү бир айда болгондуктан, чакан жамаат чогуу белгилейт болчубуз. Анткени, Жолон Мамытов 1940-жылы 1-апрелде, Курбаналы Сабыров Лейлек районундагы Гордой айылында 1942-жылы 17-апрелде туулган. Курбаналы Сабыров 1966-жылы университетти бүтүрүп келгенден кийин Баткен районундагы Коргон орто мектебинде мугалим, кийин Баткен райондук «Кызыл-Туу» гезитинде иштеген. Ал 1969-жылы Ош облустук радио уктуруусунун редактору кызматына чакыртылып, бул жерде 1974-жылга чейин иштеген.
Кийин экөө тең Фрунзе шаарына которулуп, борбордо иштеп калышат. Алар Ошко келген сайын жамаатка жолугушуп жүрчү. Өкүнүчтүү жери, өмүрлөрү кыска экен, экөө тең жаш өтүп кетишти.
Абдужалил Сулайманов Жолон Мамытов менен Курбаналы Сабыровдун чыгармачылыгын чагылдырган көптөгөн радиоуктурууларды эфирге чыгарган. Жолон аке 1981-жылы Кыргызстан Ленин комсомолунун лауреаты болгондо, 1988-жылы 7-март күнү мезгилсиз дүйнөдөн кайтканда, 1989-жылы «Жүз жашка тол, кылым» аттуу ыр китеби үчүн Токтогул атындагы сыйлыгы ыйгарылганда Абдужалил аке ал жөнүндө атайын берүүлөрдү даярдаган.
1981-жылы бул жалгандан 39 жашында ыр дүйнөсүн таштап кете берген Курбаналы Сабыровдун көзү өткөндөн кийин жарык көргөн «Өрүкзар», «Жүрөктөгү күн» аттуу ырлар жыйнактары, чебер котормолору жөнүндө, “Керээз» аттуу жыйнагы үчүн А.Осмонов атындагы адабий сыйлыктын ээси болгондо акындын чыгармачылыгы тууралуу атайын адабий берүүлөрдү даярдаганын эскерчү.
Ош областтык радиокомитетинде кийинки жылдары Токтогул Кенжеев, Мейманбек Касымов, Майрам Тобокелова, Анаш Кадырова, Сатыбалды Кадыров. Сатыбалды Турапов, Абдимитал Камалов, Сабыралы Кулуев, Нууман Сайдуллаев, Бедел Молдобаев, Турабай Жороев, Маркабай Ааматов, Байыш Төлөнов, Өмүрбек Эрмекбаев сыяктуу белгилүү чыгармачыл инсандар менен чогуу иштегендигин сыймыктануу менен эскерчү.
Маектешкен: Төлөнбай Абдыразаков