Баарыбыздын эсибизде, өткөн жылы Борбордук Азия энергетикалык шакекчесинде авария болуп, Өзбекстан менен Казакстанда кыш мезгилинде электр тармагында чоң авария болуп, үч-төрт күн бою электр жарыгы жок, үзгүлтүккө учураган. Кыргызстанда да электр энергиясын нормадан ашык көп колдонуудан улам, айрым көмөкчү чордондогу трансформаторлор ашыкча жүктү көтөрө албай, кырдаалды жөнгө салуу үчүн убактылуу аргасыз өчүрүүлөр катталган. Кыргызстанда жайгашкан бардык ири ГЭСтер кыштын күнү толугу менен иштегенде да электр энергиясынын жетишсиздиги орун алып, кошуна өлкөлөрдөн (Өзбекстан, Казакстан жана Түркмөнстан) макулдашуунун негизинде электр энергиясын алып турганбыз.
Быйыл суунун көлөмү аз болуп, Токтогул ГЭСинин суу сактагычында 11 млрд. 891млн. кубометр гана суу топтолду. Энергетиктердин айтуусуна караганда биз суу сактагычтагы суунун деңгээлин төмөнкү жана жогорку) кармап турушубуз керек. Себеби, суунун деңгээли төмөн түшкөн сайын басым азайып, 100 пайыз иштеп жаткан гидрогенераторлордун пайдалуу аракет коэффициенти төмөндөйт. Суунун деңгээли төмөндөп кетпеши үчүн азыркы учурда коңшу өлкөлөрдөн макулдашуунун негизинде электр энергиясы сатылып алынууда. Бул тармакты жакшы билген эскперттер белгилеп өткөндөй, суу сактагычта суу көп топтолгон жылдары өзүбүздүн ашыкча өндүргөн электр энергиясын коңшуларга арзан баада сата албай калган учурларды баштан өткөргөнбүз. Эскперттердин ишениминде Кыргызстан, Тажикстан, Ооганстан жана Пакистандын ортосунда түзүлгөн “САSА-1000” долбоору Кыргызстандын энергетиктерин суу көп топтолгон жылдарда кезиккен кыйынчылыктардан арылтат жана көп киреше алып келет. Аталган долбоор ошондой учурда аябай керектүү.
Анткени, керектөөдөн ашыкча электр энергиясын жай мезгилинде экпорттосо болот. Кыргызстан менен Тажикстан үчүн Ооганстан менен Пакистанга өздөрүнүн ашыкча электр энергиясын сатуусу үчүн мүмкүнчүлүк ачылат. “САSА-1000” долбоору боюнча баштапкы этапта каралган 1000 мегаваттын 700үн Тажикстан, 300үн Кыргызстан берет.
Бул келишимде түзүлгөн баа өзгөрө турган тариф ыкмасы менен коюлган. Анын баштапкы баасы 5,5 цент менен коюлган. Келишимде доллар кымбаттаган сайын баа да көтөрүлө берет. Кыргызстандын аймагынан 476 км аралыктагы чыңалуусу 500 кВт болгон аба чубалгысы курулууда. Негизги электр энергиясын керектөөчү Пакистан. Бул долбоор 15 жылдын ичинде өзүн-өзү актайт. Келечекте Камбар-Ата–1 ГЭСи пайдалануга берилип калса, Кыргызстан өзүн-өзү камсыздаганга гана эмес, электр энергиясын жылдын бардык мезгилинде экспорттого мүмкүнчүлүк түзүлөт. Ошондуктан аталган ГЭСтин курулушу үчүн каражат табуу маселеси көйгөйлүү экендигине карабастан, аны чечүү зарыл.
Керектөөчүлөрдүн саны көбөйүп жатат
— КР Министрлер Кабинети тарабынан берилген көрсөтмөнүн негизинде бул тармактагы чачыранды болуп калган бир катар компаниялар Кыргызстан улуттук электр тармактарына кошулгандан бери министрлик тарабынан натыйжалуу иштер жасалып, энергетиктердин матералдык-техникалык базасы чыңдалды, — деп, Ош электр тармактар ишканасынын директору Эмилбек Ысманов сөзүн андан ары улады.
— Быйыл биздин ишканага 15 жаңы техника берилди. 1 манипулятор, 3 эксковатор, 2 “Соболь” маркасындагы “УАЗ”, 8 бригаданы ташый туран 8 машина ишкананын карамагындагы 9 РЕСке бөлүндү. Анын негизинде быйыл өткөн жылга салыштырмалуу көптөгөн иштер аткарылды. Алсак, төмөнкү чыңалууда линияларга Баткен, Жалал-Абад, Ош шаарларында жайгашкан цехтен жасалган ата-мекендик өндүрүштөн чыккан бийиктиги 9 жана 11 метр болгон 9,5 миңге жакын темир-бетон мамылары орнотулду. Ошондой эле капиталдык курулуш боюнча 30 трансформатор, көптөгөн запастык бөлүктөр, жабдуулар алынып келинди Ош шаарында 255 км. аралыкка сырты катмары полимердик изоляция менен капталган аба чубалгылар тартылды. 30 миңге жакын “акылдуу эсептегичтер” коюлду.
Ишкананын адистеринин эсептөөлөрүнө ылайык, жылдан жылга электр энергиясын керектөөчүлөрдүн саны көбөйүп, ал жылына орто эсеп менен алганда 7%га, айрым аймактарга бул көрсөткүч 10 %га чейин жетип жатат. Ишкана каскаддык ыкма менен Ош шаарындагы “Анар” кичи районунда жайгашкан кубаттуулугу 16 миң кВА болгон көмөкчү чордонду 25 миң киловаттык менен алмаштырды. Кашкар-Кыштактагы 10 миңдик көмөкчү чордон 16 миңге алмаштырылды. Аравандагы С.Юсупова айыл өкмөтүнүн аймагында жайгашкан “Парники” деп аталган көмөкчү чордондун кубаттуулугу 4000 кВА болчу, аны 6300 кВА менен алмаштырдык. Чек-Абад айыл өкмөтүндө жайгашкан кубаттуулугу 2500 кВА 35-10 көмөкчү чордонду 4000 кВА менен жаңыладык.
Кийинки жылы Өзгөндүн Мырза-Арык айылында, Ош шаарында Тилеке көчөсүндө жаңы кубаттуу көмөкчү чордондор курулмакчы. Учурдан пайдаланып, бул жерде баса белгилеп өтүүчү жагдайды айтып өтүүнү туура таптым. Кийинки жылдарда элибиздин жашоо-турмушу оңолуп, мамлекетке болгон көз карашы оң тарапка өзгөрдү. Мурда кезиккен электр энергиясын урдоо фактылары кескин азайды. Кийинки учурларда калк тарабынан электр энергия акысы өз убагында төлөнүп жаткандыктан, план 100 пайызга аткарылып жатат.
Министрлик тарабынан иштелип чыккан “Мой свет” тиркемесин сентябрь айынан тартып практикага киргизүү да оң таасирин тийгизди. Бул ыкма эки тарапка тең пайдалуу болду. Ишканаларда 2-3 көзөмөлдөөчүнүн ордуна бир гана көзөмөлдөөчү иштеп, бул штат электр оңдоо жагына берилет. Канча-канча кагаз үнөмдөлөт. Албетте, айрым мүчүлүштөр бар. Бирок, ал бара-бара өз ордуна келет.
Быйыл көзөмөл күчтүү, талап катуу
— Кара-Кулжа району тоолуу аймак болгондуктан, кыш биз үчүн чоң сыноолордун бири, — деп сөзүн баштады Кара-Кулжа райондук электр тармагы ишканасынын жетекчиси
Туратбек Алиев:
— Биздин ишкана 12 айыл өкмөтүн тейлейт. Тейлөө радиусу 81 километр. Жалпысынан алганда Кара-Кулжа районунун аймагында 354 км. 6-10 жогорку чыңалуудагы аба чубалгысы бар. Анын 343ү РЭСтин, 11 км. керектөөчүлөрдүн карамагында турат. Төмөнкү чыңалуудагы 0,4 аба чубалгыларыбыздын узундугу 486 км. Трансформаторлордун жалпы саны 433.Быйыл министрибиз биздин эң көйгөйлүү маселебизди чечип берди. Паркыбыз кран манипулятор жана жумушчуларды ташып жүрүүчү автомашина менен камсыз болду.
2023-2024-күз-кыш мезгилдерин ийгиликтүү өткөрүү максатында алдын ала катардагы жана капиталдык оңдоолордун план-график-тери түзүлгөн. Мурдагы жылдарга салыштырмалуу быйыл талап катуу, көзөмөл күчтүү болгондуктан, быйыл кезектеги жана капиталдык ремонттордун сапаты абдан жакшы болду. 2022-жылы 8,5 км. аралыктагы жогорку чыңалуудагы линияга реконструция жасалса, 2023-жылы бул көрсөткүч 11 кмге жетти.
Быйыл 253 км. аба чубалгылары, 209 ТПны катардагы оңдоп-түзөөдөн, 5,9 км. аба чубалгылары, 10-0.4 ТПдан 66 даана капиталдык оңдоп-түзөөдөн өткөрүлдү. Быйылкы жылы 265 темир бетон мамычалары орнотулду. Катардагы жана капиталдык оңдоо мезгилинде биздин кызматкерлер аба-чубалгыларынын алдында өскөн бак-дарактарды кыркуу жүргүзүлгөн.
Дебитордук карыздарды өндүрүү жумуштары жыл сайын, ай сайын жүргүзүлүп келет. 2023-жылдын октябрынын башында 2 млн. 452 миң сом карыз болгон болсо, анын аягында тактап айтканда 1-ноябрга карата 2 млн. 300 сомго түшкөн. Кара-Кулжа райондук электр тармагындагы электр энергиясын техникалык жактан жоготуу төмөндөп баратат.
Алсак, 2023-жылы 9 айдын жыйынтыгы боюнча жалпы жоготуулардын саны 5 млн. 841 миң болгон. Бул 12,2 пайызды түзгөн. Бул көрсөткүч өткөн жылы 12,3 пайызды түзүп, өткөн жылдын ушул мезгилине салыштырмалуу 0,1 пайызга азайган. Жылдагыга салыштырмалуу күн 10-декабрда чейин жылуу келип, лимиттен ашпай келдик. Декабрь айында 8 млн. 720 миң кВс берилет. Бул жерде биз үчүн жагымдуу жаңылыкты айта кетпесек болбойт, ишкананын жаңы имаратын куруу кийинки жылы планга киргени турат.
Даярдык апрелден башталган
Араван райондук электр тармактар ишканасынын жетекчиси Нурлан Мамадалиев менен болгон маек 2023-2024-жылдары күз-кыш мезгилдерин ийгиликтүү өткөрүүгө карата жүргүзүлгөн иш-аракеттер жөнүндө башталды.
— Биздин ишканада кыш мезгилине карата даярдык апрель айынан тартып эле башталган. Анын алкагында трансформатордук подстанция комплексин, жогорку чыңалуудагы 6-10 кВ, төмөнкү 0,4 кВ чыңалуудагы аба чубалгыларын катардагы жана капиталдык оңдоолор максатка ылайык жүргүзүлдү.
Быйылкы жылы ишкана боюнча алганда 61 даана ТП капиталдык, 382 даанасы катардагы оңдоп-түзөөдөн өткөрүлдү. Төбө-Коргон айыл аймагындагы реконструкциялоо жумуштары аткарылды. Электр энергиясын керектөөчүлөргө үзгүлтүксүз жана сапаттуу жеткирип берүү үчүн биз райондун аймагында айыл өкмөттөрү менен тыгыз иштештик.
Мисалы, Керме-Тоо айыл өкмөтү өзүнүн аймагындагы айылдарга 360 мамычаны жана ага керек болгон траверстерди, керамикадан жана айнектен жасалган изоляторлорду, аба чубалгыларын сатып алып, бизге кайрылышкан. Биздин кызматкерлер август, сентябрь айларында капиталдык жумуштарды жасап жаткан мезгилде колу бошоп калган учурда аталган айыл өкмөттүн Киров, Жаңы-Жол айылдарына барышып, алар суранган жумуштарды жасап беришти.
Май айында А.Анаров жана С.Юсупова атындагы жана Маңгыт, Төбө-Коргон, Төө-Моюн айыл өкмөттөрүндө да жогоркудай жумуштарды жасап бердик. Мындан сырткары, Нур-Абад жана Маңгыт айыл өкмөттөрүнүн бюджетинен сатып алынган көмөкчү чордондорду талапка ылайык орнотуп, аны ишке киргизүүгө жардамдаштык.
Дебитордук карыздар 2023-жылдын 1-январына карата 6 млн. 318 миң сом карыз болгон болсо, 1-ноябрга карата 4 млн. 601 миң сомду түзүп турат. 1 млн. 716 миң сомго дебитордук карызды кыскарттык. Электр энергиясын үнөмдүү пайдалануу боюнча түшүндүрүү жумуштары үзгүлтүксүз жүргүзүлүп турду. Мисалы, үстүбүздөгү жылдын октябрь айында 16 млн. 58 миң киловатт саатка лимит берилген болсо, иш жүзүндө 12 млн. 944 миң киловатт саатты түздү. Ал эми ноябрь айында 22 млн. 260 миң киловатт саатка лимит берилген болсо, иш жүзүндө 18 млн.
257 миң киловатт саатты түздү. Биздин 23 600 калк, 2289 калк эмес (коммерциялык, бюджеттик мекемелери) абоненттерибиз сентябрь айынан тартып “Мой свет” деп аталган тиркемесин колдоно башташты. Учурдан пайдаланып, электр энергиясын пайдаланып жаткан абоненттерибизге ыраазылык билдирип кеткибиз келет. Себеби, бүгүнкү күндө алар электр энергиясы үчүн акы төлөөнүн зарылдыгын түшүнүп калды. Төлөөдөн качкандардын саны аябай азайды. Ага далил катары төмөнкү мисалды айта кетели, 2023-жылдын 9 айында калк абоненттерине 88 млн. 967 сомдук электр энергиясын сатып анын акчасын толук топтодук. Ишкана суук түшкөндөн тартып, күчөтүлгүн режимде иштеп жатабыз. Бардык участоктордо атайын дежурство, ыкчам топтор уюштурулуп, ага атайын график түзүлдү.
Төлөнбай Абдыразаков