Өзбекстандын «Сам Авто» заводунда чыгарылган ISUZU SAZ LE 60 маркасындагы автобус
Бүгүн, 27-декабрь күнү Ош шаардык кеңешинин 13-сессиясында Ош шаарына автобустарды Өзбек-Кыргыз өнүктүрүү фондунун эсебинен финансылык лизинг аркылуу сатып алууга жана республикалык бюджеттен максаттуу трансферт алууга макулдук берүү жөнүндө маселе каралды. Бул тууралуу бир катар ЖМКлар жазды.
Ош мэриясы бүгүнкү күндөгү статистикалык маалыматка таянып, шаардагы ички жана сырткы миграцияны эске алганда жалпы 600 миң шаар тургунуна ылайык, муниципалдык автобустук каттамдарда автобустар жетишсиз экенин жүйөө келтирип, бул маселени жөнгө салуу үчүн Өзбек-Кыргыз өнүктүрүү фонду аркылуу «Сам Авто» заводунун өндүрүшүндөгү ISUZU SAZ LE 60 үлгүсүндөгү жалпы 100 бирдик автобусту жылдык 5,5 үстөк менен 5 жылдык мөөнөткө 6 айлык жеңилдетилген мөөнөттө финансылык лизинг аркылуу алуу менен ишке ашырууну пландаган.
Ош мэриясы менен «Сам Авто» заводунун алдын ала сүйлөшүүлөрүнө ылайык, бир автобус 90 миң АКШ долларын түзүп, жалпы 100 автобус 9 млн АКШ долларын түзөрү белгилүү болгон.
Түзүлгөн шартка ылайык, жалпы сумманын алдын ала 30 пайызын жана башка чыгымдар менен биргеликте орто эсеп менен 3 млн АКШ доллар акча каражатын бир учурда төлөө белгиленген. Мындай сумма жергиликтүү бюджетте жок болгондуктан республикалык бюджеттен алууга туура келген.
Мына ушул себептүү Ош мэриясы тарабынан Ош шаарына 100 бирдик автобустарды Өзбек-Кыргыз өнүктүрүү фондунун эсебинен 5 жылдык мөөнөткө, негизги суммасын төлөөдө 6 айлык жеңилдетүү мөөнөтү менен 5,5 пайыздык үстөк менен 8 млн 950 миң АКШ доллар өлчөмүндөгү финансылык лизинг аркылуу насыя жана насыянын 30 пайызын алдын ала төлөө үчүн республикалык бюджеттен максаттуу трансферт алууга макулдук берүү жөнүндөгү маселени Ош шаардык кеңешинин сессиясына сунуштаган.
Мэриянын кызматкерлери билдиргендей, кийинки сүйлөшүүлөрдүн негизинде «Сам Авто» заводу автобустарды 500 долларга арзандаткан.
Алдын ала маалыматка ылайык, аталган автобустар дизелдик күйүүчү май (солярка) менен жүрөт.
Бир автобустун баасы 89 500 долларды түзөт.
Сессиянын жүрүшүндө депутаттар автобустардын сапатына, техникалык мүнөздөмөлөрүнө токтотушуп, автобустун техникалык стандартына кызыгышты.
Ошондой эле, депутаттар шаар бийлиги автобустарды насыяга алып жатканын, аны төлөө жагы кандай болорун сурашты.
Ош мэриясынын экономикалык бөлүмүн адистер шаардык бюджеттен төлөсө болорун, буга чейин эсептелгенин белгилешти.
Жыйынтыгында токтом долбоору толугу менен добушка коюлуп, 35 депутат колдоду.
«Сам Авто» заводунун өкүлү автобустар 2024-жылдын март айынын аягына чейин алып келинерин билдирди.
Маалыматка ылайык, 2024-жылдын февралында 50 автобус, мартта 50 автобус Ошко алып келинет.