Жаңы жылдын өзгөчөлүгү мына ушунда окшойт, адатта, жыл аяктап баратканда ар бир адам, артына кылчайып карап, өз алдына “быйылкы жыл кандай жыйынтыкталды?” деген суроо салат эмеспи. Жыл ичинде жаралган ийгилигине кубанып, аны бышыктоонун, кетирген кемчилигине өкүнүп, аны кайталабоонун аракетин көрөсүң. Жетишкендигиңди ортого салып, аны башкалар менен тең бөлүшкүң келет. Биз жакында Чоң-Алай райондук суу чарба башкармалыгынын жетекчиси Исматтилла Кудратиллаевич Абдилдаевге жолугуп, аны менен өтүп бара жаткан жылда тармактын ийгилиги, көйгөйлөрү тууралуу ой бөлүшкөн болчубуз.
— Исматилла Кудратиллаевич, суу чарба башкармалыгында жыл кандай жыйынтыкталды?
— Жаман эмес, жакшы. Дароо “эмне үчүн?” деген мыйзам ченемдүү суроо туулушу ыктымал. Бул жыйынтык Кыргыз Республикасынын Президенти тарабынан кийинки жылдарда сугат тармагына олуттуу көңүл бурулуп жаткандыгынын натыйжасы. Республикабыздын башка аймактары сыяктуу эле быйыл райондук суу чарба башкармалыгында мурдагы мезгилге салыштырмалуу көптөгөн жумуштар жасалды.
— Аны мисалдар менен далилдей өтсөңүз?
— Быйыл Алтын-Дара Р-1 каналында 4472,4 миң сомго 1 км. аралыктагы каналдын нугун бетондоо жумуштары аткарылды. Анын оң жана сол жээктеринде 2 291.4 м. сомдук нукту оңдоо жана механикалык тазалоо жумуштары жасалды. Шор-Талаа каналынын сол жээгинде 3 км. аралыкта каналдын нугун оңдоо, 5 км. Аралыкта механикалык тазалоо жумуштары жүргүзүлүп, эки даана суу алуучу курулмалар орнотулду. Ушул эле каналдын оң жээгинде 1,4 км. аралыкта каналдын нугун ондоо, 4,9 км. аралыкта механикалык тазалоо жумуштары аткарылып, эки даана суу алуучу курулмалар орнотулду. Гонду каналында 1,8 км. аралыкта каналдын нугун ондоо, 4,2 км. аралыкта механикалык тазалоо жумуштары жасалып, 3 даана суу алуучу курулмалар орнотулду.
Кыргыз Республикасынын мүлк фондунун тескемелерине ылайык, биздин балансыбызга өткөн Тараша каналынын абалы кыйын болчу. Быйыл анын башкы суу алуу курулмасын (ГВС) куруу жумуштары башталды. Кийинки жылы ал аягына чыгарылат. Ак-Суу каналынын нугунан суу кетип, коркунучтуу абалга келип калган 200 метр аралыгын бетондоп чыктык. Ага 786, 2 миң сом каражат жумшалды. Быйыл райондо бул багытта аткарылган иштердин жалпы суммасы – 15 миллион сомдон ашты. Ачыгын айтсак, эгер, бул каражат болбой калганда абалыбыз кыйын эле болмок…
— Сөздү райондун аймагындагы айдоо жердин аянты жана аны суу менен камсыздоочу ички чарбалык жана сиздердин балансыңыздарда турган каналдар тууралуу маалыматарга бурсак?
— Чоң-Алай району боюнча алганда 12114 гектар сугат-айдоо жер аянты бар. Анын ичинен: чөп чабынды, жайыт жана кайрак жердин аянты 782 гектарды түзөт. Пайдаланылган суулуу жер аянты 10 284 гектарды түзөт. Жергиликтүү калк картошка, арпа, көп жылдык тоют өсүмдүктөрүн өстүрүшөт.
Райондогу узундугу 250 км. Канал дыйкандарды суу менен камсыздоо милдетин аткарат. Анын ичинен: ички чарбалык каналдардын узундугу 128,1 км. Чоң-Алай райондук суу чарба башкармалыгынын балансындагы чарбалар аралык каналдардын узундугу 121,9 км. Анын ичинен 12,9 километри бетон, калган 109 км. жер нугунда. Үстүбүздөгү жылдын кургакчыл келишинен улам дениз денгээлинен 2400-3000 метр бийиктикте жайгашкан Кыргыз Республикасындагы климаты татаал, бийик тоолуу Чоң-Алай районунда да сугат суу тартыштыгы сезилди. Бирок, бул тармакка мамлекет тарабынан бөлүнгөн каражат өз мезгилинде берилгендиктен, райондук суу чарба башкармалыгы быйыл түзүлгөн кыйынчылыктарды жеңип татаал кырдаалдан чыгууга өбөлгө болду.
— Баарыбызга белгилүү, райондун аймагындагы каналдардын жайгашуусу чачкын, райондук суу чарба башкармалыгынын механикалык паркындагы техникалар эскирген. Бул жагдайдан алганда абал кыйын болсо керек?
— Туура айтасыз. Каналдардын жайгашуусу чачкын болгондуктан, эски каз таман техникалар менен сууну өз убагында буруу, каналдарды чаап тазалоо жаатында көп кыйынчылыктар кездешет. Бирок, техникаларыбыз эскирген деп кол куушуруп олтуруп калган жокпуз. Пайдалануу мөөнөтү эчак эле өтүп кеткен техникалар үчүн керектүү тетиктерди издеп таап, аны оңдоп-түзөп ушул күнгө чейин иштетип жатабыз. Суу чарба башкармалыгынын жамаатынын аракети менен 3 айыл өкмөтү менен 28 957 миң кубометр сугат суу менен камсыз кулуу боюнча түзүлгөн келишим аткарылды. Эң негизгиси, быйылкы жыл кургакчыл келсе да, жаз–жай мезгилинде сугат суу берүү үзгүлтүккө учураган жок. Республикалык бюджеттен бөлүнгөн акча каражатка эң зарыл болгон бир катар каналдарга оңдоо-түзөө, жаңы курулмаларды жасалгандыгына күбө болгон дыйкандарыбыз мамлекет башчысынын адресине жылуу пикирин билдирип жаткандыгы бизди кубандырат.
— Кийинки жылга кандай пландарыңыздар бар?
— Келе жаткан жылга Тараша каналынын башкы суу алуу курулмасынын жана узундугу 72 метр келген суу тундуруучу жабдуунун курулушу аягына чыгарылат. Мындан тышкары, Шибээ-Жекенди каналынын быйыл башталган курулуш иштери толугу менен аягына чейин бүткөрүлөт. Шор-Талаа жайыт массивинде турган 8790 гектар аянтка суу жеткирүү үчүн Алтын-Дара дарыясына бассейн куруу боюнча долбоорлоо жумуштарын баштамакчыбыз. Механикалык паркыбызды жаңы техникалар менен жаңыласак деген максат бар. Бул багытта атайын кайрылуу даярдап жатабыз. Кийинки жылдын сугат сезону үчүн азыр колдо бар техникалар ремонттон өткөрүлүп жатат.
Маектешкен: Төлөнбай Абдыразаков