— Ноокат районунун социалдык-экономикалык абалын жакшыртуу максатында 2023-жылы райондук мекеме уюмдар, жергиликтүү өз алдынча башкаруу органдары
тарабынан бир топ алгылыктуу иштер аткарылды.
Райондо жаңы өнөр жай ишканаларын ачуу багытында 2023-жылга 12 өнөр жай ишканаларын ишке киргизүү пландаштырылса, 2023-жылдын 11 айында расмий
каттоодон өткөн 14 жаңы ишкана ишке киргизилип, жаңы жумушчу орду менен 148 адам камсыз болуп, жалпысы 332 млн. 900 миң сомдук инвестиция тартылды.
Республикалык бюджеттин аткарылышы боюнча болжолдонгон 624608,0 миң сомдун ордуна 577956,7 миң сом жыйналып, план 92,5%га аткарылды же пландан 46651,3 мин сомго кем, ал эми өткөн жылдын 11 айына салыштырмалуу 63400,4 миң сомго ашыкча жыйналып, өсүү ыргагы 112,3 %ды түздү.
Жергиликтүү бюджетке 2023-жылдын 11 айында болжолдонгон 371468,6 миң сомдун ордуна 400308,9 миң сом жыйналып, болжолдонгон план 107,8 %га аткарылды же болжолдонгон пландан 28840,3 миң сомго ашыкча, ал эми өткөн жылдын 11 айына салыштырмалуу 29263,3 миң сомго ашыкча жыйналып, өсүү ыргагы 107,9 %ды түздү.
Ош-Баткен-Раззаков эл аралык маанидеги автожолунун курулуш иштери Кыргыз Республикасынын Транспорт жана коммуникациялар министрлиги тарабынан мамлекеттик каражаттын эсебинен эң орчундуу болгон Т.Зулпуев атындагы айыл аймагындагы 28-34 чакырым жана Гулистан, Бел айыл аймактарындагы 40-47 чакырымы, эң көйгөйлүү болгон бөлүктөрү жалпысы 13 чакырым жолдун курулушу 2023-жылдын 1-мартынан башталган. Аталган жолдун курулушунун биринчи катмарына 9 см. калыңдыкта кеңдиги 8 метр асфальт төшөлгөн, эки жагында 2 метрден жолдун жээги жайгашкан. Экинчи катмарын басуу иштери 2024-жылдын май айынан башталат. Учурда жүргүнчүлөр үчүн бир топ ыңгайлуу шарттар түзүлдү деп айтсак болот.
2023-жыл ичинде райондун аймагындагы 22,6 км жергиликтүү маанидеги жолго жергиликтүү бюджеттин жана демөөрчүлөрдүн эсебинен 104 499 178 сомдук асфальт басылган. Ноокат районунунда 2 кичи ГЭСинин курулушу аяктап, пайдаланууга берилди.
Ноокат шаарында жол тыгынын азайтуу менен элге ыңгайлуу шарт түзүү максатында, шаардын 3 көчөсүндө жол кыймылы бир тараптуу болуп өзгөртүлдү. Жогорудагы киргизилген чектөөлөрдүн негизинде жол тыгыны азайып, Ош–Баткен–Раззаков эл аралык авто-жолундагы жүргүнчүлөрү үчүн да ыңгайсыздыктар жоюлуп, аларга жагымдуу шарт түзүлдү.
Районубуздагы эң көйгөлүү маселелердин бири болгон 2832 жарандын жерлери мыйзамдаштырылып, мамлекеттик акт берилди. Ноокат районубуздун элин жана гезит окурмандарын 2024-жаңы жыл менен куттуктаймын. Ар бир үйдө ынтымак, тынчтык, бекем ден-соолукту каалаймын. Жаңы жыл жакшылыктын, токчулуктун, берекенин жылы болсун.
Б.Ысакова