— Азыркы санариптештирүү заманы кулач жайып, керектүү маалыматтарды алеки заматта таап алчу заманда Чыңгыз Айтматовдун жакындары кыргыздын гана эмес, дүйнөлүк адабияттын кенчи болгон жазуучунун туулган күнүнүн 95 жылдыгына карата республикабызда жана чет өлкөлөрдө өткөрүлгөн көптөгөн иш-чаралар менен таанышып турдук.
Анын ичинде Ош облустук “Ош жаңырыгы” гезити да улуу жазуучу Чыңгыз Айтматовдун өмүр-баяны, чыгармачылыгы тууралуу макалаларды жарыялап турду. Ош аймагы Айтматовдор үчүн жүрөгүбүзгө жакын. Анткени, биздин атабыз Төрөкул Айтматов 1931-1933-жылдары партиянын Араван-Буура райкомунун биринчи секретары болуп иштеген. 1933-жылдын сентябрь айында, ВКП(б)ынын Кыргыз обкомунун экинчи катчысы болуп которулган. Төрөкул Айтматов Араван-Буура райкомунун биринчи секретары болуп иштеп турган мезгилде апабыз Нагима Хамзеевна жаңы заманда аялзатын эркиндикке үндөө, аларды коомдук иштерге тартуу боюнча иш-чараларга активдүү катышкан.
Ош тарапка барган сайын биз дайыма шаарда ата-энебиз 1931-1933-жылдары жашаган үйгө, ошол үйгө жакын жайгашкан Чыңгыз Айтматов тарбияланган №1 балдар бакчага дайым кайрылып өтчүбүз.
“Ош жаңырыгы” гезитинин сайтынан жакында “Нагима апанын нар көтөргүс эмгеги” аттуу менин айтып берген баяндамды окуп чыгып, редакциянын жамаатына абдан ыраазы болдум. Жакында макаланын автору Төлөнбай Абдыразаков “Ош жаңырыгы” гезитин мага алып келип берди. Албетте, ыкчам маалымат алганга сайт жакшы деңизчи, бирок, газетанын өзүнөн окуп чыгуу адамга башка таасир калтырат тура. Анын үстүнөн, ата-энеси тууралуу жарыяланган макаланы окуган ар бир адам толкунданат экен. Мен да ошондой сезимди башымдан өткөрдүм.
Сан жеткис наамдарга жана сыйлыктарга ээ болгон залкар жазуучу Чыңгыз Айтматовдун өмүр жолу, чыгармачылыгы дагы канча-канча макалаларга жана терең изилдөөлөргө түгөнгүс булак болуп бере бермекчи.
Урматтуу “Ош жаңырыгы” гезитинин жамааты жана анын окурмандары, сиздерди келе жаткан жаңы жылыңыздар менен кызуу куттуктайм. Гезиттин жамаатына үстүбүздөгү жылы жараткан ийгиликтерди кийинки жылда да уланта беришиңиздерге тилектешмин. Эски жыл колдоп, жаңы жыл жалгасын!