Жазгүлүм Акматова, Кара-Кулжа райондук “Мезгил үнү” гезитинин кабарчысы, Кр журналисттер союзунун мүчөсү:
— Жаңы жыл куттуу майрам. Жаңы жылды бүтүндөй жер планетасын үй-очок кылган элдердин баары майрамдоого өз менталитетине жараша далалаттанышат. Жаңы жылды улуу
муундагы аталарыбыз, апаларыбыздан тарта жаш наристе ак пейилдери менен баёо балдар бакчаларда, мектептерде, үйдө белгилешкенде биз сыяктуу атаэнелер дайыма жан-дилибизге азык алабыз. Баарыбыз үйдө балаты жасап, аны ар кандай кооздуктар менен жасалгалап, түрдүү түстө нур берген оюнчуктар менен кооздоп, 31-декабрда түнкү саат жебеси туптуура 12ни көрсөткөндө баарыбыз ураалаган, ыр-күүлөрдүн коштоосунда кирип келген жаңы жылды ак пейилден ак жолтой, ийгиликтин, молчулуктун жылы болсун деп тосуп алабыз.
Мен да ушундай майрамды тосконума замандаш болгонума өтө ыраазымын. Майрам алдында элибиздин маанайы жарык болсун деп тилеймин.
Эски жыл деле жаман болгон жок. Кутман Кыргызстаныбызда бейпилдик өкүм сүргөнү, элдердин маанайынын жайдары болуусу, өлкөбүздүн экономикасынын жогорулашы, замандаштардын турмуш-тиричилигинин жакшырышы сыяктуу көп иштер жана эски жылдын ийгиликтүү болушу өткөн жылдагы жаратмандык эмей эмне. Мындай ийгиликтер биздин Кара-Кулжа районунда да жүз берди.
Алыскы Капчыгай айыл өкмөтүнүн Кара-Таш айылындагы жаңы мектептин курулушу аяктап, пайдаланууга берилиши, Мырза-Аке, Кара-Кулжа, Алайкуу жолунун Чалма айылына чейинки бөлүгүнө оңдоо иштери жүргүзүлүү менен асфальт төшөлүшү өтүп бараткан 2023-жылдын негиздүү жумуштарынан. Бул иштерди биз дагы журналист катары райондук “Мезгил үнү” гезитине мактанаарлык деңгээлде
чагылдырып, окурмандарды кабардар кылып турдук.
Райондук деңгээлдеги ушундай иштерди окурмандарга жеткирүүдө гезиттин кызматкерлери дагы мыкты иштешти.
Эми келе жаткан 2024-жыл да ийгиликтердин, тынчтыктын жылы болсун деп тилек кылалы. Баарыбыз келээрки жылы түгөл болуу менен алакандай кооз Кыргызстаныбызды көздүн карегиндей сактап алалы. Баарыңыздардын жаңы жылыңыздар кут болсун демекчимин.