Өткөн жылдын 28-декабрь күнү Кара-Суу райондук ички иштер бөлүмүнүн Кызыл-Кыштак айылдык милиция бөлүмчөсүнө М аттуу жаран белгисиз, шектүү зат алып жүргөндүгү тууралуу маалымат келип түшкөн. Аталган маалымат каттоого алынып, текшерүү иштери башталган. Бул тууралу Ош ОИИБдин басма сөз кызматы билдирди.
Жүргүзүлгөн ыкчам-издөө иш-чараларынын натыйжасында Ош шаарынын көчөлөрүнүн биринде 1979-жылы туулган А.Б. аттуу жаран шектүү катары кармалып, анын жанынан күрөң түстөгү, өзгөчө жыты бар, салмагы 3,72 граммды түзгөн белгисиз зат табылган.
Аталган затты аныктоо үчүн тийиштүү экспертиза дайындалып, анын корутундусуна ылайык, шектүүнүн жанынан табылган зат “гашиш” баңгизаты болуп аныкталган. Шектүү А.Б. үстүнөн Кыргыз Республикасынын Кылмыш-жаза кодексинин 283-берене (Баңгизат каражаттарын, психотроптук заттарды жана алардын аналогдорун сатып өткөрүү максатсыз мыйзамсыз даярдоо) негизинде кылмыш иши козголуп, соттун чечими менен камакка алынган.
Учурда бул кылмышка тиешеси бар башка атуулдарды аныктоо боюнча ыкчам-тергөө амалдары жүргүзүлүүдө.