Жазаларды аткаруу кызматы Арстан Алайдын сөөгү бүгүн, 5-январь күнү эрте менен аталган кызматтын дарылоо түзөтүү мекемесинин ашканасында асылган абалда табылганын кабарлады.
«Азаттык» жазгандай, Абдылдаевге «инсанияттын такталбаган психотикалык бузулушу, галлюцинация» деген алдын ала дарт аныктамасы коюлуп, 28-декабрда врач-психиатрдын сунуштамасы менен Чүйдүн Молдовановка айылындагы №31 түзөтүү мекемесине которулган.
29-декабрда Абдылдаев мезгил-мезгили менен жүрөгү, башы ооруп, кулагы шуулдап, тамактангандан кийин ашказаны ооруп, тез-тез чарчап жатканын айтып дарыгерге кайрылган.
Текшерүүнүн алдын ала жыйынтыгы менен Абдылдаевге «такталбаган психотикалык инсандык бузулуу, коронардык жүрөк оорусу бар» деген диагноз коюлган. Өтө жогорку тобокелдиктеги гипертониялык оору жана клиникалык диагнозду тактоо үчүн врач-психиатрлардын комиссиялык текшерүүсүн жүргүзүү зарылдыгы жөнүндө чечим кабыл алынган.
“Жансыз денени алгачкы кароодо дене жаракаттары табылган эмес. Өлүмдүн чыныгы себебин жана механизмин аныктоо максатында комиссиялык соттук-медициналык экспертиза дайындалды. Бул факты милициянын каттоосуна алынып, тергөөгө чейинки териштирүү иштери башталды»,-деп айтылат маалыматта.