Кечээ, 25-январь күнү Азия Кубогунун тайпалык баскычынын акыркы оюндары болуп өттү. Улуттук курама Оман менен ойноп, эсеп тең чыкты. Оюндан кийин улуттук курамалардын башкы машыктыруучулары маалымат жыйын куруп, журналисттердин суроолоруна жооп беришти.
Кыргызстан курамасынын машыктыруучусу Штефан Таркович бул курам жаш экенин, 3-4 жылдан кийин ийгилик жаратарын айтты.
«Оор беттеш болду. Тайпадан чыгуу мүмкүнчүлүгүбүз дагы эле бар болчу. Биз эки гол айырмасы менен жеңишке жетсек, кийинки баскычка чыкмакпыз. Баарына белгилүү болгондой, турнирдин алдында биздин курамда көйгөйлөр болду, даярдык учурунда үч негизги оюнчу жаракат алып калган. Бүгүнкү беттештен болсо эки оюнчу четтетилип, Бекжан менен Кайрат физикалык жактан даяр эмес болуп калды»,-деди ал.
Машыктыруучу Таиландга каршы оюн начар болуп калганын кошумчалады.
«Мен курама менен жарым жылдан ашык иштеп жүрөм. Команданы жетектей баштагандан бери анда чоң өзгөрүүлөр болду. Мен үчүн оюнчуларды жакындан таануу абдан маанилүү. Команда менен үзгүлтүксүз иштешкен 50 күндүн ичинде кыргыз футболчуларынын менталитети жөнүндө көбүрөөк билдим деп айта алам.Биз турнирге кылдаттык менен даярдандык. Бирок, мен Таиландга каршы оюнубуз менен абдан нааразы болдум. Ал оюн абдан начар болуп калганы мени абдан капалантат»,-деди ал.
Машыктыруучунун айтымында, бул курамада жаш оюнчулар көп, алар менен 3-4 жылдын ичинде ийгиликке жетсе болот.
«Бирок, акыркы эки беттеште биз өзүбүздүн оюнубузду көрсөтө алдык. Айып аянтчаларда чечим кабыл алуунун үстүнөн иштешибиз керек. Кантсе да команда бул турнирдеги оюнчулардын курагы боюнча эң жаш курамалардын бири болду. Курам күчтөнөт, бирок бул үчүн көбүрөөк убакыт жана чыдамдуулук зарыл. Бул команда 2-3 жылдан кийин эң мыкты көрсөткүчтөргө жана ийгиликке жетет деп ишенем. Команда менен келишим 2024-жылдын июнь айына чейин ылайыкталган. Мен курама менен калып, аларды тандоо оюндарына даярдайм деп ишенем. Бул турнирде тайпадан чыгуу максатына жеткен жокпуз. Кантип ойногонубузду, дагы кандай мүмкүнчүлүктөрүбүз бар экенин салыштыруу керек»,-деди ал.
Ошондой эл ал курама чоң мелдештерге күчтүү болуп кайтарын айтты.
«Биз бурчтан чыгарылган топтон гол өткөрүп жибердик, ага жооп кайтаруу зарыл эле. Экинчи бөлүктө көп нерсени, оюнга болгон стратегияны өзгөрттүк. Биз көбүрөөк чабуулда ойноого аракет кылдык. Ооба, бул кооптуураак болду жана коргонууда көйгөйлөрдү жаратты, бирок бизде башка арга жок болчу. Жолубуз болбоду, биринчи голубуз, тилекке каршы, VAR-дын жардамы менен жокко чыгарылды, Фархаттын соккусу да штангага тийип калды. Биз оюнубузду дагы жакшыртабыз. Биз плей-оффко чыгып, күйөрмандарыбыздын кыялын орундаткыбыз келген, бирок тилекке каршы, аны жасай албадык. Машыктыруучу айткандай, биз бул беттештин алдында кээ бир оюнчуларды жоготуп алдык. Оюнга болгон старттык курам эң оптималдуу болду.
Машыктыруучуга, машыктыруучулук штабга жана бардык күйөрмандарга терең ыраазычылык билдиргим келет. Кыргызстандын улуттук курама командасы үчүн ойноо мен үчүн чоң сыймык жана мен кураманын бир бөлүгү болгонума кубанычтамын. Биз күчтүүрөк болуп оюн талаасына кайтып келебиз»,-деди ал.