Ош шаарында Ы. Монуев, А. Шакиров жана Алимжанов көчөлөрүнүн кесилишинде эки деңгээлдүү жер астынан, үстүнөн унаалар менен жөө жүргүнчүлөр өтүү үчүн жол куруу боюнча иш аракеттер башталган.
Ош регионалдык шаар куруу жана архитектура башкармалыгынын жетектөөчү адиси Мирлан Өмүралиевдин билдиргенине караганда, тиешелүү адистер, долбоордун аймагына дал келген объекттердин ээлерине өз аракеттери менен бузуу иштери боюнча жеринде түшүндүрүү иштерин жүргүзүшкөн.
Сүрөт: Ош шаардык архитектурасы
Түшүндүрүүнүн жыйынтыгында, кээ бир объекттердин ээлери өз каалоосу менен бузуу иштерин башташты.
«Алгачкы долбоорго ылайык, бузууга тийиш делген 13 объект аныкталган. 13 объекттин экөө өз каражаты менен бузуп коюшту. Ал эми бул долбоорго дагы кошумча, алымчалар болот. Азырынча долбоор толук түрдө даярдала элек»,-деди М. Өмүралиев.
Сүрөт: Ош шаардык архитектурасы
Буга чейин Ош мэриясы Ысакбек Монуев, Аскар Шакиров жана Алимжанов көчөлөрүнө эки деңгээлдүү өтмөктүн курулушу башталарын билдирген. Ага ылайык, Аскар Шакиров көчөсүнөн Алимжанов көчөсүнө жүрүүчү унаалар айлампадан айланып түрдүү багыттарга кетери көрсөтүлгөн.
#Ош шаары #эки деңгээлдүү өтмөк