3-апрелде Райымбек Матраимовдун бир кеңсеси 16 млн.долларга сатылды. Бул тууралуу УКМКнын төрагасы Камчыбек Ташиев бүгүн, 5-апрель күнү журналисттерге билдиргенин «АКИпресс» басылмасы жазды.
Камчыбек Ташиевдин айтымында, аталган сумма Мамлекеттик мүлктү башкаруу агенттигинин эсебине түштү.
«Матраимов 60 млн.долларлык мүлктү өз ыктыяры менен өткөрүп берди. Менин эсебия боюнча, Матраимовдон биздин тизмедеги 200 млн.долларлык мүлкү алынат»,- деген Ташиев.
Р. Матраимов Азербайжандын Баку шаарынан кармалып, 26-март күнү кечинде Кыргызстанга жеткирилген. Ал «адамды эркиндигинен мыйзамсыз ажыратуу жана кылмыштуу кирешелерди адалдоо» кылмыштарына шектелүүдө.