Кыргызстандын эки клубу- Ош шаарынын «Алай» клубу менен Кант шаарынын «Абдыш-Ата» клубу Азия футбол конфедерациясынын оюндарына катышкандыгы үчүн 350 миң доллар (30 млн.сомдон көбүрөөк акча) алышат. Мындай маалыматты «Спорт АКИпресс» басылмасы жазды.
Маалыматка караганда, 2023-2024-жылкы сезондо АФКнын оюндарына Кыргызстандын эки клубу- «Абдыш-Ата» менен «Алай» катышкан. «Алай» клубу оюндарынын тандап алуу турунан баштап, Түркмөнстандын «Мерв» клубуна жеңилип калган.
«Абдыш- Ата» клубу өлкө чемпионатынын жеңүүчүсү катары оюндарын тайпалык турдан баштап, 6 оюндун бешөөндө жеңүүчү боулп, плей-офф баскысына өткөн алгачкы кыргыз клубуна айланган.
1/4 баскычында «Абдыш-Ата» Кытай Тайбэйинин «Тайчунг Футуро» клубуна каршы эки оюн (үйдө-конокто) өткөрүп, 1/2 баскычына жолдомо алган. Анда Канттын клубунун атаандашы Австралиянын «Централ Кост Маринерс» клубу болмокчу. Бул эки клубдун биринчи оюну 17-апрелде Бишкек шаарындагы Д. Өмүрзаков стадионунда өтсө, экинчи оюну 24-апрелде Австралиянын Госфорд шаарында болот.
АФКнын Кубогунун регламенти боюнча, АФКнын оюндарына катышкан ар бир клуб коноктогу оюну үчүн Азия футбол конфедерациясынан 40 миң долларга ээ болот. Бул регламент тандап алуу туруна катышкан клубдарга да тиешелүү.
Мындан улам, Ош шаарынын «Алай» клубу «Мервке» каршы конокто ойногону үчүн 40 миң долларга ээ болгон болсо, «Абдыш-Ата» клубу конокто өткөргөн 5 оюну үчүн 200 миң долларга ээ болот. Мындан сырткары, Канттын клубу өзүнүн тайпасында биринчи орунду алгандыгы үчүн 100 миң доллар алат. Натыйжада кыргыз клубдары АФКдан 340 миң доллар алышат.
АФКнын регламентине ылайык, АФК Кубогунун финалына чыгып, биринчи орунду алган клуб 1,5 млн, экинчи орунду алган клуб 750 миң долларга ээ болот.