Ош шаардык ички иштер башкармалыгынын кылмыш иликтөө бөлүмүнүн кызматкерлери сойкулук менен алектенип жүргөнгө шектүү Ош шаарынын Өзгөн көчөсүндөгү батирлердин биринен 6 кызды кармады. Бул тууралуу Ош ШИИБдин басма сөз кызматы билдирди.
Маалым болгондой, милиция кызматкерлери интернет аркылуу Ош шаарындагы даректи көрсөтүү менен кардар эркектерди эс алууга чакырган даректи аныкташып, ал даректин үстүнөн ыкчам иликтөө иштерин жүргүзө башташкан. Натыйжада ал даректе 6 кыз сойкулук жасоо үчүн батирди апрель айында алышып, интернет аркылуу чакыра баштаганы, ал эми сойкулук жасоо үчүн бул көмүскө жайды Жалал-Абад облусунун Аксы районунун 2001-жылы туулган тургуну Ж.А. уюштурганы, Ош шаарынын, Ош облусунун жана Жалал-Абад облусунун жашоочуларынан турган топту түзгөндүгү аныкталды.
«Натыйжада, сойкулукка жана ыпластыкка көмөктөшүугө шектүү катары 2001-жылы туулган Ж.А. Ош шаардык ички иштер башкармалыгынын убактылуу кармоочу жайына 9-майда киргизилди. Анын үстүнөн Кыргыз Республикасынын кылмыш кодексинин 160-беренеси менен кылмыш иши козголуп, тергөө жүрүп жатат. Калган 5 кыздын үстүнөн профилактикалык иш чаралар жүргүзүлдү»,- деп айтылат маалыматта.
Укук коргоо органдарынын ыкчам иш аракеттеринин натыйжасында Ош шаарынын аймагында мындай жол менен жан баккандардын аракеттерине бөгөт коюлган. Бирок, айрымдары интернет айдыңдарын пайдаланып, кардар издөөгө аракет жасап жатышат. Милиция кызматкерлери бул багытта дагы иш-аракеттерди күчөтүүдө.