Ушул жылдын 24-май күнү түнү Айтматов районундагы айылдардын бириндеги үйдөн үч жарандын жансыз денеси табылган. Бул тууралуу ИИМдин басма сөз кызматы билдирди.
Маалыматка караганда, окуя болгон жерге тергөө-ыкчам тобу келгенде каза болгондор бир үй-бүлө мүчөлөрүнө, 26 жаштагы аялга жана анын эки жана төрт жаштагы балдарына таандык экени аныкталган.
«Текшерүүнүн жүрүшүндө киши өлтүрүү болгондугу такталган, денелеринде көптөгөн жараттар бар экендиги аныкталган.Милиция кызматкерлери тарабынан адам өлтүрүүгө шектүү жаран аныкталып, ал мурун адам өлтүрүүгө аракет кылуу беренеси менен соттолгон, Талас облусунун Айтматов районунун Ак-Башат айылынын 1976-жылы туулган тургуну К.Н. экендиги такталган»,- деп айтылат маалыматта.
Ыкчам-издөө иш-чараларынын жүрүшүндө шектүүнүн жүргөн жери аныкталып, тоо аркылуу качып кетүүгө аракет кылган.
Тоодо кармоо учурунда шектүү 1976-жылы туулган К.Н. жок кылынды.
Буга чейин ИИМ ушул жылдын 24-май күнү саат 00.37 чамасында 102 кызматына телефон аркылуу, Талас облусунун Айтматов районунун Ак-Башат айылындагы адам өлтүрүлдү деген маалымат түшкөнүн билдирген.
Тезинен окуя болгон жерге аталган ички иштер бөлүмүнүн ыкчам тергөө тобу чыгып, кароо учурда 1997-жылы туулган М.Ж. жана анын төрт жаштагы кызынын, эки жарым жаштагы баласынын күч колдонуп өлтүрүлгөн жансыз денелери табылган.
Бул окуя Айтматов РИИБдин кылмыштардын бирдиктүү реестрине Кыргыз Республикасынын Кылмыш-жаза кодексинин 122-беренеси ( адам өлтүрүү) менен катталып, кылмыш иши козголуп. Үйүнөн сайсыз ок атуучу курал жана балта далил катары алынган.
Тергөө-ыкчам аракетинин жүргүзүү учурунда жогорудагы окуяга шектүү катары, буга чейин соттолгон, Талас облусунун Айтматов районунун Ак-Башат айылынын тургуну 1976-жылы туулган К.Н. издеп табуу багытында ички иштер органдарына багыттамалар жиберилип, Кыргыз Республикасынын аймагынан чыгып кетпөө максатында чектөө коюлду.
Кылмыш иши боюнча соттук-медициналык, соттук-биологиялык, соттук-баллистикалык жана соттук-криминалистикалык экспертизалар дайындалды.
Учурда, Талас ОИИБдин жана Айтматов РИИБнүн кызматкерлери жеринде шектүүнү издеп табуу багытында ыкчам-тергөө аракеттери жүргүзүлүүдө.