Бүгүн, 31-май күнү Ош МУнун 85 жылдык мааркесине карата башкы имаратта уюштурулган көргөзмө башталды. Көргөзмөгө ОшМУнун Бизнес паркынын 39 стартап долбоору , ата мекендик 67 бизнес компаниялар жана 10го жакын Өзбекстан, Казакстан, Орусия, Кытай жана Түркиядан келген бизнес чөйрөсүнүн өкүлдөрү катышууда.
Мында ата мекендик алдыңкы өндүрүш компаниялардын продукциялары, студенттердин эмгектери коюлду. Иш-чаранын алкагында бош орундар жарманкеси, бизнес-коучтардын мастер-класстары болот. Ошондой эле компаниялар презентациялары орун алып, бизнес чөйрөсүнүн өкүлдөрүнүн ортосунда келишимдер түзүлөт.
Көргөзмө менен Кыргыз Республикасынын Министрлер Кабинетинин Төрагасы Акылбек Жапаров, Билим берүү жана илим министри Догдуркүл Кендирбаева, жергиликтүү бийлик өкүлдөрү, чет өлкөлөрдөн келген коноктор таанышты.
Мында «Келечек муундун ХАБы» борборунун ачылышы болду. Борбордун алдында ОшМУ Кытайдагы бир университет менен биргеликте мехатроника жана робототехника адистиги боюнча 1-курска студенттерди кабыл алынат. Аны менен катар жеткинчектер жана мектеп окуучулары үчүн робототехника курстары ачылат.
Ошондой эле Ош шаарында биринчи жолу “Бизнестин, билим берүү, илим жана мамлекеттик органдардын өз аракеттенүүсү – аймактарды өнүктүрүүнүн жаңы мүмкүнчүлөрү жана жолдору” аталышындагы ОшМУнун 85 жылдык мааракесине арналган аймактарды туруктуу өнүктүрүү форуму болуп жатат.
Форумга Кыргыз Республикасынын Министрлер Кабинетинин Төрагасы – Кыргыз Республикасынын Президентинин Администрациясынын Жетекчиси Акылбек Жапаров баштаган жетекчилер, министрлер, Жогорку Кенештин депутаттары, жергиликтүү бийлик өкүлдөрү, мекеме-уюмдардын жетекчилери, ОшМУдан билим алып, түрдүү тармактарда эмгектенип келе жаткан сыймыктуу бүтүрүүчүлөрдүн катышуусу менен коштолуп жатат.
Форум ОшМУнун башкы имаратындагы жыйындар залында өткөзүлүүдө. Жыйында аймактардын социалдык-экономикалык өнүгүүсүнө таасир этүүчү илимий, бизнес-коомчулуктун, мамлекеттик жана жергиликтүү бийлик органдарынын демилгелерин айкалыштыруу маселелери талкууланат.
Экономикалык чөйрөнү инновациялар жана заманбап технологиялар менен камсыз кылууда университеттердин бизнес жана илимий потенциалын интеграциялоо, университеттин чөйрөсү менен бизнес-чөйрөнүн жана өндүрүштүн өз ара кызматташуусун өнүктүрүүгө мамлекеттик жана административдик колдоо көрсөтүүсү боюнча сөз болот.
Аймактардын экономикасын туруктуу өнүктүрүүдөгү жаңы кадрларды даярдоодо университеттер менен бизнестин байланышы, бизнес, мамлекеттик бийлик, билим берүү жана илим байланыштарын чагылдырууда медианын таасири боюнча пикир алышуулар жүрөт. Форум шаарларды жана аймактарды туруктуу өнүктүрүүгө багытталган стратегияларды иштеп чыгуу максатында уюштурулду.