Түркиянын Маданият жана туризм министрлигине караштуу Туризмди өнүктүрүү агенттигинин долбоору аркылуу Орто Азиянын журналисттери 4-7-июнь күндөрү Түркиянын үч шаарына саякаттап келдик. Ошол сапар тууралуу төмөндө кеп кылып берем.
Чу дегенде эле Стамбулдагы аэропорттон чыгып эле, түрк тараптан күтүп турган автоунаага отуруп, Бурса шаарына карай жолго чыктым. 3-4 саат дегенде Изник шаарына барып, менден бир күн мурун барган журналисттерге кошулуп, алар менен чогуу «Айя-София» мечитине бардык.
Бул имарат мурда чиркөө катары салынган болсо, 14-кылымдын 30-31-жылдары Изник шаарын багындырган Осмон империясынын ошондогу падышасы Орхан Гази аны мечит катары өзгөрткөн. Бул мечит Осмон түрктөрү келгенге чейин 11-кылымдагы катуу жер титирөөдөн киийн жабыркап, реконструкциядан өткөн. Кийин Сулайман Султандын тушунда Синан атуу ошол кездин даңазалуу архитекторунун долбоору менен оңдоп-түзөдөн өтүп, өзгөртүүлөр киргизилген.
Өткөн кылымда оңдоо иштери 1935-1953-жылдары жүргүзүлгөн. Ошол эле учурда мозаика пол жана отургучтар менен толукталган. Мүрзөнүн дубал бөлүгү Иса Машаяктын сүрөтү түшүрүлгөн фреска менен кооздолгон. Жазма булактарда, алгачкы мезгилдеги чиркөө деп аталган түзүлүштү изилдегендерди дубалдардын кышынын чоңдугу таң калтырган. Түздөн-түз курмандык чалуучу жайдын чети чыгышты карап турган жай деп аталат. Ошол курмандыкка чалуучу жайдын ички мейкиндигинде ошондогу техниканы колдонуу менен төшөлгөн дубалдар бар.
Бүгүнкү күндө бул жай туристтердин аягы үзүлбөгөн мечитердин бири болуп саналат.
Ага улай «Кыргыздар күмбөзү» деп аталган жайга токтодук. Анда 11-кылымдын аягында Изник шаарын жеңип алууга жана Анадолу Селчук мамлекетинин түптөлүшүнө салым кошкон кыргыз жоокерлеринин урматына курулган күмбөз жайгашкан. Күмбөз Орхон Казы султан тарабынан тургузулган.
Күмбөздүн жанында кыргыз жоокеринин элесин чагылдырган айкел орнотулган. Айкел колодон жасалып, анын автору Кыргыз эл баатыры, сүрөтчү, белгилүү бедизчи Тургунбай Садыков болуп эсептелет.
Күмбөздүн жанындагы парк 2022-жылы 4-Дүйнөлүк көчмөндөр оюндарына келген Садыр Жапаровдун катышуусунда пайдаланууга берилген.
Алардын руху ыраазы болсун деп Кыргызстандан барган журналисттер баатырлардын арбагына Куран окудук.
Эртеси күнү Бурса шаарындагы Мурадие комплексине бардык. Коплекс Мурат Султан экинчинин тушунда салынып, анын айланасында чайкана, жуунучу жай, диний билим берүүчү окуу жай жана оргума болгон. Азыркы учурда Мурат Султан экинчинин мечити, анын күмбөзү жана кол жазмалар, каллиграфия музейи жайгашкан.
Аны менен катар эле 14-кылымдын аяк ченинде Баязид Султан биринчи курдурган Улуу Жами мечитине да баш бактык. Учурунда Байзид Султан: «Болгария өлкөсүн багындарсам 20 мечит курам», — деп сөз берген, бирок, аталган өлкөнү басып алгандан кийин 20 мечиттин ордуна 20 окшош чатыры бар бир чоң мечит курдурган. Учурда мечит андагы тарыхый комлекстин бири катары саякатчыларга эшигин ачкан.
Мечиттин ичи абдан кең болуп, намаз окуй турган жай, диний китептерди окуй турган жай жайгашкан. Ичинде каллиграфиялык өнөр менен “Мухаммед”, “Аллах” деген жазуулар жазылган.
Мечиттен төмөн түшүү менен Бурсадагы ири базарга барса болот. Биз анда жибектен тигилеген түрдүү кийимдерди көрүп, зер буюмдар сатылган базар менен кенен таанышып чыктык.
Базарды кыдырып чыккан соң “Панорама 1326» музейине бардык. Андагы музейден Осмон империясынын негиздөөчүсү Осмон Газиден тартып анын уулу Орхан Газинин Бурса шаарын кантип басып алганы хронологиялык тартипте тартылган сүрөттөр сүрөт галереясына коюлуп, ошондой эле Бурса шаарын басып алган учурдагы сүрөттөрдү көрүүгө болот.
Бурса шаарын басып алган учурду сүрөтчүлөр кыл калем менен укмуштуудай тартып, тоголок формадагы (панорама) жайга жабыштырышкан. Ал жай аталган музейдин эң үстүндө жайгашып, музейди көрккө бөлөп турат.
Панорамада Орхан Газинин армиясынын Бурса шаарын камоого алып, шаардын айланасында боз үйлөрүн тигип, Бурса чебин курчоого алып турган учуру тартылган сүрөттөрү бар. Орхан Гази 1326-жылы Бурса шаарын колго кириткен. Ага чейин 3 жыл бою шаарды курчап, камоого алып турган. 1326-жылы Орхан Гази Бурса шаарын жана Бурса чебин византиялыктардын колунан тартып алган. Византия империясы тарыхта Чыгыш Рим империясы катары да белгилүү. Осмон түрктөрү Бурса шаарын 1326-жылы алган болсо, Византиянын ошол учурдагы борбору Константинополь шаарын (азыркы Стамбул шаары) 1453-жылы гана алышкан. Ал учур тарыхта «Константинополдун кулашы», же «Византия империясынын кулашы» деген термин менен тарыхта жазылып калган.
Ошентип, Бурса шаары 1326-жылы алынып, бул шаар Осмон империясынын 6 падышасынын тушунда борбор шаар болуп турган. Мындан улам бул шаарда тарыхый объектилер абдан көп. Осмон империясынын падышасы Мехмед экинчи 1453-жылы гана Константинополду алгандан кийин Осмон падышачылыгынын борбору аталган шаарга көчүрүлгөн. Ал эми Чыгыш Рим империясынын тургундарынын бир даарысы көчүп кетип, бир даарысы түрктөр менен чогуу жашап калышкан.
Бурса шаары, 2024-жыл 6-июнь.
Мурадие комлексинин дагы бир жайы- султандар жана анын уулдарынын күмбөзү. Бул жайда Осмон империясынын алгачкы бакшаруучусу Осмон Гази, анын уулу Орхан Гази жана көптөгөн султандардын балдары, аялдары, туугандары, сарай кызматчыларынын күмбөздөрү бар.
Алардын арасында Мустафа канзааданын да күмбөзү жайгашкан. Мустафа канзаада Осмон империясынын белгилүү падышасы Султан Сулаймандын баласы болуп, атасы тарабынан өлтүрүлгөн канзаадалардын бири катары белгилүү. Мустафанын өмүр жолу, өлүмү тууралуу «Даңазалуу доор» сериалынын сүйүүчүлөрү да жакшы билишет. Көптөгөн тарыхчылар Мустафа Осмон ордосунун интригасынын курмандыгына айлангандыгын айтып жүрүшөт.
Мустафа канзааданын күмбөзү
Айтмакчы, күмбөздөр менен таанышып жүрүп, аталган күмбөздөрдү коруган күзөтчүлөрдүн алмашуусуна да күбө болдук. Күмбөздүн кире беришин куралчан эки күзөтчү кайтарат. Жергиликтүү убакыт менен 14:00дө күзөтчүлөр алмашат.
Күмбөздөн бир нече метр алыс эмес жайдан Бурса шаарынын кооздугун тамаша кылса болот. Андан бийик-бийик курулуган заманбап имараттар, Осмон доорунан калган тар көчөлөр, жергиликтүүлөрдүн казы-катар тизилген ашканалары, окшош типте курулган үйлөр, өнөр жай аймактарын көрө аласыз.
Автор: Бексултан Нуркамил уулу