Эртең, 10-октябрь күнү Катар өлкөсүнүн Доха шаарында футбол боюнча дүйнөлүк чемпионатка тандоо этабынын үчүнчү турунун алкагында Кыргызстан курамасы менен Катар курамасы кез келет. Оюндун алдында «Ак шумкарлардын» башкы машыктыруучусу Максим Лисицын алдыдагы оюн тууралуу комментарий берди.
«Беттешке даярдык биз пландагандай жүрдү. Бир гана нерсе, командага бир нече оюнчу бираз кеч кошулуп калышты. Бирок, бул биздин оюнубузга таасирин тийгизбейт деп ишенебиз. Биз Катар курама командасынын күчүн жана эл аралык аренадагы жетишкендиктерин толук түшүнөбүз. Бирок, ар бир оюнда оң натыйжага жетүү үчүн колдон келгендин баарын жасайбыз, эртеңки Катарга каршы оюнда да»,- деди М. Лисицын.
Кыргызстандын футбол боюнча курама командасынын капитаны Валерий Кичин дагы өз оюн ортого салды.
«Беттештерге даярдык жакшы өтүп, Катарга жакшы маанайда келдик. Команда позитивдүү жана биз өз мүмкүнчүлүктөрүбүзгө ишенебиз»,- деди Кичин.
Катар — Кыргызстан беттешинин уюштуруу жыйыны бүгүн, 9-октябрда өтүп, анда оюн формаларынын түстөрү аныкталды.
Кыргызстандын улуттук курамасы эртең ак түстөгү формада оюн талаасына чыгат. Ал эми Катардын оюнчулары кочкул кызыл түстөгү формада ойнойт.