Ош шаардык ички иштер башкармалыгынын Ак-Буура милиция бөлүмүнүн кызматкерлери тарабынан өз үйүндө баңгизат өстүргөн жана сатып жүргөн жаран кармалды. Бул тууралуу Ош ШИИБдин басма сөз кызматы билдирди.
Маалыматка караганда, аталган бөлүмдүн кызматкерлери тарабынан жашоочулардын арасында профилактикалык иш чараларды жүргүзүү учурунда Амир-Темир кичи шаарчасынын тургуну аттуу жаран үйүндө кара куурай наркотикалык өсүмдүгүн өстүрүп, сатып жүргөндүгү тууралуу маалымат алынган.
«Аталган факты боюнча жыйналган материалдар катталып, маалыматты тактоо боюнча ыкчам иштер алынып барылган. Алдын ала тергөөнүн жүрүшүндө аталган кичи райондун тургуну 1965-жылы туулган Х.А. жашаган даректи кароо учурунда атайын өстүрүлгөн кара куурай өсүмдүктөрү, атайын сандыктын ичинен 2 даана 1 литрлик идиште кургатылган кара куурай өсүмдүгү, 2 даана ичинде кара куурайдын жалбырактары бар кагаз баштыкча, жана полителен баштыкчадагы кара куурайдын уруктары табылган»,-деп айтылат маалыматта.
Соттук-химиялык экспертизанын корутундусуна ылайык, атайын өстүрүлгөн өсүмдүктөр 4 кг.850 грамм, банкалардагы өсүмдүктөр 193 грамм кара куурай наркотикалык заты болуп табылган.
Учурда Ак-Буура милиция бөлумү тарабынан Кыргыз Республикасынын кылмыш кодексинин 288-беренеси менен кылмыш иши козголуп, тергөө иштери жүрүп жатат. Шектүү Х.А. 15-октябрда убактылуу кармоочу жайга киргизилди.