20-октябрь күнү Бишкек шаарынын башкы спорттук аренасы — Д.Өмүрзаков стадионунда 2024-жылкы Кыргыз Республикасынын Суперкубогунун беттеши орун алды. Суперкубок үчүн өлкөнүн учурдагы чемпиону «Абдыш-Ата» футболдук клубу жана өлкө кубонунун ээси «Мурас Юнайтед» кез келишти.
Кыргыз футбол биримдиги билдиргендей, беттештин 22-мүнөтүндө Кайрат Жыргалбек уулу эсепти ачып, ал өзгөрүүсүз калып, жыйынтыгында оюн «Абдыш-Атанын» жеңиши менен аяктады. Ошентип, Кант шаарынын «Абдыш-Ата» клубу 2024-жылкы Суперкубоктун ээси болду.
«Командаларды сыйлоо аземине Кыргыз футбол биримдигинин Биринчи Вице-президенти Нурдин Букуев, КФБ Вице-президенти Джохан Ералханов жана Кыргыз профессиональнык футбол лигасынын жетекчилиги катышышты»,- деп айтылат маалыматта.
Нурдин Букуев КФБ атынан «Абдыш-Ата» клубуна 2024-жылкы Кыргыз Республикасынын Суперкубогун жеңгендиги үчүн 20 000 АКШ доллар өлчөмүндөгү сыйлык сертификатын тапшырды.
Буга чейин 2024-жылкы Кыргызстандын кубогун экинчи ирет катары менен «Мурас Юнайтед» клубу уткан.