Турганбаев Жыргалбек Иркамилович Кара-Кулжанын уулу. Ал 1980-жылы Капчыгай айыл өкмөтүнө караштуу Терек-Суу айылында туулуп-өскөн. Жогорку маалыматтуу. ОшМУнун тарых факультетин аяктаган. 2002-жылы Акун Турганбаев атындагы Терек-Суу орто мектебинде тарых мугалими болуп иштөө менен эмгек жолуна чыйыр салган. Кийин № 15 Терек-Суу айылдык китепканасынын башчысы кызматын аркалаган. Капчыгай айылдык кеңешинин төрагасы, эки жолку чакырылыштын депутаты болуп шайланган. 2018-жылдан баштап А.Турганбаев атындагы Терек-Суу орто мектебинин директору болуп үзүрлүү эмгектенип келүүдө. Агартуу тармагына кошкон салымы бааланып, КР Билим берүү жана илим министрлигинин Ардак грамотасы менен сыйланган. Облустук жана райондук мамлекеттик администрацияларынын жана бир катар мекеме-уюмдардын Ардак грамоталарына татыган. Үй-бүлөлүү. Жубайы Гүлзада экөө төрт уулду татыктуу тарбиялап келишүүдө.
Биздин Алайкуу жергесине болгон иш сапарыбыз тоо арасындагы билим берүү мекемелеринин абалы, агартуучулардын эмгеги жана мындагы билим берүүнүн сапаты туурасында маалымат алууга да багытталды. Дегенибиздей, Капчыгай айыл өкмөтүнө караштуу Терек-Суу айылындагы Акун Турганбаев атындагы “Терек-Суу” орто мектебине баш бактык. Аталган билим уясынын директору Турганбаев Жыргалбек Иркамилович бизди утурлай тосуп чыгып, мектептин ичи жана сырткы келбети менен кенен тааныштырып чыкты. Б из Жыргалбек Иркамилович менен жеринде маектешип кайтканбыз.
— Жыргалбек мырза, Сиз жетектеген мектеп имараты кыйла эле эскилиги жеткени көрүнүп турат. Мектеп имараты жөнүндө азыноолак кеп кылсаңыз?
— Туура айтасыз. Биздин мектеп 1973-жылы курулган экен. Өзүңүздөр көргөндөй үч корпустан турат. 1-окуу корпусу 1973-жылы кыш менен урулса, 2-окуу корпусу фин тибинде 1978-жылы курулган. 3-корпус мастерскойго деп ашар жолу менен курулган экен. Аны азыр биз жыйындар залы катары пайдаланып келебиз. Мектеп акыркы жолу АБРдин эсебинен 1990 -жылы капиталдык ремонттон өткөн. Имараттын эскилигине деле чыдап, мындагы агартуучулар балдарга татыктуу таалим, мыкты билим берүү менен алекпиз. Заманбап мектеп курууга биздин Терек-Суу айылы кооптуу зонага кирип калгандыктан, мында курулуш жүргүзүүгө мүмкүн эмес тура. Эми кооптуу аймактан чыгаруу үчүн тиешелүү мекемелерге документтер жиберилген. Себеби, Президентибиз курултай өткөргөндө ушул маселе менен кайрылганбыз. Жыйынтык жаман эмес. Буюрса,биздин айылга да заманбап мектеп салынып калаар деген ниеттебиз. Ал эми 2020-жылы 17-ноябрда мектеп юстициядан кайрадан каттоодон өтүп, Акун Турганбаев атындагы “Терек-Суу” орто мектеби деп аталган. Акун агайды бир эле сөз менен сүрөттөсөм, биздин айылдын Дүйшөнү болгон.
— Мектепте канча окуучу окуйт жана билим сапаты кандай болууда?
— Негизи мектеп 150 окуучуга ылайыкталган. Учурда 132 окуучу эки сменада окуйт. Анын ичинен 30 окуучу 3,5 чакырым алыстыкта жайгашкан Ничке-Суу айылынан келишет. Билим сапатыбыз жөнүндө айтсам, 2022-2023-окуу жылындагы билим сапатыбыз 58,58 пайызды түздү. Ал эми, жогорку республикалык тестирлөө боюнча акыркы 5 жыл ичинде, мындайча айтканда 2018-2019-окуу жылында орточо упайыбыз 142,75 болуп райондо эң алдыга чыкканбыз. Үстүбүздөгү окуу жылында орточо упайыбыз 126 упайды түздү. Ал эми Алтын сертификат жана Алтын тамга алуу үчүн башталгыч классттан баштап, зирек, жакшы окуган окуучуларыбызды даярдап жатабыз. Жакынкы жылдарда бул жаатта да ийгиликтерди жаратыбыз деп турабыз. Себеби, 10-11-класстан эле даярданган окуучулар жетиштүү балл топтой албай калат тура. Аны башталгыч билим учурунан таптоо зарыл экен. Биздин мектеп шаардан бир канча чакырым алыста жайгашканына карабай, ЖТРге даярдануу үчүн окуучуларыбыз атайын шаарга барып, окуу борборлорунан билим алып келишүүдө. Бул жактан биздин мугалимдер да кошумча сабактарды уюштуруп, босого баллдан өтүп, жогорку окуу жайга тапшыруулары үчүн жан үрөп иштеп келебиз. Ар окуу жылынын жыйынтыгы менен предметтик демөөрчүлөрдүн эсебинен окуучуларыбызга, мугалимдерибизге стипендиялар берилет. Окуучуларды жакшы окууга үндөө, аларга стимул берүү максатында Акун Турганбаев атындагы стипендиябыз ЖРТден эң жогорку упай алган бүтүрүүчүлөрүбүзгө берилет.
— Мектеп ашканасындагы жабдыктар, мындагы бардык шарттардын түзүлгөнү, тазалыгы көзүмө урунду десем болот. Демек, Сиздерде башталгыч класстынокуучулары үчүн ысык тамак уюштурулганбы?
— Туура байкаптырсыз. Биздин мектеп 2021-жылдын октябрь айынан баштап ПРООНдун Дүйнөлүк азык-түлүк программасынын мектептерде ысык тамакты уюштуруу боюнча долбооруна киргенбиз. Бул программанын талаптарына ылайык айыл өкмөтүнүн бюджетинен 440 миң сом ажыратылып, ашканабыз толук ремонттон өткөрүлгөн. Андан соң, аталган долбоор тарабынан 8 миң АКШ долларлык ашкана жабдуулары менен камсыздалды.Мындан сырткары, биздин мектепте көмөкчү чарбабыз бар. Мында көмөкчү чарбабызда учурда 15 баш кой, 38 сотых сугат жери, багы бар. Сугат жерге жылда картошка, сабиз, пияз сыяктуу жашылчаларды эгип алабыз. Ал жашылчаларды окуучулардын ысык тамагына пайдаланыбыз. Багыбыздан алынган мөмөлөрдөн как жасап кургатып алабыз, аны кышында окуучулага компот кайнатып беребиз. Өзүңүздөр көргөндөй биздин айыл тоо арасында жайгашкан. Шарты катаал. Ошондуктан электр энергиясы үзгүлтүккө учуруган мезгилде мектеп окуучуларына ысык тамак берүү токтоп калбашы үчүн көмөкчү чарбанын эсебинин 30 миң сомго учур талабына ылайык эки очок куруп, ага казан алып, пайдаланып жатабыз. Жакшы ишти байкаган башталгыч класстын ата-энелери да өз ыктыярлары менен 2022-жылдын октябрь айынан баштап, ай сайын 100 сом-дон чогултушуп, кошумча тамак-аш үчүн өздөрү азык-түлүк алып келип, көзөмөлдөшүүдө.
— Сиз директор болуп келгенден бери мектептин материалдык-техникалык базасын чыңдоого кандай аракеттерди жасадыңыз. Деги эле мектеп үчүн арнап жаткан эмгектериңизден айта өтсөңүз?
— Мен жетекчи болгондон бери мактангандай болбоюн, суроо салганыңыздан кийин азыноолак болсо да жооп берейин (жылмайып). Эскини эптегиче эсиң кетет дегендей,эскини да эптеп жатабыз десем болот. Жетекчи болуп келгенден бери эле, демөөрчү издемей, долбоортартмай менен убарамын. Бирок, шүгүр, кайрылууларым жоопсуз калбай, колдоолор болуп жатат. Чү дегенде эле, Акун Турганбаевдин үй-бүлөсүнүн демөөрчүлүгү мененмектептин фин тибиндеги корпусунун жылытуу системасы толугу менен жаңыланды жана эки корпустун терезелери пластик терезеге алмаштырылды. Каана башчылардын демөөрчүлүгү менен ар бир класстык бөлмөлөр 100 пайыз жаңы эмеректер менен камсыз болду. 2023-жылдын март айында улуттук колориттеги коңгуроо орноттук. Мектептин коңгуроосу улуттук күүлөр менен жаңырып, аны уккандардын баары ыраазы болушууда. Ошондой эле,мектептин ички жасалгасын жасаттык. Бул иштер мектептин өздүк фондунан жана педжамааттын өз ыктыяры менен болгон демөөрчүлүгү аркылуу каржыланды. Бүткүл Дүйнөлүк банк тарабынан каржыланган “Келечек үчүн билим берүү” программасынын алкагында акыркы үлгүдөгү 21 даана компьютер, 6 даана проектор алдык. Мындан сырткары мектепте 2 телевизор, 1 интерактивдүү доска, сирена бар. Мугалимдерибиз өз каражаттарына жүз пайыз ноутбук менен камсыз болушкан. Жеке демөөрчү тарабынан технология сабагында колдонуу максатында 1 даана тигүү машинасы алынган, учурда аны сабакта окуучулар колдонушууда. Ал эми окуу китептери, методикалык жана көркөм адабияттар менен мектеп китепканасынын фондун толуктоодо бир нече демөөрчүлөр менен иш алып бардым. Жеке демөөрчүбүз Кадыров Кеңешбек 50 миң сомдук китептерди белек кылды. Кеңешбек Абдраманов агабыздын демөөрчүлүгү менен мектепке видеокөзөмөл орнотулуп, иштеп атат. Азыр санарип заманында тоо арасында болсок дагы биздин мектептин өзүнө гана таандык болгон атайын сайтын ачканбыз. 2018-жылы мектеп аккредитациялоодон өткөн. Быйыл 2-жолу аккредитациялоодон өткөрүлдү. Белгилей кетсем, типтүү эмес мектептер арасында кезектеги ремонт иштерин жүргүзүүдө райондо акыркы 5 жылдан бери алдыңкы орундабыз.
— Мугалимдердин жана окуучулардын жетишкен ийгиликтери барбы, коомдук иштерге активдүү катышышабы?
— Окуучуларыбыз чыгармачылыкка жакын. Бардыгы таланттуу, шык-дараметтери күчтүү окуучуларыбыз бар. Ошондуктанбы окуучуларыбыз маданият жаатында акыркы 5 жылда республикалык жана эл аралык этнофестивалдарда баш байге, 1-2-орундарды багындырып келишүүдө. Ал эми спорт боюнча райондук, облустук деңгээлге чейин жеткен учурлар байма-бай катталууда. 5-11-класстардын окуучуларын Ош шаарына музейлерге жана ЖОЖдорго экскурсияга алып барып турабыз. Кадр маселеси боюнча адистержетиштүү. Жалпы 20 мугалим эмгектенет. 2 мугалим пенсия курагында, 2 мугалим КР ББМ төш белгисинин ээси. КР Билим берүү жана илим министрлигинин “Ата-энелер мектеби” программасы боюнча атайын иш алып баруудабыз.
— Маек соңунда, агартуучуларга каалооңуз?
— Мугалим сокурга – көз, дүлөйгө кулак, караңгыга – чырак, жан дүйнөгө — азык берет. Мугалим чыныгы агартуучу, мугалим гана коомду аппак кылып тазалоочу бирден бир күч! Алтын «жакут» берметтей билим деңизинде кеме айдаган келечек муундарга нурун чачкан мугалимдерге не деген сөздөрдү арнасаң да аздык кылат. Андыктан бардык мугалимдерге түйшүгү түмөн кесибинде ийгиликтер боло берсин демекчимин. Анан жолдун алыстыгына карабай, биздин мектепке келип, бизден кабар алганыңыздар үчүн сиздерге да рахматыбызды айтабыз.
Маектешкен: Н.ӨМҮРЗ АКОВА. Ош-Капчыгай-Ош