Балалык кез жана эмгеги
Кыргызстандын залкар уулу, дүйнөгө аты таанымал белгилүү жазуучу, коомдук жана мамлекеттик ишмер Чыңгыз Төрөкулович Айтматов Талас облусуна караштуу Кара-Буура районундагы Шекер айылында 1928-жылы 12-декабрда туулган. 1946-жылы Жамбыл шаарындагы Зоо-ветеринардык техникумду, 1953-жылы К.И.Скрябин атындагы Кыргыз мамлекеттик айыл чарба институтун бүтүргөн, 1956-1958-жылдары Москвадагы Жогорку адабият курсунун угуучусу болгон. Жаш Чыңгыз Улуу Ата-Мекендик согуш жылдарында Шекер айылында айылдык Кеңештин катчысы, райфинбөлүмдүн агенти, 1953-1956-жылдары Кыргыз мал чарба илимий-изилдөө институтунун эксперименттик фермасында зоотехник болуп иштеген. 1958-1960-жылдары «Литературный Киргизстан» журналынын редактору, 1960-1965-жылдары «Правда» гезитинин өз кабарчысы, 1965-1986-жылдары Кыргызстан Кинематографисттер союзунун төрагасы болгон. 1988-1990-жылдары «Иност- ранная литература» журналынын башкы редактору, СССР Президентинин кеңешчиси болуп турган. 1991-жылдан элчилик кызматта (1991-жылдан Кыргызстандын Бельгия мамлекетиндеги элчиси) болгон. Чыңгыз Айтматов 1956-жылдан тарта СССР Жазуучулар союзунун мүчөсү болгон. «Литературная газета», «Новый мир», «Литературный Киргизстан» журналдарынын редколлегия мүчөсү болгон. 1956-жылдан тарта СССР Жазуучулар союзунун мүчөсү эле.
Чыгармачылыктын башаты
Айтматовдун чыгармачылыгы студент кезинде башталган. Орус жана кыргыз тилдеринде жазып, биринчи аңгемеси «Гезитчи Дзюйо» деген ат менен 1952-жылы » Литературный Киргизстан» альманахында орус тилинде жарыяланган. Алгачкы аңгемелери 1952-жылы орус тилинде «Комсомолец Киргизии» газетасына жана «Литературный Киргизстан» аль-манахына жарыяланат. Ал ошол кезде эле В.Катаевдин «Полктун уулу» повестин, М.Бубеновдун «Ак кайың» романын которот, бирок, алар басылган эмес. Андан кийин «Ак жаан», «Түнкү сугат», «Асма көпүрө», “Сыпайчы”, аттуу кыргызча жазылган аңгемелери жарыяланат.
ГЕНИЙДИН ШЕДЕВРЛЕРИ
Айтматовдун чыгармачылык ишиндеги бурулуш 50-жылдардын ортосунда болот. Бул жылдары «Бетме-бет» (1958) жана «Обон» («Жамийла», 1959) повесттери кыргызча жана орусча жарыкка чыгат. Адам мүнөзүн, психологиясын ачууда «Бетме-бет» повести кыргыз прозасына жаңылык катары кирди. «Жамийла» повести алгач «Обон» деген аталышта жарык көргөн. Повесттери кыргыз идеялык-эстетикалык проблематикасы жана ага шайма-шай келген көркөмдүк сапаты менен кыргыз совет адабиятындагы нукура жаңычыл чыгарма болуп, бат эле көп тилдерге которулду. «Жамийла» өнүп-өсүп калган кыргыз прозасынын жаңы сапатка жетишип, өнүккөн адабияттардын деңгээлине көтөрүлгөнүн дүйнөгө маалым кылды. Ошондон бери Айтматов жаңы чыгармаларында сейрек кездешүүчү талантынын улам жаңы кырларын ачып келе жатты. «Кызыл жоолук жалжалым» («Тополёк мой в красной косынке», 1961), «Бото көз булак» («Верблюжий глаз», 1961), «Биринчи мугалим» (1962), «Саманчынын жолу» (1963) деген повесттеринде жазуучунун нравалык, философиялык изденүүлөрү андан ары тереңдеп, чеберчилиги бийиктен бийикке көтөрүлгөн. Аларды, айрыкча, «Биринчи мугалим» повестинен ачык көрүүгө болот. Повесть өткөндөгү окуяларды сүрөттөсө да, азыркы мезгил менен үндөш көйгөйдү козгойт. Анын «Саманчынын жолу» повести Улуу Ата-Мекендик согуш жылдарындагы кыргыз элинин тылдагы кыйын, күжүрмөн, баатырдык эмгегин даана сүрөттөйт. Чыгарманын баш каарманы Толгонайдын элеси аркылуу жазуучу согуштун оор сыноолорун майышпай көтөргөн карапайым кыргыз аялынын типтүү образын түзгөн. Бул трагедиялуу боёктор менен жазылган зор оптимисттик күчкө ээ болгон Толгонайдын образына күчтүү драмалык чыйралыш, терең психологизм, эпикалык кеңири масштабдуулук мүнөздүү. Ал эми «Жаныбарым, Гүлсарым!» («Прощай, Гульсары») повестинин жарык көрүшү көп улуттуу совет адабиятына зор идеялык- эстетикалык табылга катары кирип, кыргыз прозасы социалисттик реализм жолунда дагы алдыга илгерилегенин далилдеди. Чыгарманын сюжетин кураган окуялар кыргыз айылынын турмушу менен чектелсе да, анда жалпы совет коомуна орток маселелер көтөрүлгөн. Ак ниеттүүлүк менен карасанатайлыктын ортосундагы «түбөлүк» конфликт повестте жаңыча чечилген. Танабай менен Гүлсарынын образдары өтмө катары айкалышып, өзүнчө бир жалпыланган образды түзөт.
Айтматовдун «Ак кеме» аттуу повести жазуучунун чыгармачылыгында бөтөнчө мааниге ээ. Бул чыгармада адам тагдырынын не бир катаал жактарын изилдөөдөгү жазуучунун кыраакылыгы, интеллектуалдуулугу, ийкемдүүлүгү көрүндү. Повесттин гуманисттик пафосу баштан-аяк адамдын бийик сапаты жана нравалык тазалыгын даңазалайт. Повесттеги «балык» болуп сууга агып кеткен баланын образы, куулук-шумдугу жоктугу, ак пейилдүүлүгү менен айырмаланып, адамды ар кандай бузукулукка, арамдыкка, зомбулукка каршы активдүү күрөшүүгө чакырат. Повесттин мазмунунан,эгер адам ар кандай кара күчтөрдүн зомбулугуна туруштук бере албай, пассивдүү жолго түшсө, анда ал өзүнүн ыйык идеалына да кол көтөрүүгө чейин барат деген философиялык жана нравалык тыянак чыгат. «Ак кеме» түзүлүшү татаал, кабат-кабат мазмундуу, көп проблемалуу чыгарма. Жазуучу өзүнүн балалыгы туш келген согуштун катаал күндөрүнүн элесинен алып «Эрте жаздагы турналар» (1973) аттуу лирикалуу-романтикалык стилдеги повестин жараткан. Жазуучу «Манас-Атанын ак кар, көк музу» аттуу автобиографиялык очеркинде повесттеги «Аксай десанттары»: Анатай, Эркинбек, Эргеш, Кубаткул өзүнүн классташ курбулары экендигин баяндайт. «Деңиз бойлой жорткон ала дөбөт» (1977) повестинде алыскы Охотск деңизинин жээгиндеги нивх элинин турмушу сүрөттөлгөн. «Кылым карытар бир күн» (1980), «Кыямат» (1986), «Кассандра тамгасы» (1995) романдарында жазуучу учурдун актуалдуу проблемаларын: илим, техниканын, дүйнөлүк, эл аралык коммуникациялык байланыштын күчтүү басымы алдында адам өзүнүн жеке адамдык өзгөчөлүгүн, индивидуалдуулугун, адамгерчилик сапатын, өзүнө, келечекке болгон ишенимин сактап калуу аракеттерин Едигей, Бостон, Авдий, Филофей, Роберт Борк, Руна Лопатиналардын образдары аркылуу чагылдыруу менен адамзатты ыймандык тазалыкка чакырат.
Алп жазуучу Чыңгыз Айтматов ошондой эле публицистикалык очерктердин, адабий сын макалалардын, эссе жанрынын чоң чебери. Жазуучунун ар кайсы жылдары жарык көргөн макалаларынын топтомдорунан түзүлгөн «Жер, суу менен авторлош» (орус тилинде), «Биз дүйнөнү жаңыртабыз, дүйнө бизди жаңыртат» (кыргыз тилинде) жыйнактары тематикасынын кызыктуулугу, маселени терең ачып бере билүү чебердиги, көркөмдүгү менен анын көркөм жанрдагы чыгармаларынан кем эмес окурмандарды өзүнө тартып турат. Япон философу Д. Икэда менен «Духтун улуулугуна ода» (1993), казак акыны жана коомдук ишмер М. Шаханов менен «Жар боюнда боздоп калган аңчынын ыйы» (1996) аттуу диалогдору – да бүгүнкү күндүн актуалдуу маселелери, дегеле турмуштук ар кандай көрүнүштөр зор философиялык тереңдикте, турмуштук фактылык ынанымдуулукта көркөм чагылдырылган баяндар болуп саналат. Ч.Айтматовдун чыгармачылыгы улуттук адабият үчүн эле эмес, улуттук искусствонун башка түрлөрүнүн өнүгүүсүнө да өзүнүн зор таасирин тийгизди. Анын чыгармаларынын негизинде музыкада чакан обондуу ырдан тартып симфонияга чейин жазылды, көркөм сүрөт искусствосунда ондогон, жүздөгөн эмгектер жаралды, театралдык спектаклдер коюлду, кинофильмдер тартылды.ЮНЕСКОнун билдирүүсү боюнча Ч.Айтматов бүгүнкү күндө чыгармалары көп басылган классиктердин бири. Анын чыгармалары дүйнөнүн 200гө жакын тилине которулуп, бир нече ирет чоң тираж менен (1998-ж. жалпы саны 67,5 млн. экз.) кайталап басылган. «Айтматов таануу» деген илимий атайын дүйнөлүк адабий процессте кеңири колдонулууда. 1989-жылы Бишкекте эл аралык Айтматов клубу (негиздөөчүсү жана президенти окумуштуу А. Акматалиев) түзүлгөн. Анын кыргызстандык жана чет өлкөлүк мүчөлөрү белгилүү илимпоздор, журналисттер, адистер ж.б. Клубдун жобосу, секциялары, адабият, көркөм өнөр жана маданият жагындагы эл аралык сыйлыгы бар. 1992-жылы Бишкекте коомдук “Айтматов таануу” институту түзүлгөн. Ошондой эле, Бишкекте «Айтматов чыгармаларынын китепканасы», 1993-жылы Эл аралык коомдук айтматовдук Академия уюштурулуп, анын анык, ардактуу академиктери шайланган. Чыңгыз Айтматов кыргыз жана орус тилинде жазган эки тилдүү жазуучу болуп саналат.
Анын чыгармалары боюнча көптөгөн илимий эмгектер жазылган жана бүгүнкү күндө да анын чыгармалары изилденүүдө. Жазуучу планетадагы адамзатынын көйгөйлөрү, аларды чечүү, жакшылык менен жамандыктын күрөшү тууралуу өз чыгармаларында чагылдырып, философиялык ой жүгүрткөн. Жазуучу кыргыз улуттук мүнөзү аркылуу, жөнөкөй каармандарынын образдары аркылуу дүйнөлүк масштабдагы жалпы адамзатынын көйгөйүн ачып бергендиги менен таасир калтырат. Өзүнүн чыгармаларында кыргыз фольклорун, анын ичинде “Манас” эпосун негиз кылып, элдик оозеки чыгармаларын өз заманына ылайыктап, чыгармаларынын идеялык концепциясын өөрчүткөн. Мисалга алсак, “Кылым карытар бир күн” чыгармасында “маңкурт” түшүнүгүн “Манас” эпосунан алгандыгын жазуучу өзү айтып берген. Эки тилдүү жазуучунун ар бир чыгармасы эпикалык мүнөзгө ээ. Анын чыгармалары кыргыз адабиятын эл аралык деңгээлде көтөрүп, жазуучунун дээрлик бардык чыгармалары КМШ өлкөлөрүнүн драма жана опера театрларынын сахналарында коюлган жана чыгармалары боюнча тартылган кинофильмдер Эл аралык кинофестивалдардын сыйлыктарына жана байгелерине татыктуу болгон.
Сыйлыктары
Ч.Айтматов бир топ сыйлыктарды алган. Атасак, “Кыргыз эл жазуучусу” (1968), Токтогул атындагы мамлекеттик сыйлыктын лауреаты (1979), КРУИАсынын анык мүчөсү (1974). Социалисттик Эмгектин Баатыры (1978), Лениндик (1963) жана СССР мамлекеттик сыйлыгынын лауреаты (1968, 1977, 1983), Европа Илимдер, искусство жана адабият академиясынын анык мүчөсү (Париж, 1983).Ошондой эле Бүткүл дүйнөлүк Илим жана искусство академиясынын академиги болгон (Стокгольм, 1987), «Ысык-Көл форумунун» президенти, Австрия, Австралия, Америка, Индия, Италия, Түркия, Япония ж. б. өлкөлөрдүн эл аралык сыйлыктарынын лауреаты болгон. Кыргыз Республикасынын Эл баатыры (1997). Улуу жазуучу Чыңгыз Төрөкулович Айтматов 2008-жылдын 10-июнунда 80 жаш курагында катуу оорудан кийин дүйнөдөн кайткан.
К.КЫДЫРАЛИЕВА