Кыргызстандын футбол боюнча улуттук курамасы Кувейт курамасы менен жолдоштук беттеш өткөрүп, 3:1 эсебинде жеңишке жетишти. Оюн кечээ, 11-сентябрь күнү кечинде Бириккен Араб Эмираттарынын Дубай шаарындагы «Севенс» стадионунда болду.
Оюндун биринчи бөлүгү эки кураманын тең чыгуусу менен аяктаган. Анда кыргыз курамасынын жарым коргоочусу Гүлжигит Алыкулов эсепти теңелткен. Оюндун экинчи бөлүгүндө чабуулчу Кожо Жоел эки гол киргизип, натыйжада ак шумкарлар 3:1 эсебинде атаандашын жеңген.
Ошентип, Кожо Жоел улуттук курамадагы дебюттук голдорун киргизди.
Голдордун авторлору: Кожо Жоел жана Гүлжигит Алыкулов
Оюндан кийин Кыргызстан улуттук курамасынын башкы машыктыруучусу Штефан Таркович комментарий берип, курама 2 жылдан бери бир оюнда 3 гол киргизе электигин жана чабуулду жыйынтыктоодо кыйынчылыктар болуп келгенин билдирген.
«Биринчиден, футболчуларды абдан оор беттеште жеңиши менен куттуктайм. Жеңиш оңой болгон жок жана гол киргизгенибизде оюндун жыйынтыгын биз тарапка эрте буруш керек болду.
Биз сапаттуу командага каршы ойнодук. Кувейт сериядагы 12 беттеште жеңилбей, абдан татыктуу оюн көрсөтүүдө.
Биринчи тайм биз үчүн оптималдуу болбой калды, биз начар кыймылдадык жана өтө пассивдүү болдук.
Экинчи таймда кувейттик оюнчуларга жетиштүү басым жасап, аларды ката кетирүүгө мажбурлап, акыры жеңишке жетиштик (3:1).
Чындыгында, биздин команда 2 жылдан ашык убакыттан бери расмий беттештерде 3 гол киргизе элек жана ушул убакка чейин бизде оюнду жыйынтыктоодо кыйынчылыктар болуп келген. Жеңиш жана өзгөчө экинчи таймда оюндун жакшыруусу биз акырындык менен жакшырып бара жатканыбызды көрсөтүп турат.
Мен бул команданын потенциалы мындан дагы жогору экенине жана өзүбүздүн үстүбүздөн талыкпай иштөөгө, даяр оюнчулар менен бирге биз дайыма өнүгүүгө жетише алабыз деп ишенем»,-деди Ш.Таркович.
Мындан сырткары, Таркович октябрда ноябрда боло турган дүйнөлүк чемпионаттын тандоо оюндарына карата даярдык-чогулуу болорун, анда 23 жашка чейинки футболчулар да курамага кошуларын белгилеген.
«Октябрда бизди ноябрдагы дүйнөлүк чемпионаттын тандоо оюндарынын алдында акыркы даярдык жыйыны күтүп турат. Ошол убакыттан баштап, U-23 оюнчулары жеткиликтүү болот, бул, албетте, командадагы моралдык рухту көтөрөт.
Күйөрмандар бизди колдоп келгени үчүн абдан ыраазымын. Алар бизге үйдө ойногондой сезим калтырышты. Аларга өзүмдүн жана оюнчулардын атынан ыраазычылык билдирем. Бирге, Алга Кыргызстан!»,-деди Ш. Таркович.
ФИФАнын ушул жылдын 20-июлдагы рейтинги боюнча Кувейт курамасы 137-орунда, кыргыз курамасы 97-орунда турат.