«Уюлдук байланыш компаниялары кошумча антенналарды (базалык станция. ред. «Ош жаңырыгы») качан орнотуп беришет. Алардын ижара акысын түшүргөнбүз»,-деди «Биздин Кыргызстан» фракциясынан депутат Бекболот Арзибаев бүгүн, 13-сентябрь күнү Ош шаардык кеңешинин XX сессиясында.
Депутат Ош шаардык муниципалдык менчик башкармалыгынын башчысы Канышай Имаровага кайрылып:
«Мурда депутаттар уюлдук байланыш компаниялардын антенналарынын ижара акысын түшүрүп бергенбиз. Бул үчүн алар кошумча 30-40 антенналарды орнотуп бериши керек эле. 10 айдай убакыт болуп калды, дагы деле орното элек. Алар убадасын аткарган жок. Быйылкы жылдын эсебинен канча антенна коюшту»,-деди.
Ош шаардык муниципалдык менчик башкармалыгынын башчысы Канышай Имарова мурдагы бекитилген план боюнча эле жумуштар аткарылып жатканын айтты.
«Кээ бирки учурларда, айрым учурларда компанияларга антенналарды коюу боюнча тоскоолдуктар болуп жатат. Социалдык объектилерге коюуга да тоскоолдуктар болуп жатат. Быйылкы жылы канча даана антенна коюлганы боюнча тактап туруп, кат түрүндө жооп берейин»,-деди К, Имарова.
Ошондой эле, Бекболот Арзибаев «Сапат» баладар жана кыздар мектептери ижарага акыны төлөбөй жүргөнү боюнча буга чейин сессияда депутаттар тарабынан маселелер көтөрүлүп, сот иштери жүрүп жатканын айтып, аталган иш кандай жыйынтыкталганына кызыкты.
Канышай Имарова аталган мектептер бекитилген графиктин негизинде ижара акыны төлөп баштаганын белгиледи.
«Сот иштери боюнча: бүгүнкү күндө ижарадан бошоту боючна сот болгон. Биз тараптан келишим үзүлүп, Ош шаардык кеңеши тарабынан сунушталган тариф боюнча аталган мектептерге келишим жөнөткөнбүз.Алар келишимди аткарбоо боюнча сотко кайрылган. Мурда келишимибиз жок болгонуа байланыштуу соттогу иш кароосуз калтырылды. Бүгүнкү күндө 1-июндан баштап атайын тарифтин негизинде 717 миң сомдон (айына) төлөп жатат. Буга чейинки 2 млн.сомго жакын акча каражатты төлөп берген»,-деди К. Имарова.